ធនាគារកណ្ដាលចិនកាលពីថ្ងៃសៅរ៍បានបង្កើនកម្រិតដោះដូររូបិយប័ណ្ណយន់ដល់២%ដោយបន្ធូរបន្ថយកណ្ដាប់ដៃរបស់ខ្លួនលើរូបិយប័ណ្ណដែលធ្លាប់តែគ្រប់គ្រងយ៉ាងតឹងរ៉ឹង ហើយប្រឹងប្រែងបង្កើនកំណែទម្រង់អត្រាប្ដូរប្រាក់នៅគ្រាដែលមានក្ដីបារម្ភកើនឡើងពីការធ្លាក់ចុះសេដ្ឋកិច្ច ។ វិធានការនេះនឹងចូលជាធរមាននៅថ្ងៃចន្ទ ទី១៧ មីនា ។ ធនាគារកណ្ដាលសម្រេចយ៉ាងដូច្នេះក្រោយពីមានសម្ពាធអន្តរជាតិជាច្រើនឆ្នាំមកលើរដ្ឋធានីប៉េកាំងក្នុងការជំរុញឱ្យប្រាក់យន់ឡើងថ្លៃយ៉ាងខ្លាំងឆាប់រហ័ស ។
ការផ្លាស់ប្ដូរដែលបានធ្វើឡើងនាពេលនេះគឺបន្ទាប់ពីវិធានការរបស់ទីក្រុងប៉េកាំងកាលពីខែមេសា ឆ្នាំ២០១២ បានបង្កើនកម្រិតដោះដូរដល់១% ហើយត្រូវបានក្រុមអ្នកវិភាគជាច្រើនយល់ឃើញថា ជាការបោះជំហានដ៏សំខាន់មួយបង្កើតប្រព័ន្ធដោះដូរដែលផ្អែកលើទីផ្សារ ។
រហូតមកដល់ពេលនេះគណបក្សកុំម្មុយនីស្ដចិនបានរក្សាកណ្ដាប់ដៃយ៉ាងតឹងរ៉ឹងលើប្រាក់យន់ ក្នុងនាមជាឧបករណ៍ដ៏សំខាន់ដើម្បីគ្រប់គ្រងសេដ្ឋកិច្ច ហើយដោយសារក្ដីបារម្ភពីលំហូរចូលនិងលំហូរចេញហិរញ្ញវត្ថុដែលមិនអាចស្មានទុកជាមុនបាន ។
សេចក្ដីប្រកាសកាលពីថ្ងៃសៅរ៍ កើតមានឡើងបន្ទាប់ពីធនាគារកណ្ដាលបានទម្លាក់ថ្លៃរូបិយប័ណ្ណយន់កាលពីប៉ុន្មានសប្ដាហ៍ថ្មីៗនេះ ក្នុងកិច្ចប្រឹងប្រែងដើម្បីបង្អាក់ក្រុមឈ្មួញដែលទិញទុកយកចំណេញមុនពេលការបង្កើនការប្រាក់ និងបន្ទាប់ពីរបាយការណ៍កាលពីខែមុនដែលថា ខ្លួនស្វះស្វែងបង្កើនកម្រិតដោះដូរតាមទិសដៅគោលនយោបាយ ។
ធនាគារកណ្ដាលបាននិយាយក្នុងរបាយការណ៍កាលពីថ្ងៃសៅរ៍ថា ដើម្បីបំពេញតាមតម្រូវការនៃការអភិវឌ្ឍទីផ្សារ បង្កើនសន្ទុះនៃអត្រាប្ដូរប្រាក់ដែលផ្អែកលើទីផ្សារ និងបង្កើតរបបអត្រាប្ដូរប្រាក់អណ្ដែត និងផ្អែកលើទីផ្សារ ធនាគារកណ្ដាលចិនបានសម្រេចពង្រីកកម្រិតអណ្ដែតនៃប្រាក់យន់ធៀបនឹងប្រាក់ដុល្លារអាមេរិក ។ មិនតែប៉ុណ្ណោះធនាគារនឹងអភិវឌ្ឍន៍បន្ថែមនូវតួនាទីរបស់ទីផ្សារនៅក្នុងយន្តការបង្កើតអត្រាប្ដូរប្រាក់យន់ ។
លោកផូល ម៉ាកគែល ( Paul Mackel )ប្រធានផ្នែកស្រាវជ្រាវរូបិប័ណ្ណអាស៊ីរបស់ធនាគារHSBC Holdings បានប្រាប់សារព័ត៌មានDow Jones Newswires ថា ក្នុងការពង្រីកកម្រិតដោះដូររូបិយប័ណ្ណ អាជ្ញាធរចិនត្រូវតែដឹងថាសេដ្ឋកិច្ចគឺស្ថិតនៅក្នុងទីតាំងមួយរឹងមាំគ្រប់គ្រាន់ដើម្បីដោះស្រាយការសម្របសម្រួលនិងកំណែទម្រង់ដែលអាចទៅរួចផ្សេងទៀតនាពេលខាងមុខ ។
ផលិតផលក្នុងស្រុកសរុបរបស់ចិនបានកើនឡើង៧,៧% កាលពីឆ្នាំ២០១៣ ដែលជាកម្រិតមួយទាបបំផុតចាប់តាំងពីឆ្នាំ១៩៩៩ មកហើយកាលពីដើមខែនេះ ទីក្រុងប៉េកាំងបានប្រកាសថា ខ្លួនកំពុងកំណត់ទិសដៅកំណើនប្រហែល៧,៥%នៅក្នុងឆ្នាំ២០១៤ នេះ ពោលគឺជាទិសដៅដែលប្រហាក់ប្រហែលគ្នានឹងឆ្នាំ២០១៣ដែរ ៕
ចែករំលែកព័តមាននេះ