គ្រោះថ្នាក់ចរាចរទៀតហើយលើទឹកដីថៃពលករខ្មែរប្រុសស្រីជាង២១នាក់រងរបួសធ្ងន់ស្រាល

បន្ទាយមានជ័យ៖តាមប្រភពពត៏មានពីខេត្តស្រះកែវប្រទេសថៃបានឲ្យដឹងថានៅវេលាម៉ោងជិត១០ព្រឹកថ្ងៃទី១៣ខែមិនាឆ្នាំ២០១៤នេះមានពលករខ្មែរប្រុសស្រីជួបឧប្បតិហេតុគ្រោះថ្នាក់ចរាចរទៀតហើយៗមានរបួសធ្ងន់ស្រាលចំនួន២១នាក់នៅក្នុងស្រុកវ៉ាត់តាណាណាក់ខនខេត្តស្រះកែវក្នុងពេលវិលត្រឡប់ពីតាមបណ្ដាខេត្តនៃស្រុកថៃដើម្បីវិលមកស្រុកកំណើតវិញតាមរថយន្តប្រភេទវីហ្គោ២បាំងមួយគ្រឿង។ជំវិញពត៏មានខាងលើលោកនេតសារីអគ្គ:កុងស៊ុលខ្មែរប្រចាំខេត្តស្រះកែវប្រទេសថៃបានប្រាប់តាមទូរស័ព្ទនៅរសៀលថ្ងៃដដែលនេះថាហេតុការណ៍ខាងលើពិតជាកើតមានមែនដោយលោកថាពលកររងគ្រោះទាំងនេះមានចំនួន២១នាក់ក្មេងតូចៗ៤នាក់ហើយក្នុងចំណោមអ្នករងគ្រោះទាំងអស់របួសធ្ងន់២នាក់ម្នាក់ឈ្មោះរឿនភេទប្រុសអាយុជាង៤០ឆ្នាំនិងម្នាក់ទៀតឈ្មោះម៉ាប់ភេទប្រុសដោយអ្នកទាំង២មានទីលំនៅក្នុងខេត្តកណ្ដាល។លោកនេតសារីបន្តថាការគ្រោះថ្នាក់ចរាចរនេះកើតឡើងនៅពេលរថយន្តដឹកពលករនេះកំពុងវិលត្រឡប់ពីតាមបណ្ដាខេត្តក្នុងប្រទេសថៃក្នុងគោលបំណងវិលមកស្រុកវិញ។ហើយរថយន្តនេះគ្រោះថ្នាក់ដោយសារបើកលឿនដល់ចំណុចផ្លូវកោងក៍ក្រឡាប់ចាក់មនុស្សរដូករណែលតែម្ដង។ចំពោះអ្នករបួសស្រាលត្រូវលោកប្រាប់ថាពេលនេះខាងលោកកំពុងដោះស្រាយសុំឲ្យភាគីថៃបញ្ជូនវិលត្រឡប់។ចំណែកអ្នកបើកបរជាជនជាតិថៃត្រូវបានលោកប្រាប់ថាក្រោយហេតុការណ៍កើតឡើងបានគេចខ្លួនទៅបាត់។តាមពត៏មានចុងក្រោយដែលទទួលបានជាក់ស្ដែងពលកររងគ្រោះស្រីប្រុសចាស់ក្មេងទាំង២១នាក់មានប្រុស១៦នាក់ស្រី៥នាក់ខ្លះមកពីខេត្តកំពង់ធំនិងមួយចំនួនធំមកពីខេត្តកំពង់ស្ពឺនិងខេត្តផ្សេងៗមួយចំនួនទៀត។ពលករទាំងនេះក្រោយជួបឧប្បតិហេតុគ្រោះថ្នាក់ចរាចរត្រូវបានគេបញ្ជូនតាមរថយន្តទ្រុងមកឲ្យសមត្ថកិច្ចកម្ពុជាតាមច្រកទ្វារអន្តរជាតិប៉ោយប៉ែតវេលាម៉ោងជាង៦ល្ងាចថ្ងៃដដែលនៅសល់តែអ្នករងគ្រោះធ្ងន់២នាក់តែប៉ុណ្ណោះនៅសំរាកព្យាបាលនៅមន្ទីរពេទ្យខេត្តស្រះកែវ៕ដោយមុតសារុន