រាជធានីភ្នំពេញ ៖ កម្មករ៣នាក់ ដែលបម្រើការនៅក្រុមហ៊ុនឃ្លាំងស្តុកកុងតឺន័រ បានរងរបួសធ្ងន់ខណៈពេលកំពុងបំពេញការងារ ត្រូវរថយន្តស្ទូចកុងតឺន័រដឹកទំនិញមួយគ្រឿង បាក់ជើងទ្រក្រឡាប់សង្កត់លើកាលពីវេលាម៉ោង១១ព្រឹកថ្ងៃទី១៤ មីនា ។ ទីតាំងឃ្លាំងខាងលើនេះស្ថិតនៅតាមបណ្តោយវិថីព្រះមុនីរ៉េត ភូមិឫស្សី សង្កាត់ស្ទឹងមានជ័យ ខណ្ឌមានជ័យ ។
យោងតាមប្រភពព័ត៌មានពីអាជ្ញាធរមូលដ្ឋានដែលចុះទៅអន្តរាគមន៍បានឱ្យដឹងថា មុនពេលកើតហេតុក្រុមកម្មករទាំងអស់ដែលបម្រើការងារនៅក្នុងឃ្លាំងខាងលើបានចុះបំពេញការងារតាមជំនាញរៀងៗខ្លួន ។ លុះដល់ម៉ោងប្រមាណ១១ព្រឹកបុរសម្នាក់ជាអ្នកបើកបររថយន្តស្ទូចបានស្ទូចទូកុងតឺន័រចេញពីរថយន្តបំណងរកកន្លែងដាក់ក្នុងឃ្លាំង ប៉ុន្តែពេលបង្វិលរថយន្តស្ទូចរកទិសដៅដាក់ទូកុងតឺន័រចុះ ស្រាប់តែអកុសលជើងទម្ររថយន្តស្ទូចម្ខាងបានបាក់បណ្តាលឱ្យរថយន្តផ្អៀងក្រឡាប់ផ្ងារជើងច្រងាង សង្កត់ទៅលើស្ត្រីម្នាក់ និងបុរស២នាក់ដែលជាកម្មកររងរបួសធ្ងន់ ហើយដងស្ទូចរថយន្តបានបាក់កិនពីលើទូកុងតឺន័រ និងសង្កត់បាក់របង កិនខ្ទេចរថយន្តមួយគ្រឿងដែលចតជាប់របងឃ្លាំងនោះ ។
ប្រភពដដែលបន្តថា ក្រោយកើតហេតុក្រុមកម្មករទាំងអស់បានសហការគ្នាជួយលើកជនរងគ្រោះទាំង៣នាក់ ដឹកយកទៅសង្គ្រោះបន្ទាន់នៅមន្ទីរពេទ្យមិត្តភាពខ្មែរ-សូវៀត ។ ភ្លាមៗនោះដែរ លោកសេង សាញ់ ចៅសង្កាត់ស្ទឹងមានជ័យ បានដឹកនាំកម្លាំងចុះពិនិត្យជាក់ស្តែង និងហៅតំណាងក្រុមហ៊ុនឃ្លាំងខាងលើនេះមកសាកសួរពីបញ្ហាដែលនាំឱ្យកើតមានគ្រោះថ្នាក់កើតឡើង ។
តំណាងក្រុមហ៊ុនបានបញ្ជាក់ថា ចំពោះឧបទ្ទវហេតុនេះមិនដែលកើតមាននៅក្នុងឃ្លាំងនេះទេ វាជាលើកទី១ ហើយដែលបណ្តាលឱ្យមនុស្ស៣នាក់ រងរបួស បែបនេះ ដោយសារជើងទម្ររបស់រថយន្តស្ទូចមានបញ្ហា ។ ចំពោះអ្នករងរបួសទាំង៣នាក់ខាងលើក្រុមហ៊ុននឹងទទួលខុសត្រូវចេញថ្លៃព្យាបាលរបួសទាំងស្រុងនិងសងជំងឺចិត្តឱ្យបានស័ក្តិសម ។ ទាក់ទិននឹងករណីនេះសមត្ថកិច្ចនិងអាជ្ញាធរមូលដ្ឋានសន្និដ្ឋានថា បង្កឡើងដោយសារការធ្វេសប្រហែសរបស់ក្រុមហ៊ុន និងខ្វះបច្ចេកទេស ដូច្នេះអាជ្ញាធរស្នើឱ្យតំណាងក្រុមហ៊ុនត្រូវធ្វើយ៉ាងណាគិតគូរ និងពិនិត្យឡើងវិញរាល់ការអនុវត្តការងារឱ្យមានសុវត្ថិភាពចៀសវាងមានបញ្ហាបណ្តាលឱ្យមនុស្សរងរបួសបែបនេះទៀត ។ ជនរងគ្រោះទាំង៣នាក់ខាងលើនៅមិនទាន់ស្គាល់អត្តសញ្ញាណនៅឡើយទេព្រោះក្រោយកើតហេតុរថយន្តសង្គ្រោះបានមកដឹកយកទៅមន្ទីរ
ពេទ្យភ្លាមៗ ៕
ចែករំលែកព័តមាននេះ