ឃាត់ខ្លួនក្មេ.ងទំនើ.ងបង្កភាពអនាធិបតេយ្យតាមសាធារណៈបន្តបន្ទាប់ជាង១០នាក់ កោរសក់ ដើរជើងទា និងលោតកង្កែប
- កំពង់ស្ពឺ
ខេត្តកំពង់ស្ពឺ៖ ក្រុមក្មេងទំនើងចំនួន១១នាក់ ត្រូវបានកម្លាំងកងរាជអាវុធហត្ថខេត្តកំពង់ស្ពឺធ្វើការឃាត់ខ្លួនបន្តបន្ទាប់គ្នា ខណៈដែលក្រុមក្មេងទំនើងបានធ្វើសកម្មភាពជិះម៉ូតូជាក្រុមបង្ករភាពរញេររញៃ និងបង្ហោះម៉ូតូតាមផ្លូវសាធារណៈយ៉ាងអនាធិបតេយ្យ បង្កការភ័យខ្លាចដល់ប្រជាពលរដ្ឋកំពុងធ្វើដំណើរ និងប៉ះពាល់សន្តិសុខសង្គមជាតិ។
ការឃាត់ខ្លួនក្រុមក្មេងទំនើងខាងលើ ដោយទទួលបានការអនុញ្ញាតពីសំណាក់ លោក ជាម ចន្ទ័សោភ័ណ អភិបាលខេត្ត ក្រោមបទបញ្ជាយ៉ាងម៉ឺងម៉ាត់ពីសំណាក់លោក មេបញ្ជាការ កងរាជអាវុធហត្ថខេត្តកំពង់ស្ពឺ ព្រមទាំងមានការសម្របសម្រួលនីតិវិធីពី ឯកឧត្តម ព្រះរាជអាជ្ញាអមសាលាដំបូងខេត្ត កម្លាំងជំនាញកងរាជអាវុធហត្ថខេត្តកំពង់ស្ពឺ បានធ្វើការបង្ក្រាប និងឃាត់ខ្លួនក្មេងទំនើងបានជាបន្តបន្ទាប់ចំនួន១១នាក់ និងត្រូវអនុវត្តតាមវិធានការឱ្យបានតឹងរឹងបំផុត ទាំងវិធានការរដ្ឋបាល និងវិធានការច្បាប់។ នៅវេលាម៉ោង១រំលងអាធ្រាត្រឈានចូលថ្ងៃទី២៨ ខែមិថុនា ឆ្នាំ២០២៦ នៅត្រង់ចំណុចខាងលិចវត្តម្រុំខាងជើង ស្ថិតនៅក្នុងភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ មានក្មេងទំនើងមួយក្រុម បានធ្វើការបង្ហោះម៉ូតូ និងជិះម៉ូតូជាក្រុមបង្ករភាពរញេរញៃតាមផ្លូវសាធារណៈ ក៏ត្រូវបានកម្លាំងកងរាជអាវុធហត្ថខេត្តធ្វើការឃាត់ខ្លួនជនសង្ស័យបានចំនួន៧នាក់។
ជនសង្ស័យទី១-មានឈ្មោះ ទេម ទឹម ភេទប្រុស អាយុ២០ឆ្នាំ មុខរបរកម្មកររោងចក្រ ទី២-ឈ្មោះ ឯម សំណាង ភេទប្រុស អាយុ២១ឆ្នាំ មុខរបរកម្មកររោងចក្រ, ទី៣-ឈ្មោះ ឃ្លាំង ឡាយហៀង ភេទប្រុស អាយុ២០ឆ្នាំ មុខរបរកម្មកររោងចក្រ, ទី៤- ឈ្មោះ ឃឿម សំណាង ភេទប្រុស អាយុ២០ឆ្នាំ មុខរបរកម្មកររោងចក្រ , ទី៥-ឈ្មោះ យុន ធាវីត ភេទប្រុស អាយុ២០ឆ្នាំ មុខរបរកម្មកររោងចក្រ ,ទី៦-ឈ្មោះ គង់ គីមីត ភេទប្រុស អាយុ២១ឆ្នាំ មុខរបរកម្មកររោងចក្រ ,និងទី៧-ឈ្មោះ ឃឿន មករា ភេទប្រុស អាយុ២៣ឆ្នាំ មុខរបរកម្មកររោងចក្រ ។
មន្ត្រីអាវុធហត្ថខេត្តកំពង់ស្ពឺបានបន្តឲ្យដឹងថាបន្ទាប់មកនៅវេលាម៉ោង១និង១០នាទី រំលងអធ្រាត្រថ្ងៃទី២៨ ខែមិថុនា ឆ្នាំ២០២៦ នៅចំណុចផ្លូវជាតិលេខ១០៥ ស្ថិតនៅភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ក៏មានករណីក្រុមក្មេងទំនើងមួយក្រុមទៀតកំពុងធ្វើសកម្មភាពជិះម៉ូតូជាក្រុមបង្ករភាពរញេររញៃ និងបង្ហោះម៉ូតូតាមផ្លូវសាធារណៈយ៉ាងអនាធិបតេយ្យ កម្លាំងជំនាញបានធ្វើការឃាត់ខ្លួនជនសង្ស័យបានចំនួន ៤នាក់ បន្ថែមទៀត។ ដែលមានឈ្មោះដូចជា, ទី១-ឈ្មោះ អន ឡេង ប្រុស អាយុ២០ឆ្នាំ មុខរបរកម្មកររោងចក្រ ទី២-ឈ្មោះ ពយ បារាំង ភេទប្រុស អាយុ១៦ឆ្នាំ មុខរបរកម្មករផ្សាដែក ទី៣-ឈ្មោះ រ៉េត រី ភេទប្រុស អាយុ១៧ឆ្នាំ មុខរបរកម្មករផ្សាដែក, និងទី៤-ឈ្មោះ ខាត់ កុសល់ ភេទប្រុស អាយុ១៩ឆ្នាំ មុខរបរមិនពិតប្រាកដ ។
ក្រោយឃាត់ខ្លួនក្រុមក្មេងទំនើងទាំង១១នាក់ខាងលើកម្លាំងជំនាញធ្វើការដកហូតវត្ថុតាងរួមមាន ម៉ូតូចំនួន៥គ្រឿង ទី១-ម៉ាកហុងដាសេ១២៥ ពណ៌ស ស៊េរីឆ្នាំ២០២២ ពាក់ផ្លាកលេខ កំពង់ស្ពឺ 1V-4664 , ទី២-ម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០២៥ ពាក់ផ្លាកលេខ ភ្នំពេញ 1LL-5214 ,ទី៣-ម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០២៦ ពាក់ផ្លាកលេខ ភ្នំពេញ 1MH-7206, ទី៤-ម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០២៥ ពាក់ផ្លាកលេខ កំពង់ស្ពឺ 1Z-4834, និងទី៥-ម៉ាក NEX CROSS ពណ៌ខ្មៅ ស៊េរីឆ្នាំ២០២៦ ពាក់ផ្លាកលេខ កំពង់ស្ពឺ 1AC-7460) , ទូរស័ព្ទដៃ ចំនួន៧គ្រឿង (ម៉ាក IPHONE ចំនួន៦គ្រឿង, និងម៉ាក INFINIX ចំនួន១គ្រឿង)។
បច្ចុប្បន្នក្រុមក្មេងទំនើងដែលបង្ហោះម៉ូទូទាំងនេះ ត្រូវបានកម្លាំងកងរាជអាវុធហត្ថខេត្តកំពង់ស្ពឺ យកមកអប់រំណែនាំនិងធ្វើកិច្ចសន្យាចំពោះមុខ ម្តាយ ឪពុកនិងអាណាព្យាបាល កោសក់ ដើរជើងទា និងលោតកង្កែប ដើម្បីបញ្ឈប់រាល់សកម្មភាពទំនើងទាំងនេះដែលនាំឱ្យប៉ះពាល់សណ្តាប់សង្គម ជាហេតុនាំឲ្យមានការបំផ្លាញទ្រព្យសម្បត្តិក៏ដូចជាកិត្តិយសគ្រួសារ ព្រមទាំងបង្ករការភ័យខ្លាចដល់អ្នកជុំវិញខ្លួន បង្កភាពអនាធិបតេយ្យក្នុងសង្គម។
ចំណែកម៉ូតូដែលជាមធ្យោបាយធ្វើសកម្មភាព ត្រូវបានកម្លាំងជំនាញធ្វើការដកហូតយករក្សាទុករយៈពេល៣ខែ នៅទីបញ្ជាការកងរាជអាវុធហត្ថខេត្តកំពង់ស្ពឺ ៕
ចែករំលែកព័តមាននេះ