ទីក្រុងតេហេរ៉ង់ ៖ អត្រាអតិផរណាប្រចាំឆ្នាំរបស់ប្រទេសអ៊ីរ៉ង់បានហក់ឡើងរហូតដល់ ៨៨,៦% ក្នុងខែមិថុនា ដែលជាកម្រិតខ្ពស់បំផុតក្នុងរយៈពេលប៉ុន្មានខែថ្មីៗនេះ ខណៈពេលដែលសង្គ្រាមនៅមជ្ឈិមបូព៌ាបានបង្កើនសម្ពាធបន្ថែមលើសេដ្ឋកិច្ចដែលកំពុងជួបការលំបាកស្រាប់ដោយសារទណ្ឌកម្ម និងវិបត្តិអតិផរណាធ្ងន់ធ្ងរជាច្រើនឆ្នាំមកហើយ។ នេះបើតាមទិន្នន័យផ្លូវការដែលបានចេញផ្សាយកាលពីថ្ងៃទី២៧ ខែមិថុនា ឆ្នាំ២០២៦ ដែលត្រូវបានរាយការណ៍ដោយទីភ្នាក់ងារសារព័ត៌មាន AFP។
យោងតាមមជ្ឈមណ្ឌលស្ថិតិជាតិរបស់ប្រទេសអ៊ីរ៉ង់ បានបង្ហាញថា អតិផរណាអំឡុងថ្ងៃទី២២ ខែឧសភា រហូតដល់ថ្ងៃទី២១ ខែមិថុនា ឆ្នាំ២០២៦ បានហក់ឡើងយ៉ាងគំហុក ដោយតម្លៃស្បៀងអាហារកើនឡើងជាងទ្វេដង ធៀបនឹងរយៈពេលដូចគ្នា កាលពីឆ្នាំមុន នៅក្នុងប្រទេសដែលកំពុងប្រឈមមុខនឹងការកើនឡើងយ៉ាងខ្លាំងនៃតម្លៃជីវភាពរស់នៅរួចទៅហើយមួយនេះ។ ជាក់ស្តែង តម្លៃនំបុ័ង និងគ្រាប់ធញ្ញជាតិបានកើនឡើងដល់ទៅ ១៣៨,៨% ធៀបនឹងឆ្នាំមុន ខណៈទឹកដោះគោ ឈីស និងស៊ុត បានឡើងថ្លៃរហូតដល់ ១៥១,៩%។ ទិន្នន័យដដែលបានបង្ហាញថា តម្លៃសាច់ក្រហម និងសាច់បក្សីក៏បានហក់ឡើង ១៧៨,២%។
ជាមួយគ្នានោះ បើប្រៀបធៀបទៅ អត្រាអតិផរណាប្រចាំឆ្នាំមានកម្រិត ៦៨% កាលពីខែកុម្ភៈ ពោលមុនពេលមានការផ្ទុះឡើងនៃសង្គ្រាមដែលបើកការវាយប្រហារដោយសហរដ្ឋអាមេរិក និងអ៊ីស្រាអែល ប្រឆាំងនឹងប្រទេសអ៊ីរ៉ង់។ ចំណែកនៅមុននោះ អតិផរណាបានឈានដល់ ៥២,៦% ធៀបនឹងឆ្នាំមុន កាលពីខែធ្នូ ឆ្នាំ២០២៥ ដែលជាពេលមានការផ្ទុះឡើងបាតុកម្មប្រឆាំងនឹងការកើនឡើងនៃតម្លៃជីវភាព មុនពេលរីករាលដាលទៅជាការតវ៉ានយោបាយទ្រង់ទ្រាយធំ។
អស់រយៈពេលជាច្រើនឆ្នាំមកហើយ សេដ្ឋកិច្ចរបស់ប្រទេសអ៊ីរ៉ង់ ត្រូវបានញាំញីដោយវិបត្តិអតិផរណាធ្ងន់ធ្ងររ៉ាំរ៉ៃ និងការធ្លាក់ថ្លៃយ៉ាងគំហុកនៃរូបិយប័ណ្ណរីយ៉ាល់ (Rial) ដែលភាគច្រើនបណ្តាលមកពីទណ្ឌកម្មអន្តរជាតិ។ ការកើនឡើងនៃតម្លៃទំនិញអូសបន្លាយពេលយូរនេះ បានធ្វើឱ្យអំណាចទិញរបស់ប្រជាជនធ្លាក់ចុះជាលំដាប់ ខណៈដែលវិបត្តិសេដ្ឋកិច្ចកាន់តែអាក្រក់ទៅៗក្នុងរយៈពេលប៉ុន្មានខែថ្មីៗនេះ បានជំរុញឱ្យមានការតវ៉ាជាសាធារណៈយ៉ាងទូលំទូលាយ កាលពីខែធ្នូ ឆ្នាំមុន ហើយបើតាមតួលេខផ្លូវការ សង្គ្រាមនៅមជ្ឈិមបូព៌ាបានធ្វើឱ្យវិបត្តិសេដ្ឋកិច្ចរបស់អ៊ីរ៉ង់កាន់តែធ្ងន់ធ្ងរឡើងថែមទៀត៕ ប្រភព ៖ The Times Of India
ចែករំលែកព័តមាននេះ