សម្តេចតេជោ៖ តំបន់បឹងកក់ បើមិនអភិវឌ្ឍដូចបច្ចុប្បន្នទេ នឹងក្លាយជាកន្លែងបញ្ចេញទឹកស្អុយ
- ភ្នំពេញ
រាជធានីភ្នំពេញ ៖ សម្ដេចតេជោ ហ៊ុន សែន ប្រមុខរដ្ឋស្ដីទីនៃកម្ពុជាបានលើកឡើងថា តំបន់បឹងកក់ បើមិនអភិវឌ្ឍដូចបច្ចុប្បន្នទេ នឹងក្លាយជាកន្លែងបញ្ចេញទឹកស្អុយ ចំណែកបឹងតាមោក ដែលអភិវឌ្ឍពេលនេះ ពីមុនមិនមែនជាកន្លែងស្តុកទឹកទេ គឺជាកន្លែងទឹកបុក តែពេលនេះ បានក្លាយទៅជាទីក្រុងមួយហើយ ។
ការលើកឡើងបែបនេះ ធ្វើឡើងក្នុងឱកាសដែលសម្ដេចតេជោ ហ៊ុន សែន អញ្ជើញចុះទស្សនកិច្ចនៅអគារទីស្នាក់ការកណ្តាលថ្មី នៃអគ្គនាយកដ្ឋានពន្ធដារ ស្ថិតនៅខណ្ឌជ្រោយចង្វា រាជធានីភ្នំពេញ នាព្រឹកថ្ងៃទី០២ ខែមិថុនា ឆ្នាំ២០២៦ ។
សម្ដេចតេជោ ហ៊ុន សែន បានបញ្ជាក់យ៉ាងដូច្នេះថា «បឹងកក់ បើសិនជាមិនអភិវឌ្ឍន៍សួរថា បឹងកក់ពេលនេះ ទៅជាអ្វី វាគ្រាន់តែជាកន្លែងបញ្ចេញទឹកស្អុយ ពេលនោះ មានអ្នកជេរខ្ញុំ មិនតិចទេ ប៉ុន្ដែឥលូវចេះនាំគ្នាថា ស្អាត» ។
ទន្ទឹមគ្នានេះ សម្តេចតេជោ ហ៊ុន សែន បានលើកឡើងថា ទីក្រុងភ្នំពេញសម័យដើមពីបុរាណមក គឺជាតំបន់ទឹកលិចទេ ប៉ុន្តែត្រូវបានសាងសង់ជាបណ្តើរៗ ដោយសម្តេចព្រះនរោត្តម សីហនុ ហើយសូម្បីតែផ្ទះសម្ដេច នៅវិមានឯករាជ្យ ម្ដុំហ្នឹង គឺជាបឹង និងព្រៃនោះដែរ។
សម្តេចតេជោ ហ៊ុន សែន ក៏បានលើកអំពីតំបន់ជ្រោយចង្វារ ដែលពីដើមជាកន្លែងដាំត្រកួន ព្រៃត្រែង ប៉ុន្តែឥឡូវទៅជាទីក្រុងមួយ ដែលអាចប្រជុំខ្នាតអន្តរជាតិបាន។ ជាមួយគ្នានោះដែរ សម្តេចតេជោបានថ្លែងថា បើសម្ដេចជានាយករដ្ឋមន្ត្រី សម្ដេចនឹងយកអគារថ្មីពន្ធដារដែលនៅក្នុងខណ្ឌជ្រោយចង្វារនេះ សម្រាប់កិច្ចប្រជុំអន្តរជាតិថែមទៀត ៕
ចែករំលែកព័តមាននេះ