សង្គ្រាមអ៊ុយក្រែន ៖ ប្រមុខរដ្ឋបាលយោធាក្រុងគៀវ លោកទីមួតេកាឆេនកូ ថ្លែងថា មនុស្ស៤នាក់ស្លាប់នៅក្រុងគៀវ និង៥១នាក់រងរបួស នាថ្ងៃទី២ មិថុនា ក្នុងការវាយប្រហាររបស់រុស្ស៊ីដោយមីស៊ីលបាលីស្ទិកលើសង្កាត់ជាច្រើននៃរដ្ឋធានីអ៊ុយក្រែន ។
ក្រោយការផ្ទុះគ្រាប់មីស៊ីលដ៏រង្គើរ ប្រជាជនបានរត់ទៅរកជម្រកការពារទាំងរុំភួយ។ ការវាយប្រហារនោះបណ្ដាលឲ្យមានផ្សែងខ្មៅខ្មួលហុយទៅលើអាកាស។ ប្រធានាធិបតីអ៊ុយក្រែនលោកវ៉ូឡូឌីមៀរហ្សេឡេនស្គីអះអាងនាពេលមុននេះថា រុស្ស៊ីរៀបចំការវាយប្រហារខ្លាំងក្លាថ្មីលើអ៊ុយក្រែន ខណៈក្រុងមូស្គូអំពាវនាវឲ្យបណ្ដាអ្នកការទូតបរទេសនាំគ្នាចាកចេញពីក្រុងគៀវ ។
ម្យ៉ាងវិញទៀត នៅក្រុងឌីនីប្រូភាគខាងកើតប្រទេស អាជ្ញាធររាយការណ៍ពីមនុស្សស្លាប់៥នាក់ និងរបួស២៥នាក់។ មនុស្ស១០នាក់ក៏រងរបួសដែរ នៅក្រុងខាគៀវដែលរងការវាយប្រហារដោយដ្រូន១៥គ្រឿង និងមីស៊ីល២គ្រាប់។
ខាងរុស្ស៊ីវិញ ជនស៊ីវិលម្នាក់បានត្រូវស្លាប់ កាលពីថ្ងៃទី១ មិថុនា នៅតំបន់គួរស្ក៍ជិតព្រំដែនក្នុងការវាយប្រហារមួយដោយដ្រូនអ៊ុយក្រែន។ ភ្លើងបានឆាបឆេះក្នុងរោងចក្រចម្រាញ់ប្រេងកាតអ៊ីលស្គីតំបន់ក្រាស្នូដា ភាគខាងត្បូងរុស្ស៊ី ក្នុងការវាយប្រហារដោយដ្រូន។
ក្នុងខែឧសភា កន្លងទៅរុស្ស៊ីប្រើដ្រូនរយៈឆ្ងាយដល់៨១៥០គ្រឿង វាយប្រហារអ៊ុយក្រែនត្រូវជា២៤% លើសកាលពីខែមេសា។ កាលពីពាក់កណ្ដាលខែឧសភា រុស្ស៊ីបានវាយប្រហារដ៏អាក្រក់បំផុតលើក្រុងគៀវ បណ្ដាលឲ្យមនុស្សស្លាប់ជាង២០នាក់ ៕
ចែករំលែកព័តមាននេះ