ខេត្តព្រះសីហនុ ៖ មន្ត្រីព័ត៌មានសាធារណៈ របស់កងទ័ពជើងទឹកកម្ពុជា បានឲ្យដឹងថា កាល
ពីវេលាម៉ោង៩និង២០នាទីព្រឹកថ្ងៃទី៥ ខែកញ្ញា នាវាចម្បាំកងទ័ពជើងទឹកឥណ្ឌាចំនួន២គ្រឿង បានចូលចតនៅកំពង់ផែក្រុងព្រះសីហនុ សម្រាប់ ដំណើរទស្សនកិច្ចជាមិត្តភាពនៅកម្ពុជាចំនួន៤ថ្ងៃ ។
នាវានេះ ចូលចតនៅកំពង់ផែក្រុងព្រះសីហនុ ចាប់ពីថ្ងៃទី៥ ដល់ថ្ងៃទី៨ ខែកញ្ញា ។ នៅថ្ងៃចូលចតនៅកំពង់ផែក្រុងព្រះសីហនុនេះ ទទួល បានការស្វាគមន៍យ៉ាងរាក់ទាក់ពីមន្ត្រីជាន់ខ្ពស់កងទ័ពជើងទឹកកម្ពុជាមូលដ្ឋានសមុទ្រ ។ សមត្ថកិច្ចចម្រុះ ព្រមទាំងអាជ្ញាធរនៃរដ្ឋបាលខេត្តព្រះសីហនុ ក៏មានវត្តមានក្នុងពិធីស្វាគមន៍នេះដែរ ។
តាមសេចក្តីប្រកាសព័ត៌មានរបស់កងទ័ពជើងទឹកកម្ពុជា បានឲ្យដឹងថា នាវាទាំង២គ្រឿង
ដែលចូលចតនេះមាន ៖
-នាវាឈ្មោះ INS KILTAN ជាប្រភេទនាវាប្រឆាំងនាវាមុជទឹក មានបណ្តោយ១១០
ម៉ែត្រ ទទឹង១២,៨ម៉ែត្រ ជម្រៅទឹក៧ម៉ែត្រ ទម្ងន់ផ្ទុក៣.១៥០តោន ។
-នាវាឈ្មោះ INS SAHYADRI ជាប្រភេទនាវាចម្បាំងបំពាក់មីស៊ីល មានបណ្តោយ១៤៣
ម៉ែត្រ ទទឹង១៧ម៉ែត្រ ជម្រៅទឹក៧ម៉ែត្រ ទម្ងន់ផ្ទុក៦.២០០តោន ។
នាវិកសរុបទាំងអស់មានចំនួន៥០៨នាក់ ហើយនាវាខាងលើនេះដឹកនាំដោយលោកវរនាវីឯក Ashwin Arvind ។
សេចក្តីប្រកាសព័ត៌មានដដែលបញ្ជាក់ថា ក្នុងអំឡុងពេលបំពេញទស្សនកិច្ចនៅកម្ពុជា មេ បញ្ជាការនាវាឥណ្ឌា នឹងមានជំនួបជាលក្ខណៈមិត្តភាពជាមួយថ្នាក់ដឹកនាំខេត្តព្រះសីហនុ ជួបជាមួយមេបញ្ជាការកងទព័ជើងទឹក និងមានកម្មវិធីកិច្ចសហប្រតិបត្តិការមួយចំនួនទៀត រវាងកងទព័ជើងទឹកកម្ពុជានិងកងនាវិកនាវាខាងលើនេះផងដែរ ។
យោងតាមប្រកាសព័ត៌មានរបស់ស្ថានទូតឥណ្ឌាប្រចាំនៅកម្ពុជា បានឲ្យដឹងថា នាវាកងទ័ពជើងទឹកឥណ្ឌា INS SAHYADRI បញ្ជាដោយលោកមេបញ្ជាការ Capt Ashwin Arvind និងវានា INS KILTAN បញ្ជាដោយលោក Cdr Ginto George Chacko នឹងធ្វើដំណើរតាមកំពង់ផែនៅក្រុងព្រះសីហនុ ចាប់ពីថ្ងៃទី ០៥-០៨ ខែកញ្ញាឆ្នាំ ២០១៩ ។ ទស្សនកិច្ចនៃនាវាចម្បាំងកងទ័ពជើងទឹកឥណ្ឌានាពេលនេះ ជាផ្នែកមួយនៃដំណើរទស្សនកិច្ចសុច្ឆន្ទៈរបស់កងទ័ពជើងទឹកឥណ្ឌាទៅកាន់តំបន់ អាស៊ីអាគ្នេយ៍។
ប្រកាសព័ត៌មានដដែលបានបញ្ជាក់ថា ទំនាក់ទំនងទ្វេភាគីរវាងឥណ្ឌានិងកម្ពុជាមានភាពរឹងមាំជាមួយនឹងទំនាក់ទំនងវប្បធម៌ សាសនា និងសេដ្ឋកិច្ច។ ទំនាក់ទំនងឥណ្ឌា- កម្ពុជាត្រូវបានពង្រឹងក្នុងប៉ុន្មានឆ្នាំថ្មីៗនេះ ដោយសារមានការចូលរួមកាន់តែច្រើនឡើងលើគ្រប់វិស័យ។ ជាក់ស្តែង កាលពីឆ្នាំមុន គេក៏បានឃើញការធ្វើទស្សនកិច្ចទ្វេភាគីដ៏លេចធ្លោមួយចំនួនដែលចាប់ផ្តើមពីដំណើរទស្សនកិច្ចផ្លូវរដ្ឋរបស់នាយករដ្ឋមន្ត្រីកម្ពុជា សម្តេចតេជោ ហ៊ុន សែន ទៅប្រទេសឥណ្ឌាកាលពីខែមករាឆ្នាំ ២០១៨ ហើយសម្តេច ក៏បានធ្វើជាភ្ញៀវកិត្តិយសនៅក្នុងពិធី Republic Day Parade ឆ្នាំ ២០១៨ និងបានចូលរួមក្នុងកិច្ចប្រជុំកំពូលរំលឹកអាស៊ាន – ឥណ្ឌា។ ទំនាក់ទំនងដ៏សំខាន់រវាងឥណ្ឌានិងកម្ពុជាគឺមានខ្ពស់គ្រប់ពេលវេលា។
ប្រកាសព័ត៌មានដដែលបានបញ្ជាក់ថា «ដំណើរទស្សនកិច្ចតាមនាវានាពេលបច្ចុប្បន្ននេះស្វែងរកការពង្រឹងកិច្ចសហប្រតិបត្តិការតាមសមុទ្ររវាងកងទ័ពជើងទឹកទាំងពីរ។ ប្រការនេះនឹងជំរុញថែមទៀតនូវចំណងមិត្តភាពរវាងប្រទេសទាំងពីរ និងរួមចំណែកដល់សន្តិសុខនិងស្ថេរភាពនៅក្នុងតំបន់និងពិភពលោកទាំងមូល» ៕ (កែសម្រួលដោយ ៖ បុប្ផា)
ចែករំលែកព័តមាននេះ