ក្រុងហុងកុង ៖ និស្សិតច្រើនពាន់នាក់ស្លៀកពាក់ខ្មៅ កាលពីថ្ងៃទី២កញ្ញាបាននាំគ្នាធ្វើបាតុកម្មនៅហុងកុង ក្នុងថ្ងៃទី១នៃយុទ្ធនាការធ្វើពហិការមិនចូលរៀន រយៈពេល២សប្ដាហ៍ដើម្បីរក្សាការគាបសង្កត់លើរដ្ឋាភិបាលមូលដ្ឋានស្និទ្ធក្រុងប៉េកាំង ដែលនៅតែពុំព្រមធ្វើសម្បទានសំខាន់ណាមួយ ចំពោះចលនាដើម្បីលទ្ធិប្រជាធិបតេយ្យ។
ចុងសប្ដាហ៍កន្លងទៅកំណត់ពីអំពើហិង្សាដែលកើតមាន រវាងពួកបាតុកររ៉ាឌីកាល់និងកងកម្លាំងប៉ូលិស។ ថ្ងៃទី២កញ្ញាជាថ្ងៃដំបូងនៃការចូលរៀន បណ្ដាសិស្សវិទ្យាល័យក៏បានលើកគ្នាធ្វើបាតុកម្មដោយកាន់ដៃគ្នា បង្កើតជាច្រវាក់មនុស្សនៅមុខសាលារបស់ពួកគេ ចំណែកបណ្ដាគិលានុប្បដ្ឋាយិកាក៏នាំគ្នាធ្វើបាតុកម្ម នៅតាមមន្ទីរពេទ្យពួកគេដោយលើកប៉ង់កាតសរសេរថា យើងក្រោកឈរដើម្បីហុងកុង។
អតីតដែនដីអាណានិគមអង់គ្លេសនោះជួបប្រទះនឹងចលនាតវ៉ាចាប់តាំងពី៣ខែមកហើយ ជាមួយសកម្មភាពបាតុកម្មស្ទើររាល់ថ្ងៃ ដើម្បីបរិហារការជ្រៀតជ្រែកកាន់តែខ្លាំងរបស់ចិន ក្នុងកិច្ចការផ្ទៃក្នុង នៃតំបន់ពាក់កណ្ដាលស្វ័យភាពនោះ។ ចិនផ្ដល់ការគាំទ្រមិនងាករេ ចំពោះរដ្ឋាភិបាលក្រុងហុងកុងហើយបង្កើនការគំរាមកំហែងព្រមទាំងធ្វើការសម្លុតបំភ័យនានា។
កាលពីយប់ថ្ងៃទី១កញ្ញាទីភ្នាក់ព័ត៌មានចិនស៊ីនហួ ក្នុងបទអត្ថាធិប្បាយមួយសរសេរថា ទីបញ្ចប់ជិតមកដល់ហើយ សម្រាប់ចលនាដើម្បីលទ្ធិប្រជាធិបតេយ្យ។ តែទោះជាមានការព្រមានបែបនេះក្ដីក៏នាព្រឹកថ្ងៃទី២កញ្ញា មិនអាចរារាំងពួកបាតុករដែលស្លៀកពាក់ខ្មៅ លើកគ្នាចូលអុកឡុកក្នុងស្ថានីយមេត្រូមួយចំនួន រារាំងមិនឲ្យមេត្រូដំណើរការដឹកអ្នកដំណើរ៕ (កែសម្រួលដោយ ៖ បុប្ផា)
ចែករំលែកព័តមាននេះ