ប្រទេសអ៊ុយក្រែន កាលពីថ្ងៃទី១៥ មីនា បានចោទប្រកាន់ប្រទេសរុស្ស៊ីថា លុកលុយខាងយោធា ហើយបានគំរាមឆ្លើយតបវិញតាមគ្រប់មធ្យោបាយ ក្រោយប្រតិបត្ដិការមួយរបស់កងទ័ពបរុស្ស៊ីហួសពីព្រំដែនតំបន់គ្រីមេ ពេលការបោះប្រជាមតិផ្ដាច់ខ្លួនរបស់តំបន់នោះចូលជាមួយរុស្ស៊ីឈានមកដល់ ។
ការចោទប្រកាន់របស់អ៊ុយក្រែនធ្វើឡើងក្រោយការមកដល់ភូមិមួយរបស់កងទាហាន ឧទ្ធម្ភាគចក្រនិងរថពាសដែករុស្ស៊ីជាច្រើន ។ ភូមិនោះជាភូមិមួយស្ថិតនៅខាងជើងព្រំដែនរដ្ឋបាលរវាងតំបន់គ្រីមេនិងអ៊ុយក្រែនដែនគោក ។
នេះពុំមែនជាទីតាំងដំបូងមួយកាន់កាប់ដោយកងទ័ពរុស្ស៊ីនៅក្រៅតំបន់គ្រីមេឡើយរួចភូមិនោះក៏ពុំមែនជាភូមិយុទ្ធសាស្រ្ដមួយដែរ ។ ចំណែកក្រុងវ៉ាស៊ីនតោនបានបង្ហាញប្រតិកម្មភ្លាមៗចំពោះព័ត៌មាននេះ ។ លោកស្រីឯកអគ្គរដ្ឋទូតអាមេរិកប្រចាំអ.ស.ប ថ្លែងថា ការរុលទៅមុខរបស់រុស្ស៊ីចូលក្នុងភាគខាងត្បូងអ៊ុយក្រែន ជាការបង្កើនភាពតានតឹងដ៏អាស្រូវមួយ ។ បណ្ដាការិយាល័យបោះឆ្នោតគ្រីមេបានបើកចាប់ពីម៉ោង៧ព្រឹកម៉ោងនៅស្រុកបារាំងទៅ ។ អ្នកបោះឆ្នោតគ្រីមេ១,៥លាននាក់ទៅបោះប្រជាមតិនាថ្ងៃទី១៦ មីនាលើការផ្ដាច់ខ្លួនរបស់តំបន់នេះចូលជាមួយរុស្ស៊ី ដែលលទ្ធផលនៃការបោះប្រជាមតិនេះត្រូវប្រកាសក្រោយបិទការិយាល័យបោះឆ្នោតនាវេលាល្ងាច ហើយលទ្ធផលជាស្ថាពរប្រកាសនាព្រឹកថ្ងៃទី១៧ មីនា ។
សហគមន៍អន្ដរជាតិ យល់ថាការបោះប្រជាមតិនោះគឺខុសច្បាប់ហើយផ្ទុយនឹងរដ្ឋធម្មនុញ្ញ ។ ក៏ប៉ុន្ដែសហគមន៍អន្ដរជាតិមានចំណុចខ្សោយដែលបង្ហាញឱ្យឃើញជាថ្មីម្ដងទៀតកាលពីថ្ងៃទី១៥ មីនា នៅអ.ស.ប ។ ដំណោះស្រាយបែបកណ្ដាលមួយរបស់ក្រុមប្រឹក្សាសន្ដិសុខ អ.ស.ប ដែលបរិហារការបោះប្រជាមតិនោះរៀបរៀងឡើងដោយសហរដ្ឋអាមេរិកត្រូវរាំងខ្ទប់ដោយសារការប្រើវេតូ របស់រុស្សុី ហើយចិនបោះឆ្នោតអនុបវាទ ។
ចំណែកនៅក្រុងមូស្គូ ឯណោះវិញ កាលពីថ្ងៃទី១៥ មីនា មានបាតុកម្មធំ២ ដោយបាតុកម្មមួយគាំទ្រប្រធានាធិបតីរុស្សុី ហើយបាតុកម្មមួយទៀតបរិហារនយោបាយរបស់លោកវ៉្លាឌីមៀរពូទីននៅអ៊ុយក្រែន ។ ពួកបាតុកម្មប្រឆាំងមានគ្នាប្រមាណជា៣.០០០នាក់ ក៏ប៉ុន្ដែប្រជាជនរុស្ស៊ីភាគច្រើនគាំទ្រសកម្មភាពរបស់លោកពូទីន ហើយចាត់ទុកឧបទ្វីបគ្រីមេថាជាដែនដីរុស្ស៊ី ។ ក៏មានប្រជាជនរុស្សុីមួយចំនួនខ្លាចផ្ទុះសង្គ្រាមមួយជាមួយអ៊ុយក្រែនជិតខាងដែរ ៕
ចែករំលែកព័តមាននេះ