រាជធានីភ្នំពេញ ៖ បន្ទាប់ពីគណបក្សសង្គ្រោះជាតិប្រកាសផ្អាកការចរចា លោកជាម យៀប មន្ត្រីជាន់ខ្ពស់មួយរូបរបស់គណបក្សប្រជាជនកម្ពុជា និងជាប្រធានគណៈកម្មការហិរញ្ញវត្ថុ ធនាគារ និងសវនកម្មនៃរដ្ឋសភា និងជាសមាជិកមួយរូបក្នុងគណៈកម្មការចម្រុះ ដែលជួបចរចាដែរនោះមានប្រសាសន៍ថា លោកសោកស្តាយដែលមេបក្សប្រឆាំងប្រកាន់ជំហរបែបនេះ ។
លោកជាម យៀប បានមានប្រសាសន៍ប្រាប់កោះសន្តិភាពតាមទូរស័ព្ទនាព្រឹកថ្ងៃទី១៣ មីនាថា អ្វីដែលលោកសម រង្ស៊ី ប្រធានគណបក្សសង្គ្រោះជាតិលើកឡើងនោះជាការទទួលខុសត្រូវរបស់លោកសម រង្ស៊ី និងជាសិទ្ធិរបស់គណបក្សសង្គ្រោះជាតិ ។ បុ៉ន្តែយើងមានការសោកស្តាយណាស់ព្រោះថា គណបក្សទាំងពីរកំពុងតែធ្វើការចរចារកដំណោះស្រាយណាមួយសមស្រប បែរជាមេបក្សរូបនេះប្រកាសថា ឈប់ចរចាគ្នាទៅវិញ ។ ការចរចារវាងគណបក្សប្រជាជនកម្ពុជា និងគណបក្សសង្គ្រោះជាតិនោះ ព្រោះគណបក្សប្រជាជនកម្ពុជាចង់បានសុខសន្តិភាពជូនប្រជាជន ហើយចង់ជំរុញឱ្យសេដ្ឋកិច្ចជាតិឈានទៅមុខដើម្បីបំបាត់ភាពក្រីក្ររបស់ប្រជាជនកម្ពុជា ។ មន្ត្រីជាន់ខ្ពស់របស់គណបក្សប្រជាជនកម្ពុជារូបនេះ បានទម្លាក់កំហុសទៅលើមេដឹកនាំគណបក្សសង្គ្រោះជាតិថា កំពុងតែនាំភាពវឹកវរក្នុងប្រទេស ខណៈដែលប្រទេសកំពុងវិវឌ្ឍន៍ទៅមុខ។ លោកសម រង្ស៊ី កំពុងតែយកអន្ទាក់មកទាក់កឱ្យមានការបំផ្លិចបំផ្លាញប្រទេសជាតិទាំងមូល ។
ការទាមទាររបស់គណបក្សសង្គ្រោះជាតិថា ចង់ឱ្យស្ថាប័នគណៈកម្មាធិការជាតិរៀបចំការបោះឆ្នោត (គ.ជ.ប) ជាស្ថាប័នធម្មនុញ្ញ និងជ្រើសតាំងសមាជិក គ.ជ.ប ត្រូវអនុម័តដោយសំឡេង២ភាគ៣ នោះត្រូវបានលោកជាម យៀប ប្រតិកម្មតបថា អ្វីដែលមេបក្សសង្គ្រោះជាតិលើកឡើងនោះជាការមិនត្រូវព្រោះថា គណៈកម្មាធិការជាតិរៀបចំការបោះឆ្នោត ជាតំណាងឱ្យការងាររដ្ឋបាលទូទៅ ដូច្នេះវាមិនអាចទៅជាស្ថាប័នធម្មនុញ្ញបានទេ ។ លោកជាម យៀប បានលើកឡើងថា នៅក្នុងឆ្នាំ១៩៩៧ រដ្ឋសភាបានអនុម័តច្បាប់មួយស្តីពីការជ្រើសតាំងតំណាងរាស្ត្រ ក្នុងជំពូកទី៣ ដែលមាន១៣មាត្រា ចាប់ពីមាត្រា១០ ដល់មាត្រា២៣ ដែលចែងពីតួនាទីរបស់ គ.ជ.ប ត្រូវមានភារកិច្ចធ្វើអ្វីខ្លះរួចទៅហើយ ។ ការចែងច្បាប់ស្តីពីការជ្រើសតាំងតំណាងរាស្ត្រនេះ វាដូចជាគ្រប់គ្រាន់សម្រាប់ គ.ជ.ប ទៅហើយ ។ ទោះជាយ៉ាងណាក្តី លោកជាម យៀប បញ្ជាក់ថា ទោះបីជាមានការចែងពីច្បាប់យ៉ាងនេះក្តី ក៏នៅថ្ងៃទី១៧ មីនា ខាងមុខនេះ បញ្ហានឹងត្រូវគណៈកម្មការចម្រុះពិភាក្សាគ្នាជាថ្មីបន្តទៀត ។ ដើម្បីសុច្ឆន្ទៈ ដើម្បីប្រយោជន៍ជាតិ និងប្រជាជន នៅថ្ងៃទី១៧ មីនា ខាងមុខនេះ គឺនឹងធ្វើការចរចាបន្តទៀត ហើយអ្វីដែលគណៈកម្មការចម្រុះដោះស្រាយមិនបាននោះ ទុកឱ្យថ្នាក់ដឹកនាំគណបក្សទាំងពីរជាអ្នកដោះស្រាយលើកក្រោយ ។ ពេលនេះគឺគ្រាន់តែជាប្រធានបទសម្រាប់លើកយកទៅក្នុងសិក្ខាសាលាថ្នាក់ជាតិនៅពេលខាងមុខ ។
ក្នុងនាមជាសមាជិករដ្ឋសភា លោកជាម យៀប បានអំពាវនាវឱ្យតំណាងរាស្ត្រខាងគណបក្សសង្គ្រោះជាតិ ដែលជាប់ឆ្នោតអាណត្តិទី៥ ចូលប្រជុំក្នុងរដ្ឋសភា និងសូមបង្ហាញឆន្ទៈពីការចង់ជួយកសាងប្រទេសជាតិ និងប្រជាពលរដ្ឋឱ្យបានច្បាស់លាស់ ។ ការចូលប្រជុំសភា គឺសំខាន់ណាស់ សភាជាវេទិកាសាធារណៈអាចឱ្យតំណាងរាស្ត្រជជែកគ្នានៅក្នុងសភា និងទុកសំឡេងជូនប្រជាពលរដ្ឋបានស្តាប់គ្រប់គ្នា និងអាចសន្និដ្ឋានថា អ្នកណាខុស អ្នកណាត្រូវ និងនរណាដែលចង់ឱ្យប្រទេសជាតិរុងរឿង និងមានការអភិវឌ្ឍ និងអ្នកណាជាអ្នកបំផ្លាញប្រទេសជាតិនោះ ។ ទាក់ទងនឹងការប្រកាន់ជំហររបស់គណបក្សប្រជាជនកម្ពុជាថា នៅតែបន្តចរចាជាមួយគណបក្សសង្គ្រោះជាតិនោះ កោះសន្តិភាពមិនអាចសុំការអត្ថាធិប្បាយពីជំហរជាថ្មីរបស់គណបក្សសង្គ្រោះជាតិពីលោកយ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិបានទេ ដោយទូរស័ព្ទរបស់លោកបិទ ។ បុ៉ន្តែបើតាមប្រព័ន្ធផ្សព្វផ្សាយក្នុងស្រុកមួយបានឱ្យដឹងថា គណបក្សសង្គ្រោះជាតិបានដាក់លិខិតទៅគណបក្សប្រជាជនកម្ពុជា នៅថ្ងៃទី១៣ មីនា ឱ្យឆ្លើយតបជាបន្ទាន់ចំពោះសំណើទាមទារឱ្យមានការកំណត់ធម្មនុញ្ញ និងស្ថាប័នជ្រើសតាំងសមាសភាព គ.ជ.ប មុននឹងបន្តកិច្ចប្រជុំថ្ងៃទី១៧ មីនា ។ លិខិតនេះសម្រេចធ្វើឡើងបន្ទាប់ពីកិច្ចប្រជុំបិទទ្វាររបស់គណបក្សសង្គ្រោះជាតិកាលពីពេលកន្លងមក ។
លើសពីនេះ គឺលោកសម រង្ស៊ី ប្រធានគណបក្សនេះ នៅថ្ងៃដដែលនោះបានព្រមានផ្តាច់ការចរចាជាមួយគណបក្សប្រជាជនកម្ពុជា ហើយត្រៀមរៀបចំធ្វើមហាបាតុកម្មជាថ្មីទៀត បើពុំមានការផ្លាស់ប្តូរ គ.ជ.ប ។ ប្រភពដដែលក៏បានដកស្រង់សម្តីមន្ត្រីគណបក្សសង្គ្រោះជាតិ និងជាសមាជិកគណៈកម្មការកែទម្រង់ការបោះឆ្នោត លោកយឹម សុវណ្ណ ថា គោលបំណងសំខាន់នៃការធ្វើលិខិតនេះ គឺផ្តោតសំខាន់លើកំណែទម្រង់ គ.ជ.ប និងដើម្បីឱ្យភាគីគណបក្សប្រជាជនកម្ពុជាឆ្លើយបំភ្លឺលើសំណើរបស់ខ្លួន មុននឹងក្រុមការងារគណៈកម្មការចម្រុះបន្តកិច្ចប្រជុំនៅសប្តាហ៍ក្រោយនេះ បើពុំនោះទេ គណបក្សនេះនឹងបញ្ឈប់កិច្ចចរចា ។ សូមបញ្ជាក់ថា កាលពីពេលថ្មីៗនេះ ថ្នាក់ដឹកនាំគណបក្សសង្គ្រោះជាតិ បានប្រកាសតាមរយៈប្រព័ន្ធសង្គមហ្វេសប៊ុករបស់ខ្លួន ទាមទារឱ្យគណបក្សប្រជាជនកម្ពុជា ទទួលសំណើដាក់ស្ថាប័នគ.ជ.ប ជាស្ថាប័នធម្មនុញ្ញ បើពុំនោះទេ នឹងឈប់ចរចា ហើយធ្វើមហាបាតុកម្មជាថ្មីទៀត ដែលការប្រកាសនេះធ្វើឡើងក្នុងវេទិកាចុះជួបប្រជាពលរដ្ឋនៅខេត្តត្បូងឃ្មុំ ។ ចំណែកលោកកឹម សុខា អនុប្រធានគណបក្សសង្គ្រោះជាតិ បានអះអាងពីជំហររបស់គណបក្សសង្គ្រោះជាតិ គឺទាមទារឱ្យស្ថាប័ន គ.ជ.ប ជាស្ថាប័នធម្មនុញ្ញ ហើយការជ្រើសតាំងសមាសភាព គ.ជ.ប ត្រូវអនុម័តដោយសំឡេង២ភាគ៣ នៃសមាជិកសភាទាំងមូល ។ លោកសម រង្ស៊ី ប្រធានគណបក្សសង្គ្រោះជាតិ បានចោទថា ការចូលតុចរចាកន្លងមកគ្រាន់តែជាលេសរបស់គណបក្សប្រជាជនកម្ពុជា ដែលចង់ពន្យារពេល និងបោកបញ្ឆោតសហគមន៍បរទេសតែបុ៉ណ្ណោះ ។
លោកសម រង្ស៊ី ព្រមានថា បើមិនព្រមប្តូរគ.ជ.ប មានតែឱ្យ គ.ជ.ប ដូរសន្លឹកឆ្នោតទៀត ហើយដូច្នេះមិនចាំបាច់ពន្យារពេលទៀតទេ បើយើងបានផ្លាស់ប្តូរ គ.ជ.ប សិន ចាំយើងនិយាយគ្នាតទៅទៀត ត្រៀមខ្លួនណាបងប្អូន ម្តងទៀតហើយ បើជជែកគ្នាអត់បានការធ្វើឱ្យអន្តរជាតិមានការភ័ន្តច្រឡំ អត់ទេ ឈប់ទៅ យើងមានតែរៀបចំធ្វើបាតុកម្មទៀត ។ លោកព្រុំ សុខា ប្រធានក្រុមការងារបច្ចេកទេសគណបក្សប្រជាជនកម្ពុជា និងជារដ្ឋលេខាធិការក្រសួងមហាផ្ទៃថ្លែងថា លោកមានការសោកស្តាយចំពោះការប្រកាសជំហររបស់គណបក្សសង្គ្រោះជាតិ ដែលបោះបង់ចោលការចរចារវាងក្រុមគណៈកម្មការចម្រុះនោះ ។ យើងយល់ច្បាស់ថា ដំណោះស្រាយក្រោយថ្ងៃបោះឆ្នោត ២៨ កក្កដា ២០១៣ ដែលប្រសើរតែមួយគត់ គឺដំណោះស្រាយដោយសន្តិវិធី គឺការចរចា គ្មានជម្រើសផ្សេងពីនេះទេ ។
លោកព្រុំ សុខា បន្តថា អ្វីដែលទាមទារនោះគឺជាអ្វីដែលគណបក្សប្រជាជនកម្ពុជាចង់ធ្វើ បុ៉ន្តែគណបក្សប្រជាជនកម្ពុជាចង់រកចំណុចណាមួយដែលសមស្រប មិនដូចជាភាគីមួយចង់ឱ្យភាគីមួយទទួលយក ហើយបើមិនទទួលយក ឈប់ការចរចានោះទេ វាមិនមានន័យចរចាទេ ។ ការកែទម្រង់ អ្នកណាក៏ចង់ធ្វើឱ្យមានតម្លាភាពដែរ ហើយប្រសិនបើគ្មានតម្លាភាព និងអព្យាក្រឹតភាពរបស់ គ.ជ.ប ប្រហែលជាកម្ពុជាគ្មានការបោះឆ្នោតមកដល់អាណត្តិនេះ ដែលមានការសាទរពីអន្តរជាតិនានានោះទេ ៕
ចែករំលែកព័តមាននេះ