ខេត្តកំពង់ឆ្នាំង ៖ ក្រុមអាជីវករកាប់ជ្រូក គោ ក្របីជាច្រើននាក់ដែលប្រកបអាជីវកម្មតាមស្រុក និងក្រុងបានត្អូញត្អែពីការគាបសង្កត់របស់មន្ត្រីពេទ្យសត្វ និងម្ចាស់ទីសត្វឃាតថា បានគាបសង្កត់យកលុយពីការកាប់សត្វខាងលើលើសការកំណត់ និងការលក់ច្បាប់អាជីវកម្ម ព្រមជាមួយនឹងរឿងរ៉ាវជាច្រើនទៀតដែលអង្គភាពពេទ្យសត្វមួយនេះបានធ្វើខុសពីតួនាទីរបស់ខ្លួន។
ខេត្តកំពង់ឆ្នាំង ៖ ក្រុមអាជីវករកាប់ជ្រូក គោ ក្របីជាច្រើននាក់ដែលប្រកបអាជីវកម្មតាមស្រុក និងក្រុងបានត្អូញត្អែពីការគាបសង្កត់របស់មន្ត្រីពេទ្យសត្វ និងម្ចាស់ទីសត្វឃាតថា បានគាបសង្កត់យកលុយពីការកាប់សត្វខាងលើលើសការកំណត់ និងការលក់ច្បាប់អាជីវកម្ម ព្រមជាមួយនឹងរឿងរ៉ាវជាច្រើនទៀតដែលអង្គភាពពេទ្យសត្វមួយនេះបានធ្វើខុសពីតួនាទីរបស់ខ្លួន។
ក្រុមអាជីវករកាប់សត្វទាំងនោះបាននិយាយថា ក្នុងប្រកាសក្រសួងហិរញ្ញវត្ថុឱ្យយកតម្លៃជ្រូក១ក្បាលតម្រូវយកតែ១.៥០០រៀលប៉ុណ្ណោះ តែមន្ត្រីពេទ្យតាមស្រុក និងក្រុងយក៣.០០០រៀល និងម្ចាស់ទីសត្វឃាត(ម្ចាស់ឡ) យកតម្លៃ៥ពាន់រៀលក្នុង១ក្បាលបូកជាមួយពន្ធ និងអនាម័យ។ សម្រាប់គោ ក្របី១ក្បាលយកតម្លៃតែ២.០០០រៀលទេ តែមន្ត្រីពេទ្យសត្វយកដល់ទៅ៤.០០០រៀល និងម្ចាស់ទីសត្វឃាតយក៨.៥០០រៀលបន្ថែមទៀត។
ប្រភពដដែលបានបន្តថា នេះជារឿងមន្ត្រីពេទ្យសត្វយកលើសតម្លៃកំណត់របស់ក្រសួង។ នៅមានរឿងមួយទៀត ខាងមន្ត្រីពេទ្យសត្វខេត្តបានលក់ច្បាប់ឱ្យអាជីវករឆ្នាំថ្មីនេះក្នុងមួយច្បាប់តម្លៃ៥ម៉ឺនរៀលសួរថា តើយកលុយនេះទៅណា ? ព្រោះការលក់ច្បាប់ធ្វើអាជីវកម្មជាភារកិច្ចរបស់មន្ទីរហិរញ្ញវត្ថុ។
ដោយឡែកសម្រាប់អ្នកម៉ៅការ ឬអ្នកដែលដេញថ្លៃបានធ្វើទីសត្វឃាត(ឡពិឃាតសត្វ) គ្រប់ស្រុក ក្រុងបានផុតកំណត់នៅថ្ងៃទី៣១ ធ្នូ ២០១៣ ទៅហើយ ចុះហេតុអ្វីមកដល់ពេលនេះពាក់កណ្តាលខែមីនាទៅហើយ អ្នកម៉ៅការទាំងនោះនៅតែបន្តធ្វើអាជីវកម្មបានទៀត។
ជុំវិញករណីខាងលើនេះ លោកឈ កែវ ប្រធានពេទ្យសត្វស្រុកកំពង់ត្រឡាចបាននិយាយប្រាប់តាមទូរស័ព្ទថា ចំពោះច្បាប់ថ្មីលក់ឱ្យអាជីវករ គឺថ្លៃ៧ម៉ឺនរៀលមិនមែន៥ម៉ឺនរៀលនោះទេ តែប្រាក់នេះបានប្រគល់ទៅការិយាល័យបសុព្យាបាលខេត្តអស់ហើយ ។ ចំពោះការយកថ្លៃលើសកំណត់លោកមិនអាចឆ្លើយបានទេ ព្រោះពេលនេះលោកកំពុងសម្រាកព្យាបាលនៅមន្ទីរពេទ្យ។
លោកវ៉ាន់ ហាក់ អ្នកម៉ៅការទីសត្វឃាតស្រុកកំពង់ត្រឡាចបាននិយាយថា សព្វថ្ងៃនេះគាត់យកគោ ក្របី ១ក្បាលតម្លៃ៨៥០០រៀល ជូ្រកមួយក្បាល៥.០០០រៀល ប៉ុន្តែបើអាជីវករចេះតែរអ៊ូថាថ្លៃចង់ឱ្យចុះថោក មានតែខ្ញុំខាត រកស៊ីនរណាក៏ចង់ចំណេញដែរ។ លោកបានទទួលស្គាល់ថា ច្បាប់អាជីវកម្មចាស់បានផុតកំណត់មែន តែលោកបានធ្វើច្បាប់ថ្មីរួចហើយ គ្រាន់តែរដ្ឋមន្ត្រីលោកមិនទាន់បានចុះហត្ថលេខាភ្លាមនោះទេ ហើយច្បាប់ថ្មីនេះ លោកបានសុំវិនិយោគធ្វើតអគារថ្មីបន្ថែមទៀត។
ពាក់ព័ន្ធនឹងករណីខាងលើនេះ លោកក្រឹង សំអាត ប្រធានការិយាល័យបសុព្យាបាលខេត្តបាននិយាយថា ចំពោះអ្នកម៉ៅការទីសត្វឃាត ច្បាប់ គឺមិនទាន់ផុតកំណត់នៅឡើយទេ ប៉ុន្តែបើសិនជាផុតកំណត់ក៏នៅតែឱ្យគាត់ធ្វើសិនដែរ ព្រោះបើមិនអ៊ីចឹងទេឱ្យគាត់ទៅកាប់សត្វនៅកន្លែងណា។ រឿងលក់ច្បាប់ឱ្យអាជីវករកាប់សត្វនោះ គឺ៨ម៉ឺនរៀល មិនមែនជារបស់មន្ទីរហិរញ្ញវត្ថុទេ គឺតាមប្រកាសរបស់ក្រសួង១០-១៣ និង១០-១៤។
ចំណែករឿងមន្ត្រីពេទ្យសត្វស្រុក ក្រុងដែលយកតម្លៃលើសកំណត់នោះពិតជាមានមែនហើយ តែវាតិចតួច និងម្យ៉ាងវាជាមនោសញ្ចេតនារបស់អ្នកកាប់សត្វ បើពួកគាត់យល់ថា វាជាការគាបសង្កត់ គឺបញ្ឈប់ទៅ ប្រាក់ទាំងនេះវាមិនច្រើនប៉ុន្មានទេ។
នៅមានរឿងជាច្រើនទៀតដែលអ្នកម៉ៅការទីសត្វឃាតមិនអនុវត្តតាមគោលការណ៍កំណត់ ពិសេសរឿងអនាម័យជាដើម ដូចនៅក្រុងកំពង់ឆ្នាំងទឹកសម្រាប់យកមកប្រើប្រាស់ គឺជាទឹកមិនស្អាតបូមពីកូនថ្លុកកខ្វក់ និងក្នុងកន្លែងសត្វឃាតគ្មានអនាម័យ និងក្លិនស្អុយជាដើម ៕
ចែករំលែកព័តមាននេះ