ប្រទេសម៉ាឡេស៊ី បានបញ្ជូនយន្តហោះដើម្បីពិនិត្យមើលតំបន់ដែលផ្កាយរណបចិនចាប់បានរូបភាពវត្ថុអណ្តែតទឹកគួរឱ្យសង្ស័យចំនួន៣នៅជិតតំបន់ដែលប្រទេសជាច្រើនកំពុងប្រមាញ់រកយន្តហោះដឹកអ្នកដំណើរដែលបាត់ ។ រដ្ឋមន្ត្រីការពារជាតិ និងជារដ្ឋមន្ត្រីគមនាគមន៍ស្តីទី លោក Hishammudin Hussein ថ្លែងថា យន្តហោះចម្បាំងត្រូវបានបញ្ជូនទៅកាន់កន្លែងដែលផ្កាយរណបចិនចាប់បានរូបភាពដើម្បីធ្វើការស៊ើបអង្កេតមើល ។នេះគឺជាបេសកកម្មរយៈពេល៦ថ្ងៃហើយក្នុងការស្វែងរកយន្តហោះប៊ូអីុញ៧៧៧របស់ម៉ាឡេស៊ីដែលបានបាត់កាលពីថ្ងៃទី៨ មីនា នៅពេលហោះហើរចេញពីទីក្រុងគូឡាឡាំពួរទៅកាន់រដ្ឋធានីប៉េកាំង សាធារណរដ្ឋប្រជាមានិតចិន ដែលមានអ្នកដំណើរនៅលើយន្តហោះ២៣៩នាក់ ។
មន្ត្រីយោធាវៀតណាម ដែលបានជួយក្នុងការស្វែងរកជាមួយបណ្តាប្រទេសផ្សេងៗទៀតនិយាយថា រៀតណាមទើបតែបានទទួលដំណឹងពីវត្ថុដែលផ្កាយរណបចិនចាប់បាននោះកាលពីថ្ងៃព្រហស្បតិ៍ទី១៣ មីនា ហើយយើងកំពុងផ្ទៀងផ្ទាត់មើលព័ត៌មានឱ្យបានលម្អិត ។អ្នកនាំពាក្យក្រុមសម្របសម្រួលការស្រាវជ្រាវម៉ាឡេស៊ីនិយាយថា ក្រុមអាជ្ញាធរនឹងធ្វើការស៊ើបអង្កេតមើលតំបន់ដែលរកឃើញវត្ថុម៉្យាងនោះនៅក្នុងសមុទ្រចិនខាងត្បូង ។
ដើម្បីឱ្យប្រាកដដូចដែលបានរៀបរាប់ខាងលើយើងនឹងពិនិត្យមើលតំបន់ទាំងមូល ជាពិសេសតំបន់ដែលមានសញ្ញាច្បាស់លាស់នោះ ។សូមបញ្ជាក់ថា ការស្វែងរកយន្តហោះដែលបាត់នោះបានពង្រីកលើតំបន់ដែលមានផ្ទៃក្រឡា៩០.០០០គីឡូម៉ែត្រការ៉េហើយ ៕
ចែករំលែកព័តមាននេះ