រាជធានីភ្នំពេញ ៖ លោក អិុត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ អះអាងប្រាប់ក្រុមអ្នកសារព័ត៌មាននាព្រឹកថ្ងៃទី១២ មីនា នៅសណ្ឋាគារសូហ្វីតែលភ្នំពេញភូគីត្រាថា មូលហេតុដែលកើតមានបាតុកម្មទាមទារប្រាក់ឈ្នួលនោះកើតមកពីបក្សប្រឆាំងនិងសហជីពដែលមាននិន្ទាការគាំទ្រនយោបាយរបស់ខ្លួន ។ ប៉ុន្តែក្រសួងការងារគ្រោងនឹងជួបពិភាក្សាពីបញ្ហាប្រាក់ឈ្នួលអប្បបរមារបស់កម្មករនិយោជិតសាជាថ្មីនៅពេលខាងមុខ ។
លោករដ្ឋមន្ត្រីថ្លែងថា ការពិភាក្សាមួយជាមួយសហជីពនឹងធ្វើនៅពេលខាងមុខដូចអ្វីដែលរាជរដ្ឋាភិបាលកំណត់ និងក្រសួងបានប្រកាសរួចហើយ ។ ក្នុងនោះយើងមានយន្តការមួយសិក្សាបន្ត ហើយយើងកំពុងតែពិភាក្សាជាមួយអង្គការពលកម្មអន្តរជាតិ(ILO)ដើម្បីរៀបចំគម្រោងមួយដែលក្នុងគម្រោងនោះផ្ដោតទៅលើកិច្ចការចំនួនបីសំខាន់ ៖
១-ការរៀបចំនូវរូបមន្តដែលមានលក្ខណៈវិទ្យាសាស្ត្រ សម្រាប់ធ្វើការសិក្សាកំណត់ប្រាក់ឈ្នួលអប្បបរមារបស់កម្មករនិយោជិត ។ ក្រោយពីការកំណត់រូមន្តរួចហើយ វាជាចំណុចសំខាន់មួយបន្តនិរន្តរភាពវិស័យឧស្សាហកម្មក្នុងការបង្កើនការងារជូនប្រជាពលរដ្ឋនិងទាក់ទាញអ្នកវិនិយោគសម្រាប់អភិវឌ្ឍន៍សេដ្ឋកិច្ចថែមទៀត ។ ២- ការកសាងសមត្ថភាពនៃភាគីដែលត្រូវចូលរួមពិភាក្សាពីបញ្ហាប្រាក់ឈ្នួលអប្បបរមា ទាំងភាគីរដ្ឋសភា ភាគីសហជីព និងភាគីនយោជក ថាតើភាគីទាំងអស់ត្រូវយល់ដឹងពីទស្សនទាននៃបញ្ហាប្រាក់ឈ្នួលអ្វីខ្លះ? កុំឱ្យតែម្នាក់ៗចេះតែចង់បានលើស និងអ្នកខ្លះចង់កាត់បន្ថយ ដែលជាហេតុធ្វើឱ្យមានការសម្របសម្រួល មិនបាន ។ ៣-ការកែទម្រង់ការសម្រេចបញ្ហាប្រាក់ឈ្នួលរបស់កម្មករ និយោជិត គឺមុននឹងសម្រេចប្រាក់ឈ្នួលត្រូវតែមានតម្លាភាព ជជែកគ្នាឱ្យអស់ឱ្យភាគីស្រុះស្រួលគ្នា កុំឱ្យមានការធ្វើបាតុកម្មខុសច្បាប់បន្តទៀត ។
លោករដ្ឋមន្ត្រីលើកឡើងទៀតថា ការបន្តឱ្យមានបាតុកម្មរបស់សហជីពមួយចំនួនដែលកំពុងកើតមានជាបន្តបន្ទាប់និងជាហូរហែមិនទាន់ចប់នោះ កំពុងស្ថិតក្នុងកញ្ចប់នយោបាយរបស់គណបក្សប្រឆាំងហើយនិងការប្រកាន់និន្នាការនយោបាយសហជីពរបស់ពួកគេ ។ បញ្ហានេះគឺមិនអាចដោះស្រាយបានឆាប់ទេ ហើយវាស្ថិតក្នុងក្របខណ្ឌច្បាប់ ដូច្នេះរដ្ឋាភិបាលត្រូវតែយកច្បាប់មកអនុវត្តជាការត្រឹមត្រូវ ។ បើសហជីពមួយចំនួននៅតែរឹងទទឹងដឹកនាំធ្វើបាតុកម្មនោះរាជរដ្ឋាភិបាលនឹងចាត់វិធានការតាមច្បាប់ ។ ការទាមទាររបស់សហជីពនៅតែប្រកាន់ជំហរក្នុងការទាមទារប្រាក់ឈ្នួលកម្មករ ចំណែកភាគីនិយោជកនៅតែប្រកាន់ជំហរថានឹងបិទទ្វាររោងចក្រនោះបានប៉ះពាល់ដល់វិស័យកាត់ដេរក្នុងប្រទេសកម្ពុជា តែបញ្ហានេះលោករដ្ឋមន្ត្រីបានអះអាងថា ពេលនេះក្រសួងកំពុងខិតខំធ្វើនិងសហការជាមួយអង្គការILO ដើម្បីដោះស្រាយបញ្ហានេះ ។ ក្រសួងកំពុងរៀបចំយន្តការពិភាក្សាជាមួយសហជីពនិងភាគីនិយោជក ជាបន្តបន្ទាប់ទៀត ចៀសវាងធ្វើឱ្យប៉ះពាល់ដល់វិស័យកាត់ដេរ និងការអភិវឌ្ឍប្រទេស ។ ILOនិងក្រសួងការងារ កំពុងរកយុទ្ធសាស្ត្រដោះស្រាយហើយការគំរាមធ្វើកូដកម្ម បាតុកម្មនោះវាជារឿងមួយមិនល្អទេ ។ ការគំរាមនេះវាជាចរិតលក្ខណៈនយោបាយសម្រាប់ក្រុមខ្លួននិងបក្សពួករបស់ខ្លួន ។ ដូច្នេះការដោះស្រាយបញ្ហារបស់កម្មករយើងត្រូវកាត់ចេញពីនយោបាយឱ្យបានទោះបីជាកាន់គណបក្សនយោបាយណាក្ដី ។
លោករដ្ឋមន្ត្រីបញ្ជាក់ថា ប្រសិនបើសហជីពនៅតែប្រកាន់ជំហរធ្វើបាតុកម្មមិនឈប់ឈរនឹងប៉ះពាល់ដល់អ្នកវិនិយោគ ស្របពេលដែលប្រទេសក្នុងសហគមន៍អាស៊ានកំពុងមានសក្ដានុពលក្នុងការអូសទាញអ្នកវិនិយោគទុនដែលបម្រុងដាក់ទុននឹងត្រឡប់ទៅវិញ ។ ក្នុងនោះមានប្រទេសមីយ៉ាន់ម៉ា ដែលមានប្រជាជនច្រើនជាងកម្ពុជា ហើយប្រាក់ចំណូលតិចជាងកម្ពុជាដូច្នេះថៅកែរោងចក្រមួយចំនួននឹងពិចារណាវិលទៅរកប្រទេសនោះវិញដែលជាបញ្ហាមួយគួរគិតពិចារណា ។ លោក អិុត សំហេង បានអំពាវនាវដល់មេដឹកនាំសហជីពដែលដឹកនាំធ្វើបាតុកម្មទាមទារដំឡើងប្រាក់ឈ្នួលបញ្ឈប់សកម្មភាពរបស់ខ្លួនហើយងាកមកចរចាគ្នា ព្រោះថាអង្គការILO និងគ្រប់ភាគីអាចទទួលយកមកពិចារណា ។ ទោះបីជាមានបាតុកម្មអូសបន្លាយអស់រយៈពេលជិត៤ខែមកហើយក្ដីក៏លោក អិុត សំហេង បានអះអាងថា វិស័យកាត់ដេរក៏មានកំណើនដែរ រួមទាំងរោងចក្រផលិតសម្ភារក៏មានកំណើនមួយចំនួន ។
លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជាថ្លែងថា ការទាមទាររបស់តំណាងសហជីពមួយចំនួនតូចនោះកំពុងតែបង្ខំនិយោជកដែលធ្វើឱ្យប៉ះពាល់ដល់វិស័យកាត់ដេរកម្ពុជា ។ កម្មករកាត់ដេរនៅកម្ពុជាបច្ចុប្បន្នទទួលបានប្រាក់ខែយ៉ាងតិច១១៧ដុល្លារ គិតទាំងប្រាក់ផ្សេងៗគឺតម្លៃនេះដូចនិងកម្មកររោងចក្រនៅប្រទេសវៀតណាមដែរ ប៉ុន្តែយើងមិនមែនមិនចង់ឱ្យកម្មកររបស់យើងទទួលបានលុយតែប៉ុណ្ណឹងទេ ក្នុងមួយៗឆ្នាំ យើងបានបន្ថែមប្រាក់ជាហូរហែ ។ លោកក៏ចោទ ទៅលើតំណាងសហជីពដែលកំពុងដឹកនាំកម្មករញុះញង់កម្មករធ្វើបាតុកម្មដោយលើកឡើងថា ប្រសិនបើកម្មករចង់ ធ្វើបាតុកម្មនោះពួកគេនឹងឈប់ធ្វើការងារដោយខ្លួនឯង ហើយមានកម្មករភាគតិចក្នុងចំណោមកម្មករប្រមាណជាង៦០ម៉ឺននាក់ នាំគ្នាធ្វើបាតុកម្មដែលស្ថិតក្រោមការញុះញង់របស់តំណាងសហជីពដែលតំណាងឱ្យភាគតិច ។
លោក វ៉ាន់ ស៊ូអៀង លើកឡើងថា បញ្ហាបាតុកម្មរបស់តំណាងសហជីពនិងភាពមានៈរបស់សហជីពមួយចំនួនកំពុងធ្វើឱ្យវិស័យកាត់ដេរជួបនឹងបញ្ហានាពេលបច្ចុប្បន្ន ព្រោះថាកន្លងមកមានតែកម្មករប្រមាណ៣.០០០នាក់ និងមានសហជីពតែ៦០០ប៉ុណ្ណោះ ពេលនោះគ្មានបាតុកម្មនោះទេ ។
លោកវ៉ាន់ ស៊ូអៀង បានស្វាគមន៍ចំពោះការបង្កើតច្បាប់ស្ដីពីសហជីពរបស់រាជ រដ្ឋាភិបាលកម្ពុជាដោយបានលើកឡើងថា ប្រសិនបើមានច្បាប់គ្រប់គ្រងច្បាស់លាស់នោះសង្ឃឹមថានឹងគ្មានបាតុកម្មទៀតឡើយ ។ ទាក់ទងនឹងការចរចាពិភាក្សាបញ្ហាប្រាក់ឈ្នួលកម្មករនិយោជិត និងទាមទាររបស់តំណាងសហជីពមួយចំនួនដែលត្រូវបានចាត់ទុកថា បម្រើនយោបាយគណបក្សប្រឆាំងនោះលោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានបដិសេធនិងបញ្ជាក់ថា វាមិនមែនជាការបម្រើនយោបាយនោះទេព្រោះថាកម្មករទំាងអស់ចង់បានជីវភាពរស់នៅរបស់ពួកគាត់ឱ្យសមរម្យនិយាយរួមដើម្បីក្រពះ និងមួយទៀតគឺទាមទារចង់ឲ្យមានការដោះលែងអ្នកដែលកំពុងជាប់ឃុំ ចំនួន២១នាក់ ។ លោក អាត់ ធន់ បានបញ្ជាក់ថា សហជីពរបស់លោកមិនពាក់ព័ន្ធនឹងនយោបាយទេ ហើយប្រសិនបើជាប់ពាក់ព័ន្ធនឹងនយោបាយមែននោះសហជីពរបស់លោកប្រកាសធ្វើនយោបាយទៅហើយ ។ ទោះជាយ៉ាងនេះក្តី ប្រធានសម្ព័ន្ធសហជីពរូបនេះបានស្នើសុំទៅដល់គណបក្សនយោបាយដែលជាប់ឆ្នោតក្នុងនីតិកាលទី៥នេះប្រញាប់ដោះស្រាយបញ្ហាជាប់គំាងនយោបាយចៀងវាងធ្វើឲ្យប៉ះពាល់ដល់វិស័យផ្សេងៗពិសេសនោះគឺប្រជាពលរដ្ឋ ។
លោកបន្ថែមថា ប្រសិនបើរដ្ឋាភិបាលដោះស្រាយបញ្ហាប្រាក់ឈ្នួលកម្មករនិយោជិតនិងដោះលែងអ្នក២១នាក់កំពុងជាប់ឃុំខ្លួននោះទោះបីជាគណបក្សនយោបាយទាំង២មិនទាន់ត្រូវគ្នាក្តីក៏កម្មករនិយោជិតទំាងអស់នំាគ្នាចូលធ្វើការមិនចំាបាច់បន្តធ្វើបាតុកម្មទៀតនោះទេ ។ មួយវិញទៀត បើរឿងប្រាក់ខែកម្មករ និងអ្នកដែលជាប់ឃុំខ្លួនមិនទាន់ដោះស្រាយចប់ទេនោះកម្មករទំាងអស់នៅតែបន្តការធ្វើបាតុកម្មដដែល ៕
ចែករំលែកព័តមាននេះ