ខេត្តព្រះវិហារ ៖ ពលរដ្ឋខ្មែរ៣នាក់បានស្លាប់ ដោយសារទាហានសៀមបាញ់ ឯ៣នាក់ទៀតបាត់ខ្លួន និងម្នាក់រត់រួច ក្នុងហេតុការណ៍ដែលបានកើតឡើង កាលពីវេលាម៉ោង១១ព្រឹក ថ្ងៃទី១១ មីនា ខណៈពួកគេឡើងលើខ្នងភ្នំដងរែក លួចចូលដីសៀម រកកាប់ឈើគ្រញូង ។
ខេត្តព្រះវិហារ ៖ ពលរដ្ឋខ្មែរ៣នាក់បានស្លាប់ ដោយសារទាហានសៀមបាញ់ ឯ៣នាក់ទៀតបាត់ខ្លួន និងម្នាក់រត់រួច ក្នុងហេតុការណ៍ដែលបានកើតឡើង កាលពីវេលាម៉ោង១១ព្រឹក ថ្ងៃទី១១ មីនា ខណៈពួកគេឡើងលើខ្នងភ្នំដងរែក លួចចូលដីសៀម រកកាប់ឈើគ្រញូង ។ ពលរដ្ឋខ្មែរទាំងនោះបានឡើងតាមចំណុចដំណាក់ផ្តៀក ឆ្លងកាត់តាមព្រលានស្រទំ លើខ្នងភ្នំដងរែក ស្ថិតក្នុងភូមិឈើទាលគង ឃុំជាំក្សាន្ត ស្រុកជាំក្សាន្ត ខាងលិចច្រកទ្វារអានសេះ ដែលជាចំណុចឈរជើងការពារព្រំដែនរបស់វរសេនាតូចលេខ៤០៥ ។
តាមស្ត្រីម្នាក់ឈ្មោះ គន្ធា ជាអ្នកចំណាកស្រុក មកស្នាក់នៅភូមិឈើទាលគង ដែលរួមដំណើរជាមួយ និងរត់គេចខ្លួនផុតពីសេចក្តីស្លាប់បានឱ្យដឹងថា ពួកគាត់បានឡើងខ្នងភ្នំដងរែកមានគ្នា៧នាក់ ក្នុងនោះប្រុស៥នាក់ និងស្រី២នាក់ ទៅកាប់ឈើគ្រញូងក្នុងទឹកដីថៃ ដោយឡើងតាមចំណុចដំណាក់ផ្តៀក ។ ទាហានថៃបានបាញ់សម្លាប់ក្រុមគាត់ចំនួន៣នាក់ និង៣នាក់ទៀតបាត់ខ្លួនដែលអាចរត់វង្វេង ដោយមិនដឹងជាទៅដល់កន្លែងណាទេ ចំណែកគាត់ក៏បានរត់គេចខ្លួនរួច ចូលទឹកដីកម្ពុជាវិញ ។ ស្ត្រីឈ្មោះ គន្ធា បន្តទៀតថា ក្រោយពីទាហានសៀមបាញ់សម្លាប់ក្រុមរបស់គាត់៣នាក់ហើយ ទាហានសៀមក៏បានដុតសពឱ្យឆេះខ្មៅរោលនៅនឹងកន្លែងតែម្តង ។
តាមមន្ត្រីសមត្ថកិច្ចនៅតំបន់នោះឱ្យដឹងថា ពលរដ្ឋខ្មែរ៣នាក់ដែលស្លាប់នោះមាន ១-ឈ្មោះ ទិន ទី ភេទប្រុស អាយុ២៥ឆ្នាំ រស់នៅខេត្តកំពត ២-ឈ្មោះ អ៊ន ជីង ភេទស្រី អាយុ៥០ឆ្នាំ រស់នៅភូមិឈើទាលគង ឃុំជាំក្សាន្ត ស្រុកជាំក្សាន្ត និង៣-ឈ្មោះ ម៉ៅ ម៉ន អាយុ២១ឆ្នាំ រស់នៅខេត្តកំពត ។ ឯអ្នកបាត់ខ្លួន៣នាក់មិនស្គាល់អត្តសញ្ញាណទេ ប៉ុន្តែស្ត្រីម្នាក់បានរត់គេចខ្លួនរួចមកដល់ទឹកដីកម្ពុជាវិញហើយ ។
គួរបញ្ជាក់ថា សពពលរដ្ឋខ្មែរទាំង៣នាក់ខាងលើ គេពុំទាន់ដឹងថា ទាហានសៀមបាញ់សម្លាប់នៅចម្ងាយប៉ុន្មានម៉ែត្រពីព្រំដែនកម្ពុជានៅឡើយទេ ដោយហេតុថា មកទល់ពេលនេះភាគីសៀមមិនទាន់បានផ្តល់ដំណឹងមកឱ្យភាគីកម្ពុជា ហើយសពក៏ពុំមាននរណាម្នាក់ អាចឆ្លងចូលទៅយកមកទឹកដីកម្ពុជាវិញបានដែរ ។ ឥទ្ធិពលឈើគ្រញូង នៅតែបង្កស្ថានភាពធ្ងន់ធ្ងរនៅលើខ្នងភ្នំដងរែក ជាក់ស្តែងកន្លងទៅថ្មីៗនេះ ប្រភពក្រៅផ្លូវការបានឱ្យដឹងកាលពីថ្ងៃទី៥ មីនា ថា ពលរដ្ឋខ្មែរចំនួន១២នាក់ ត្រូវទាហានសៀមបាញ់សម្លាប់នៅក្នុងដីសៀមចម្ងាយប្រមាណ១០គីឡូម៉ែត្រពីទឹកដីកម្ពុជា ហើយរហូតមកដល់ពេលនេះ ក៏គេមិនអាចយកសពមកទឹកដីកម្ពុជាវិញសូម្បីតែម្នាក់បានឡើយ ៕
ចែករំលែកព័តមាននេះ