ខេត្តកណ្តាល ៖ នគរបាលស្រុកកណ្តាលស្ទឹង បានឃាត់ខ្លួនបុរសម្នាក់កាលពីរសៀលថ្ងៃទី១២ មីនា បន្ទាប់ពីទទួលបានពាក្យបណ្តឹងរបស់ម្តាយក្មេងស្រីដែលប្តឹងពីបទរំលោភសេពសន្ថវៈ កូនស្រីគាត់អាយុ១៤ឆ្នាំ រហូតមានផ្ទៃពោះ៤ខែ។ ការចាប់រំលោភនេះបានកើតឡើងកាលពីថ្ងៃទី១៩ វិច្ឆិកា ឆ្នាំ២០១៣ វេលាម៉ោង៣និង៣០នាទីរសៀល នៅក្នុងបង្គន់ក្បែរផ្ទះជនសង្ស័យ ស្ថិតក្នុងឃុំបាគូ ស្រុកកណ្តាលស្ទឹង ខណៈក្មេងស្រីត្រឡប់មកពីទិញសាប៊ូវិញ ។
បុរសដែលសមត្ថកិច្ចឃាត់ខ្លួននេះឈ្មោះសាង គឹមសេង ហៅអ៊ូច អាយុ៣៥ឆ្នាំ ជាជាងតទឹក ។ លោកអនុសេនីយ៍ឯក ទឹម សេង អធិការរងនគរបាលស្រុកកណ្តាលស្ទឹងបានឱ្យដឹងថា នៅវេលាម៉ោង៣និង២០នាទីរសៀលថ្ងៃទី១៩ វិចិ្ឆិកា ឆ្នាំ២០១៣ ក្មេងស្រីបានជិះកង់ពីផ្ទះទៅទិញសាប៊ូកក់សក់នៅក្នុងភូមិពោធិ៍ដុះ លុះជិះកង់ត្រឡប់មកផ្ទះវិញដល់ពាក់កណ្តាលផ្លូវ ស្រាប់តែឈ្មោះសាង គឹមសេង ស្រែកហៅនាងពីក្នុងដីឡូត៍របស់ខ្លួន ។ ប្រភពព័ត៌មានបន្តទៀតថា ខណៈឮដូចនោះនាងបានជិះកង់ចូលទៅ លុះជននោះបបួលនាងនាងចូលក្នុងផ្ទះធ្វើឱ្យមានការសង្ស័យ នាងក៏បានជិះកង់ចេញមកវិញ តែត្រូវជននេះចាប់ដៃកង់ជាប់ ។ បន្ទាប់មកជននេះបានអូសដៃនាងចូលទៅក្នុងបង្គន់ដែលស្ថិតនៅក្បែរផ្ទះ និងគំរាមមិនឱ្យនាងប្រាប់ឪពុកម្តាយ ឬអ្នកណាឡើយ បើមិនធ្វើតាមទេគេនឹងសម្លាប់ចោល ។
នៅពេលឮការគំរាមដូច្នេះ ក្មេងស្រីរងគ្រោះមានការភិតភ័យមិនហា៊នស្រែកឡើយ ហើយជននេះក៏បានធ្វើសកម្មភាពរំលោភរហូតបានសម្រេច ។ លោកទឹម សេង បានឱ្យដឹងទៀតថា លុះមកដល់ថ្ងៃទី៧ មីនា ឆ្នាំ២០១៤ ម្តាយក្មេងស្រីរងគ្រោះមានការសង្ស័យលើកូនស្រីរបស់ខ្លួន ព្រោះមានសភាពស្លេកស្លាំង ក៏បានសួរនាំនិងយកឧបករណ៍ពិនិត្យទឹកនោមមកពិនិត្យឃើញថានាងមានផ្ទៃពោះ ក៏នាំកូនស្រីទៅកាន់មន្ទីរពេទ្យបង្អែកជ័យជំនះខេត្ត ដើម្បីឱ្យគ្រូពេទ្យពិនិត្យបន្ថែម ។ ក្រោយពីពិនិត្យរួចគ្រូពេទ្យបានប្រាប់ថា កូនស្រីគាត់មានផ្ទៃពោះ៤ខែហើយ ហើយម្តាយក៏បានឱ្យគ្រូពេទ្យរំលូតកូននោះចេញតែម្តង ។ តាមរយៈការសួរដេញដោល កូនស្រីគាត់ក៏បានប្រាប់ការពិតថា នាងត្រូវជនឈ្មោះសាង គឹមសេង ហៅអ៊ូច ដែលរស់នៅក្នុងភូមិជាមួយគ្នាចាប់រំលោភនៅក្នុងបន្ទប់ទឹក ហើយថែមទាំងគំរាមសម្លាប់ចោល បើនាងនិយាយប្រាប់គេ ។
លោកទឹម សេង បានឱ្យដឹងថា នៅថ្ងៃទី១០ មីនា ឆ្នាំ២០១៤ ម្តាយក្មេងស្រីរងគ្រោះបានមកដាក់ពាក្យបណ្តឹងនៅអធិការដ្ឋាននគរបាលស្រុកកណ្តាលស្ទឹង ហើយនៅថ្ងៃទី១២ មីនា វេលាម៉ោង១និង៣០នាទីរសៀល លោកបានកោះហៅឈ្មោះសាង គឹមសេង មកធ្វើការសួរនាំ ។ ពេលនោះជនសង្ស័យសារភាពថា ខ្លួនពិតជាបានចាប់ក្មេងស្រីរងគ្រោះរំលោភរហូតបានសម្រេច ប្រាកដមែន ។ ភ្លាមៗនោះសមត្ថកិច្ចក៏ឃាត់ខ្លួនជនឈ្មោះ សាង គឹមសេង ក្នុងពេលនោះតែម្តង រួចកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមផ្លូវច្បាប់ នាល្ងាចថ្ងៃដដែល ។ ជនរូបនេះត្រូវគេដឹងថា បានលែងលះប្រពន្ធ២ឆ្នាំមកហើយមិនមានកូនទេ ហើយផ្ទះដែលស្នាក់នៅនោះគឺនៅតែម្នាក់ឯង ៕
ចែករំលែកព័តមាននេះ