ជនប្រដាប់អាវុធ២នាក់ កាលពីថ្ងៃទី១៥ មីនា បានសម្លាប់ទាហានអេហ្ស៊ីប៦នាក់នៅទីក្រុងគែរ ខណៈដែលកងកម្លាំងសន្តិសុខអេហ្ស៊ីបក្លាយជាគោលដៅសំខាន់នៃការវាយប្រហារ ចាប់តាំងពីការផ្តួលរំលំប្រធានាធិបតីអ៊ិស្លាមនិយម លោកម៉ូហាម៉េដ ម័រស៊ី ដោយកងទ័ព មក ។
ការវាយប្រហារនោះដែលត្រូវបានកងទ័ពទម្លាក់ការទទួលខុសត្រូវលើក្រុមបងប្អូនអ៊ិស្លាមជាចលនារបស់ប្រមុខរដ្ឋត្រូវផ្តួលរំលំ កើតមាន២ថ្ងៃ ក្រោយពីការវាយប្រហារមួយមុននេះបណ្តាលឱ្យទាហានម្នាក់ស្លាប់នៅរដ្ឋធានីអេហ្ស៊ីបមក ។
ចាប់តាំងពីកងទ័ពផ្តួលរំលំលោក ម័រ ស៊ីហើយចាប់ខ្លួនលោកពីខែកក្កដាមក ពួកបះបោរមានមូលដ្ឋាននៅតំបន់ស៊ីណៃអីុ បានបង្កើនការវាយប្រហារប្រឆាំងកងទាហាននិងប៉ូលិស ដោយសម្លាប់ទាហាននិងប៉ូលិសជាង២០០នាក់ ហើយ ។
ទាហាន៦នាក់ដែលត្រូវសម្លាប់ កាលពីថ្ងៃទី១៥ មីនា រងការបាញ់ប្រហារនៅតំបន់ជាយក្រុងមួយនាភាគខាងជើងទីក្រុងគែរគឺតំបន់ CHOUBRA AL-KHIMA ដោយពួកអ្នកវាយប្រហារប្រដាប់អាវុធក៏ដាក់គ្រាប់បែក២គ្រាប់បំណងឱ្យផ្ទុះពេលពួកអ្នកជួយសង្គ្រោះលើកគ្នាមកដល់ ។ ពេលរងការវាយប្រហារទាហានទាំងនោះកំពុងតែនាំគ្នាសូត្រធម៌នៅត្រង់ចំណុចត្រួតពិនិត្យមួយ ។
ក្រុមប្រឹក្សាការពារជាតិអេហ្ស៊ីបដឹកនាំដោយប្រធានាធិបតីស្តីទីលោក អាដលី ម៉ាន់សួរ បានសន្យាធ្វើការសងសឹកឱ្យទាហានទាំងនោះ ចំណែកនាយករដ្ឋមន្ត្រីលោកអីុប្រាហ៊ីម ម៉ាហ៍ឡាប បានកោះប្រជុំគណៈរដ្ឋមន្ត្រីជាវិសាមញ្ញមួយដើម្បីពិភាក្សាលើចម្លើយតបវិញចំពោះការវាយប្រហារនេះ ៕
ចែករំលែកព័តមាននេះ