សេន រ៉ានុត រំភើបលាយទឹកភ្នែក ក្រោយមានឱកាសជួបសម្តេចតេជោដោយផ្ទាល់
- ភ្នំពេញ
រាជធានីភ្នំពេញ ៖ តារាចម្រៀងលោក សេន រ៉ានុត បានសម្តែងក្តីរីករាយ និងរំភើបលាយទឹកភ្នែក បន្ទាប់ពីរូបលោកទទួលបានការអនុញ្ញាតដ៏ខ្ពង់ខ្ពស់ពីសម្តេចតេជោ ហ៊ុន សែន ប្រធានព្រឹទ្ធសភា ដើម្បីជួបដោយផ្ទាល់នៅគេហដ្ឋានរបស់សម្តេច នៅថ្ងៃទី២៩ ខែមិថុនា ឆ្នាំ២០២៦ បន្ទាប់ពីតារារូបនេះបានមកលេងស្រុកខ្មែរ ក្រោយចេញទៅរស់នៅអាមេរិកអស់ជាច្រើនឆ្នាំ ។
តារាចម្រៀងរូបនេះ បានបង្ហោះរូបភាពជាច្រើនសន្លឹកនៅលើបណ្តាញសង្គម ដោយបង្ហាញភាពសកម្មភាពនានានៅក្នុងឱកាសដែលរូបលោក និងក្រុមគ្រួសារបានជួបប្រាស្រ័យទាក់ទងគ្នាដោយផ្ទាល់ជាមួយសម្តេចតេជោ ដោយភាពរីករាយក្រៃលែង ។
ជាមួយរូបភាពទាំងអស់នោះ លោក សេន រ៉ានុត ក៏បានភ្ជាប់ជាមួយនឹងសំណេរថា សូមគោរពអរគុណដល់សម្តេចពុក លោកពុកពិតជាផ្តល់នៅមហាកិត្តិយសម្រាប់គ្រួសារកូន ខ្លាំងណាស់ ។
កូនសូមគោរពអរគុណ អរគុណលោកពុក អ្នកម៉ែ ដែលផ្តល់តម្លៃនឹងពេលវេលា ចំពោះកូនចៅរៀបរាប់មិនអស់នោះទេ ខ្ញុំបានជួបលោកក្នុងរយៈពេលជិតពីរម៉ោងបានឃើញស្នាមញញឹម លាយនឹងទឹកភ្នែក ទឹកភ្នែកដ៏មានអត្ថន័យ ។🙏🙏🙏
សូមគោរពអរគុណ បុត្រា បុត្រី ព្រមទាំងចៅប្រុស ចៅស្រី របស់លោកពុក អ្នកម៉ែ ព្រមទាំងគ្រួសារ លោកពុកអ្នកម៉ែទាំងមូល សូមជួបតែសេចក្តីសុខ សេចក្តីចំរើន សូមទទួលបាននូវ សុខភាពល្អ ជន្មាយុយឺនយូរ ឈ្នះអស់រាល់មារសត្រូវឈ្លានពាន ។
ជាការកត់សម្គាល់ ក្រោយឃើញលោក សេន រ៉ានុត បង្ហោះរូបភាពជួបជាមួយសម្តេចតេជោដោយផ្ទាល់នាពេលនេះ គេឃើញមានមហាជន ជាពិសេស មិត្តភក្តិទាំងក្នុងនិងក្រៅសិល្បៈជាច្រើនបានចូលខមមិនដោយម្នាក់ៗ សម្តែងការអបអរសាទរចំពោះតារាចម្រៀងរូបនេះ និងក្រុមគ្រួសារក្នុងឱកាសដ៏មហាកិត្តិយស ដែលសម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី និងជាប្រធានព្រឹទ្ធសភា អនុញ្ញាតអោយចូលជួបសំដែងការគួរសមក្នុងបរិយាកាសរីរាយក្រៃលែងនាពេលនេះ ។
គួរបញ្ជាក់ថា លោក សេន រ៉ានុត គឺជាអតីតតារាចម្រៀងប្រុសដ៏ល្បីល្បាញមួយរូបប្រចាំ ផលិតកម្មរស្មីស្ទឹងសង្កែ កាលពីអំឡុងជាង១០ឆ្នាំមុន ខណៈពេលលោកទទួលបានការគាំទ្រយ៉ាងខ្លាំងពីសំណាក់មិត្តៗយុវវ័យតាមរយៈបទចម្រៀង រូបរាងសង្ហា និងទឹកដមសំឡេងពីរោះ ។
យ៉ាងណា តារាចម្រៀងរូបនេះ បានសម្រេចចិត្តចាកចេញពីសិល្បៈ ដើម្បីចេញទៅរស់នៅ និងកសាងគ្រួសារនៅលើទឹកដីអាមេរិក ដែលគិតមកទល់នាពេលនេះមានរយៈពេលជាង១០ឆ្នាំហើយ ខណៈពេលដែលរស់នៅលើទឹកអាមេរិកនោះ ក្រៅពីប្រកបអាជីវកម្មលក់គ្រឿងអលង្ការ រូបលោកក៏តែងតែបង្ហាញវត្តមានច្រៀងនៅក្នុងកម្មវិធីនានាសម្រាប់បងប្អូនខ្មែរដែលរស់នៅទីនោះផងដែរ ៕
ចែករំលែកព័តមាននេះ