រដ្ឋមន្ត្រីក្រសួងធនធានទឹកនិងអភិបាលខេត្តអញ្ជើញចុះពិនិត្យច្រាំងទន្លេបាក់ស្រុតនៅក្រុងកំពង់ចាម ត្រៀមជួសជុលឱ្យមានសោភណ្ឌភាពឡើងវិញ
- កំពង់ចាម
ខេត្តកំពង់ចាម: រដ្ឋមន្ត្រីក្រសួងធនធានទឹក និងឯកឧត្តមហ៊ុនចាន់ដា អភិបាលខេត្តព្រមទាំងសហការីជាច្រើននាក់បានអញ្ជើញចុះពិនិត្យមើលស្ថានភាពច្រាំងទន្លេមេគង្គដែលបានស្ថិតនៅក្រោយអតីតសាលាសង្កាត់កំពង់ចាមក្នុងសង្កាត់កំពង់ចាម
ក្រុងកំពង់ចាម ដោយធ្វើឡើងនារសៀលថ្ងៃទី ២៩មិថុនា ឆ្នាំ២០២៦។នេះបង្ហាញពីការយកចិត្តទុកដាក់របស់ថ្នាក់ដឹកនាំខេត្តក៏ដូចជាក្រសួងដើម្បីធ្វើយ៉ាងណាកុំឲ្យច្រាំងបាក់បន្តទៀតប៉ះពាល់ដល់លំនៅដ្ឋានពលរដ្ឋ។
ឯកឧត្តមអ៊ុន ចាន់ដា អភិបាលខេត្តមានប្រសាសន៍ឲ្យដឹងថា: ការជួសជុលច្រាំងទន្លេឡើងវិញមិនអាចជួសជុលឱ្យបានឆាប់ៗនោះទេព្រោះថាការងារបច្ចេកទេសត្រូវបានក្រសួងធនធានទឹកនិងឧតុនិយមទើបតែសិក្សាគម្រោងបានក្នុងចន្លោះ៨០ទៅ៩០% ប៉ុណ្ណោះ។ហើយណាមួយចូលមកដល់ខែនេះកម្ពស់ទឹកទន្លេមេគង្គ បានចាប់ផ្ដើមហក់ឡើងជាបន្តបន្ទាប់ដែលធ្វើឲ្យប៉ះពាល់រំខានដល់ការជួសជុល។
ឯកឧត្តមអភិបាលខេត្តមមានប្រសាសន៍បន្តថា បើតាមការពិនិត្យមើលជាក់ស្ដែងគឺដំណើរការស្ថាបនាច្រាំងទន្លេឡើងវិញអាចនឹងធ្វើឡើងនៅក្នុងចុងឆ្នាំ២០២៦ ពេលដែលទឹកទន្លេបានចាប់ផ្ដើមស្រកទៅវិញអំណោយផលដល់ក្រុមការងារបច្ចេកទេសនៃការជួសជុល។
គួររំលឹកថា ហេតុការណ៍បាក់ច្រាំងបានកើតឡើងនៅវេលាម៉ោងជាង១២យប់ថ្ងៃទី៣០រំលងអធ្រាត្រឈានចូលព្រឹកថ្ងៃទី៣១ ខែមករាឆ្នាំ២០២៦ គ្រានោះគេឃើញវត្តមានឯកឧត្តមអ៊ុន ចាន់ដា អភិបាលខេត្តរួមនិងសហការីបានអញ្ជើញចុះពិនិត្យជាបន្ទាន់ភ្លាមៗ ហើយបានណែនាំហើយមន្ត្រីជំនាញធនធានទឹកចុះសិក្សា ដើម្បីជួសជុលបន្ទាន់ចៀសវាងកុំឲ្យរដូវវស្សាចូលមកដល់បង្ករផលវិបាក។
នាឱកាសនោះ ឯកឧត្តម អ៊ុន ចាន់ដា អភិបាល នៃគណៈអភិបាលខេត្ត បានចុះត្រួតពិនិត្យ និងហាមដល់បងប្អូន ប្រជាពលរដ្ឋ មិនឲ្យធ្វើដំណើរឆ្លងកាត់ និងលក់ដូរនៅតាមមាត់ទន្លេ នៅក្បែរកន្លែងដែលរងការបាក់ស្រុតនោះ ជៀសវាងមានគ្រោះថ្នាក់ផ្សេងៗដែលបានដាក់កម្លាំងប្រជាការពារមាននគរបាលនិងអាវុធហត្ថ យាមប្រចាំការ ២៤ម៉ោងលើ២៤ម៉ោងមិនឲ្យពលរដ្ឋធ្វើដំណើរឆ្លងកាត់តំបន់នេះ។
ច្រាំងទន្លេដែលរងការបាក់ស្រុតមានសួនច្បារក្រាលការ៉ូឡា ប្រវែងប្រមាណជិត១០០ម៉ែត្រ ទីតាំងនេះត្រូវបានបិទមិនឱ្យចរាចរណ៍តាំងពីពេលកើតហេត្តរហូតមកដល់បច្ចុប្បន្ន ព្រោះតែខ្លាចបង្កគ្រោះថ្នាក់ដល់អ្នកធ្វើដំណើរ។ចំពោះទំហំថវិកាដែលត្រូវស្ថាបនាច្រាំងទន្លេឡើងវិញចំណាយប្រមាណខ្ទង់ជាង២០ លានដុល្លារ មានសួនច្បារកន្លែងហាត់ប្រាណ កន្លែងប្រគុំតន្ត្រី ដែលមានភាពស្រស់ស្អាតជាងមុន ៕
ចែករំលែកព័តមាននេះ