ខេត្តបាត់ដំបង ៖ បុរសម្នាក់ដែលអះអាងថា ខ្លួនត្រូវពួកចោរភ្ជង់ប្លន់យកម៉ូតូកាលពី៣ថ្ងៃមុននោះ នៅព្រឹកថ្ងៃទី០៦ កញ្ញា នេះ ត្រូវបានប្រពន្ធនាំទៅកាន់ប៉ុស្ដិ៍នគរបាលរដ្ឋបាលភ្នំសំពៅ ស្រុកបាណន់ ដើម្បីសារភាពកំហុសដែលខ្លួនបានបង្កើតរឿងប្លន់នេះឡើងបានបង្កឱ្យមានចលាចល ដែលតាមពិតនោះ ខ្លួនយកទៅលក់ដើម្បីសងបំណុលគេសោះ ។ ជនបង្កចលាចលនេះ ឈ្មោះយឿត សុខយិន អាយុ៣៦ឆ្នាំ រស់នៅភូមិគរ ឃុំស្នឹង ស្រុកបាណន់ ។ សូមរំលឹកថា៖ ឈប់ម៉ូតូបត់ជើងម៉ាភ្លែត…ចោរភ្ជង់ប្លន់យកភ្លាម
បុរសនេះ បានសារភាពនៅចំពោះមុខមន្ត្រីនគរបាលប៉ុស្តិ៍សំពៅថា តាមពិត ខ្លួនបានយកម៉ូតូនោះទៅលក់ ដើម្បីយកលុយសងបំណុលគេ មិនមែនត្រូវចោរប្លន់ទេ ។ គាត់និយាយថា ខ្លួនបានចងការប្រាក់គេយកទៅធ្វើស្រែខាតឡុងចុង ហើយបំណុលនេះខ្លួនជំពាក់គេតាំងពីខ្លួននៅកម្លោះម្ល៉េះ ។ លុះដល់ថ្ងៃសងបំណុលនេះ ខ្លួនគ្មានលុយទើបសម្រេចយកម៉ូតូទៅលក់យកលុយសងគេ តែខ្លាចប្រពន្ធខឹងនិងស្ដីបន្ទោស ទើបខ្លួនបង្កើតរឿងថា ត្រូវចោរប្លន់យកម៉ូតូតែម្ដង ។ ប៉ុន្តែក្រោយពីឃើញសមត្ថកិច្ចមានការភ្ញាក់ផ្អើលរវល់នឹងរឿងនេះខ្លាំងពេក ទើបខ្លួនព្រមនិយាយការពិតប្រាប់ប្រពន្ធហើយប្រពន្ធ ក៏ជម្រុញឲ្យខ្លួនចូលសារភាព និងសូមការលើកលេងទោសពីសមត្ថកិច្ច ដែលខ្លួនបានប្រព្រឹត្តនូវកំហុសឆ្គងនេះ។
សូមបញ្ជាក់ថា ឈ្មោះយឿត សុខយិន បានបង្កើតព្រឹត្តិការចោរប្លន់ឡើង កាលពីល្ងាចថ្ងៃទី០៣ កញ្ញា នៅលើដងផ្លូវមួយកន្លែង ស្ថិតក្នុងភូមិភ្នំសំពៅកើត ឃុំភ្នំសំពៅ ស្រុកបាណន់ ។ បុរសនេះបានអះអាងថា ក្រុមចោរ២នាក់បានដកកូនកាំបិតភ្ជង់គំរាមខ្លួន ពេលខ្លួនកំពុងឈប់ម៉ូតូចុះបត់ជើតតូចនៅក្បែរផ្លូវ ហើយពួកចោរបានជិះម៉ូតូម្នាក់មួយគ្រឿងគេចខ្លួនដោយសុវត្ថិភាព។
លោកឧត្តមសេនីយ៍ត្រី ជេត វណ្ណនី ស្នងការរងខេត្តដែលបានចុះស្រាវជ្រាវលើករណីនេះផ្ទាល់បាននិយាយថា មន្ត្រីជំនាញបានចុះសួរនាំយ៉ាងជាក់លាក់បំផុត ក្រោយមានព្រឹត្តិការនេះឡើង ។ ប៉ុន្តែគ្មាសញ្ញាណាមួយដែលគួរឲ្យសង្ស័យថា មានបទល្មើសប្លន់នេះ បានកើតឡើងពិតប្រាកដ ។
លោកស្នងការរងបានបញ្ជាក់ថា មន្ត្រីជំនាញបានដាក់ការសង្ស័យតាំងពីដំបូងអំពីការភូតកុហក់របស់ឈ្មោះយឿត សុខយិន នេះ ពីព្រោះរាល់ចម្លើយរបស់ជននេះ ហាក់មិនស៊ីសង្វាក់គ្នាទៅនឹងការបំភ្លឺរបស់ក្រុមគ្រួសារនិងភរិយា ។ ប៉ុន្តែយ៉ាងណាបុរសនេះបានចូលសារភាពទូលកំហុសនៅចំពោះមុខសមត្ថកិច្ចហើយ។ (សម្រួលដោយ៖ ស្រីណា)
ចែករំលែកព័តមាននេះ