អ្នកទទួលខុសត្រូវម្នាក់គូសបញ្ជាក់កាលពីថ្ងៃទី១៥ មីនា ថា មនុស្ស១០នាក់បានត្រូវស្លាប់រយៈពេល៤៨ម៉ោងចុងក្រោយនេះ ក្នុងអំពើហិង្សាសហគមន៍នៅក្រុងទ្រីប៉ូលី ភាគ ខាងជើងលីបង់ ដែលអំពើហិង្សាទាំងនោះទាក់ទិនដល់ជម្លោះនៅប្រទេសស៊ីរី ជិតខាង ។
បណ្តាសាលារៀនត្រូវបិទទ្វារកាលពីថ្ងៃទី១៥ មីនា នៅក្រុងកំពង់ផែនេះ ហើយការធ្វើចរាចរណ៍មានស្តួចស្តើង មកពីអំពើហិង្សា ។ ការបាញ់តគ្នាយ៉ាងខ្លាំងកើតមានកាលពីថ្ងៃទី១៤ មីនា ហើយបន្តដល់ថ្ងៃទី១៥ មីនា រវាងប្រជាជននៃសង្កាត់ JABAL MOHSEN របស់ពួកអាឡាហ្វីត និងប្រជាជននៃសង្កាត់ពួកស៊ុននីត BAB AL-TEBBANE ជាសង្កាត់២ ដែលតែងប្រទូស្តរ៉ាយគ្នា ព្រោះមនុស្សនៃសង្កាត់ JABAL MOHSEN គាំទ្ររបបប្រធានាធិបតីស៊ីរី លោកបាចា អាល់អាសាដ ហើយសង្កាត់មួយទៀតគាំទ្រពួកឧទ្ទាមស៊ីរី ។
នាថ្ងៃទី១៥ មីនា មនុស្ស៣នាក់បានត្រូវស្លាប់ដោយសារខ្មាន់កាំភ្លើងដៃត្រង់ ហើយមនុស្ស៣នាក់ទៀតក្រោយមកក៏ត្រូវស្លាប់ ព្រោះរបួសធ្ងន់ពេកដែរ ។ ម្យ៉ាងទៀត ទាហាន៣នាក់ត្រូវរបួសដោយសារការបាញ់គ្រាប់រ៉ុក្កែត។ កងទ័ពលីបង់ បន្តចាប់ខ្លួនមនុស្សជាច្រើននាក់ពេលមានការឆែកឆេរពេលយប់ ហើយតបតវិញចំពោះការបាញ់ប្រហារ ។
ការប៉ះទង្គិចគ្នាដោយគ្រាប់រ៉ុក្កែត និងដោយកាំភ្លើងស្វ័យប្រវត្តិ ផ្ទុះឡើងរវាងសង្កាត់ទាំង២ ក្រោយជនស៊ុននីតម្នាក់ត្រូវបាញ់សម្លាប់ចំទ្រូងចំនួន៤គ្រាប់ ដោយជនបិទមុខ២នាក់ ជិះម៉ូតូ១គ្រឿងនៅកណ្តាលក្រុងទ្រីប៉ូលី ៕
ចែករំលែកព័តមាននេះ