ទីក្រុងគីនសាសា៖ ជំងឺអេបូឡាដែលបានផ្ទុះឡើងនៅសាធារណរដ្ឋកុងហ្គោនោះឥឡូវនេះបានរីករាលដាលទៅក្នុងខេត្តមួយទៀតហើយ។ ដូច្នេះជំងឺនេះឆ្លងរាលដាលទៅខេត្តទីបួន។ មានន័យថាតំបន់ភាគឦសាននៃប្រទេសនេះទាំងស្រុងត្រូវរាតត្បាតដោយអេបូឡា។ ទីនោះមានមនុស្សរស់នៅ១៥លាននាក់។ នៅក្នុងចំណោមអ្នកឆ្លងជំងឺនេះសរុប១២៧៤នាក់ ៣៦០នាក់បានស្លាប់ហើយ។ នេះបើយោងតាមតួលេខរបស់អង្គការសុខភាពពិភពលោក។ សាធារណរដ្ឋកុងហ្គោប្រកាសអំពីការផ្ទុះឡើងនៃជំងឺអេបូឡាកាលពីថ្ងៃទី១៥ ខែឧសភា។ ជំងឺអេបូឡាថ្មីនេះបង្កឡើងដោយមេរោគដែលមានសន្ដានប៊ុនឌីបាក់យ៉ូ (Bundibugyo) គ្មានវ៉ាក់សាំងសម្រាប់ចាក់បង្ការ ហើយក៏គ្មានថ្នាំសម្រាប់ព្យបាលនោះដែរ។
គេនឹងធ្វើពិសោធមេរោគសន្ដានថ្មីនៅក្នុងរង្វង់ប៉ុន្មានថ្ងៃខាងមុខ។ នេះបើយោងតាមអង្គការសុខភាពពិភពលោកដែលប្រកាសឱ្យសហគមន៍អន្តរជាតិប្រុងប្រយ័ត្នចំពោះជំងឺនេះ។ ខេត្តអ៊ីធូរី (Ituri) ជាតំបន់ឆ្លងរាលដាលជំងឺនេះខ្លាំងជាងគេ (តំបន់ក្រហម) ដោយមានអ្នកឆ្លង១១៦៥នាក់ និងស្លាប់៣០១នាក់។ ក្រុមអ្នកវិទ្យាសាស្ត្រ និងបុគ្គលិកផ្ដល់ជំនួយថ្លែងថាចំនួនអ្នកឆ្លង និងស្លាប់ពិតប្រាកដទំនងជាមានច្រើនជាងនេះ។ រហូតមកដល់ពេលនេះ ខេត្តចំនួន២ទៀតរកឃើញអ្នកឆ្លងមេរោគអេបូឡាសន្ដានថ្មី នោះគឺខេត្តគីវូខាងជើង និងគីវូខាងត្បូង។ មានសេចក្ដីរាយការណ៍ថានៅប្រទេសអ៊ូហ្កង់ដាដែលមានព្រំប្រទល់ជាប់នឹងប្រទេសកុងហ្គោនោះក៏មានអ្នកឆ្លង២០នាក់ និងស្លាប់២នាក់ផងដែរ។
ខេត្តហោតអ៊ូអេឡេ (Haut-Uele) ដែលមានព្រំប្រទល់ជាប់នឹងប្រទេសស៊ូដង់ខាងត្បូង និងសាធារណរដ្ឋអាហ្វ្រិកកណ្ដាលឥឡូវនេះក្លាយជាខេត្តទី៤ដែលឆ្លងអេបូឡា។ គេរកឃើញអ្នកឆ្លងជំងឺនេះម្នាក់បន្ទាប់ពីគាត់ធ្វើដំណើរពីទីក្រុងប៊ូនា (Bunia) នៃខេត្តអ៊ីធូរីទៅខេត្តហោតអ៊ូអេឡេ។ នេះបើយោងតាមប្រភពនៅវិទ្យាស្ថានជាតិផ្នែកស្រាវជ្រាវជីវ-វេជ្ជសាស្ត្រ។ ប្រភពមួយទៀតអះអាងថាបុគ្គលដែលឆ្លងនោះបានស្លាប់ហើយ។ អាជ្ញាធរកំពុងតាមដានថយក្រោយទៅរកប្រវត្តិនៃការឆ្លង និងកំណត់មុខសញ្ញាអ្នកដែលធ្លាប់មានទំនាក់ទំនងជាមួយបុគ្គលរូបនោះ។ អស់ជាច្រើនសប្ដាហ៍មកហើយ ភ្នាក់ងារផ្ដល់ជំនួយខិតខំទាំងត្រដាបត្រដួសដើម្បីស្វែងរកទីលានបញ្ចុះសពដ៏សមគួរដែលមានសុវត្ថិភាពល្អដើម្បីកុំឱ្យឆ្លងពីអ្នកស្លាប់ទៅអ្នកដទៃទៀត។
នៅសាធារណរដ្ឋកុងហ្គោ ក៏មិនខុសពីប្រទេសដទៃទៀតនៅទ្វីបអាហ្វ្រិកនោះដែរ ពិធីបុណ្យសពត្រូវរៀបចំជាច្រើនថ្ងៃ។ ក្រុមគ្រួសារ និងមិត្តភក្ដិរបស់អ្នកស្លាប់តែងតែទៅជូនដំណើរសពជាលើកចុងក្រោយ ហើយមានការប៉ះពាល់ផ្ទាល់ជាមួយសាកសព។ មណ្ឌលសុខភាពនានារាយការណ៍ថាពួកគេប្រឈមនឹងការផ្ទុះកំហឹងពីសាច់ញាតិអ្នកស្លាប់ដែលទាមទារឱ្យប្រគល់សាកសពដើម្បីយកទៅធ្វើបុណ្យនៅផ្ទះ៕ ប្រភព៖ Arab News
ចែករំលែកព័តមាននេះ