ខេត្តស្ទឹងត្រែង ៖ ខណៈភ្លៀងនៅបន្តធ្លាក់ជារៀងរាល់ថ្ងៃរយៈពេលជាង១សប្តាហ៍ធ្វើឱ្យ ទន្លេទាំង៣ នៅខេត្តស្ទឹងត្រែងហក់ឡើងដល់កំរិតប្រកាសអាសន្នក្នុងនោះមានទន្លេ សេសាន សេកុង និងអាងទន្លេមេគង្គ ដែលឡើងខ្ពស់លើសកំរិតប្រកាសអាសន្ន ។
ស្ថានភាពទឹកទន្លេបន្តហក់ឡើង បង្កការលិចលុងនៅស្រុក១ចំនួនដូចជា ស្រុកសេសាន ស្រុកសៀបបូក ដែលទឹកបានហូរចូលពេញអូរនានា និងហូរចូលភូមិ១ចំនួន នៅតាមមាត់ទន្លេជាបណ្តើរៗ ។
អាជ្ញាធរខេត្តដឹកនាំដោយ លោកម៉ុម សារឿន អភិបាលនៃគណៈអភិបាលខេត្ត កងកម្លាំងប្រដាប់អាវុធគ្រប់ប្រភេទចុះពិនិត្យលើផ្ទៃទឹកទន្លេ នាព្រឹកថ្ងៃទី០៤ ខែកញ្ញា ឆ្នាំ២០១៩ បន្ទាប់ពីទឹកបានឡើងហូរចូលតាមភូមិនីមួយជាប់នឹងមាត់ទន្លេ ។
លោកប៉ាង ប៉េង ប្រធានមន្ទីរធនធានទឹក និងឧតុនិយមបានឱ្យដឹងនាព្រឹកថ្ងៃទី០៤ ខែកញ្ញា ឆ្នាំ២០១៩នេះថា ស្ថានភាពទឹកទន្លេនាពេលបច្ចុប្បន្ន គឺកំពុងធ្វើឱ្យមានការព្រួយបារម្ភ អាចបង្កឱ្យលិចចូលតាមស្រុកដែលនៅជាប់ និងទន្លេទាំង៣ ក្នុងនោះមានក្រុងស្ទឹងត្រែង ទឹកបានហូរចូលពេញអូរនានា និងចាប់ផ្តើមលិចមុនគេនៅភូមិស្ពានថ្ម សង្កាត់ស្ទឹងត្រែង ក្រុងស្ទឹងត្រែង ដែលជាភូមិសាស្ត្រទាបជាងគេ ។
លោកប៉ាង ប៉េង បន្តឱ្យដឹងទៀតថា ខណៈទឹកចាប់ផ្តើមហូរចូលក្រុងស្ទឹងត្រែង មន្ត្រីនៃមន្ទីរធនធានទឹករៀបចំបូមទឹកចេញពីក្រុងចាក់មកទន្លេវិញដែលនៅក្រុង ស្ទឹងត្រែងមានស្ថានីយ៍បូមទឹកចំនួន៤កន្លែងបានដំឡើងរួចជាស្រេច កាលពីឆ្នាំ២០១៨ កន្លងទៅ ។
លោកប្រធានមន្ទីរបន្តទៀតថា ខេត្តស្ទឹងត្រែងអាចនឹងលិចទឹក ខណៈព្យុះបន្តបោក បក់នៅប្រទេសជិតខាង ហើយវាមានឥទ្ធិពលបង្កជាទឹកភ្លៀងហូរមកខេត្តស្ទឹងត្រែងក្នុង ល្បឿនលឿនរងផលប៉ះពាល់ជន់លិចតាមបណ្តាស្រុកដែលជាប់មាត់ទន្លេ ។ ដែលកម្ពុជា នាពេលបច្ចុប្បន្នទើបទទួលឥទ្ធិពលព្យុះទី១៣ប៉ុណ្ណោះ ដែលមានព្យុះបោកបក់សរុបចំនួន ២៧ ទៅ២៨ព្យុះ ។
លោកម៉ែន កុង អ្នកនាំពាក្យរដ្ឋបាលខេត្តស្ទឹងត្រែងបានឱ្យដឹងថា អាជ្ញាធរខេត្ត និងកម្លាំងប្រដាប់អាវុធគ្រប់ប្រភេទត្រៀមលក្ខណៈរួចជាស្រេច ដើម្បីជួយសង្ក្រោះប្រជា ពលរដ្ឋដែលរងផលប៉ះពាល់ដោយគ្រោះធម្មជាតិទឹកជំនន់ និងនាំប្រជាពលរដ្ឋរកកន្លែងទី ទួលសុវត្ថិភាព ហើយក្នុងស្ថានភាពទឹកទន្លេកំពុងតែចាប់ហូរចូលតាមទីលំនៅឋាននានា លោកអភិបាលខេត្តបានដឹកនាំមន្ត្រីពាក់ព័ន្ធចុះពិនិត្យស្ថានភាពជាក់ស្តែង ដើម្បីឱ្យដឹងពី ភូមិសាស្ត្រនៃទឹកជំនន់ ។
អាជ្ញាធរស្រុកសេសានបានប្រកាសថា ទ្វារទឹកទំនប់វារីអគ្គីសនីសេសានក្រោម២ ចំនួន១០ទ្វារបានបើកលំហូរទឹកចេញដែលមានកម្ពស់ទឹក១ម៉ែត្រ ហើយបរិមាណទឹក ដែលហូរទៅចំនុចប្រសព្វខាងក្រោម គឺ3278ម៉ែត្រគូបក្នុង១វិនាទី ។
គួរបញ្ជាក់ថា ១-ទន្លេមេគង្គ ៖ (ប្រកាស.១០.៧០ម) នាព្រឹកថ្ងៃទី០៤ ខែកញ្ញា ទឹកឡើងដល់ ១០ម៉ែត្រ៨២ លើសកំរិតប្រកាសអាសន្ន ២-ទន្លេសេសាន ៖ (កំរិតប្រកាសអាសន្ន ១០.៥០ម) នាព្រឹកថ្ងៃទី០៤ ខែកញ្ញា ទឹកឡើងដល់៩ម៉ែត្រ ២-ទន្លេសេកុង ៖ (កំរិតប្រកាសអាសន្ន១១.៥០ម) នាព្រឹកថ្ងៃទី០៤ ខែកញ្ញា ទឹកឡើងដល់១១ម៉ែត្រ ដោយ ឡែកស្ថានភាពកម្ពស់ទឹកនៅវារីសេសានក្រោម២ (ប្រកាសប្រុងប្រយ័ត្ន៧៥ម) ហើយ ទឹកបានហក់ឡើងដល់៧៥ម៉ែត្រ៣១ ៕ កែសម្រួលដោយ ៖ សុឃាក់
ចែករំលែកព័តមាននេះ