ខេត្តព្រះសីហនុ ៖ ដោយមានការដឹកនាំចង្អុលបង្ហាញដ៏ខ្ពង់ខ្ពស់ពីឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ និងតាមកាណែនាំពីលោកឧត្ដមសេនីយ៍ត្រី ណុប បញ្ញា ស្នងការរង ទទួលផែនការងារនគរបាលព្រហ្មទណ្ឌ នៅយប់ថ្ងៃទី២៧ ខែមិថុនា ឆ្នាំ២០២៦ វេលាម៉ោង២០:៣៥នាទី កម្លាំងប៉ុស្តិ៍នគរបាលរដ្ឋបាលសង្កាត់រាម បានសហការជាមួយកម្លាំងយោធាមូលដ្ឋានសមុទ្ររាម ធ្វើការល្បាតតាមភូមិសាស្ត្រស្មុគស្មាញ លុះមកដល់ចំណុចក្បាលហុង ស្ថិតក្នុងភូមិអុង សង្កាត់រាម ក្រុងកំពង់សោម ខេត្តព្រះសីហនុ បានធ្វើការឃាត់ជនសង្ស័យ ១នាក់ ដែលកំពុងធ្វើសកម្មភាពលួចកាត់ខ្សែរភ្លើង តាមបណ្តោយផ្លូវបេតុង រួចបន្តឃាត់ខ្លួនបក្ខពួកម្នាក់ទៀត ។
ជនសង្ស័យទាំង២នាក់ រួមមាន ៖
១. ឈ្មោះ លី ស៊ីថា ភេទប្រុស អាយុ ៣៥ឆ្នាំ ជនជាតិខ្មែរ មុខរបរមិនពិតប្រាកដ ។
២. ឈ្មោះ ម៉ាន់ ល័ក្ខ ភេទប្រុស អាយុ ៣១ឆ្នាំ ជនជាតិខ្មែរមុខរបរកម្មករសំណង់ ។
អ្នកទាំង ០២នាក់ខាងលើ ស្នាក់នៅចំណុចក្បែរវត្តអូរត្រេះ ភូមិ៦ សង្កាត់៤ ក្រុងព្រះសីហនុ ខេត្តព្រះសីហនុ។
វត្ថុតាងដកហូតរួមមាន៖
-ម៉ូតូចំនួន ២គ្រឿង(ជិះធ្វើសកម្មភាព)
១. ម៉ាក់សង់ C125 ពណ៌ខ្មៅ ផលិតឆ្នាំ2026 ពាក់ផ្លាកភ្នំពេញ1MB.1137
២. ម៉ាកសង់ C125ពណ៌ខ្មៅ ផលិតឆ្នាំ2013 ពាក់ផ្លាកលេខភ្នំពេញ1CA.4505
-ខ្សែភ្លើងមួយចំនួន
-កូនកាំបិតចំនួន ៣ដើម
-ដង្កាប់ចំនួន ៣ដើម
-ទូរស័ព្ទចំនួន ៣គ្រឿង
-ពិលចំនួន ១គ្រឿង
ក្រោយពីសមត្ថកិច្ចធ្វើការសួរនាំ ជនសង្ស័យទាំង ០២នាក់ បានសារភាពថា ខ្លួនពិតជាបានធ្វើសកម្មភាពលួចកាត់ខ្សែភ្លើងនេះ (យ៉ាងសកម្ម)ពិតប្រាកដមែន ព្រមទាំងបានប្រើប្រាស់គ្រឿងញៀនថែមទៀតផង (ធ្វើតេស្ត+វិជ្ជមានសារធាតុញៀន) ។ ក្នុងនោះសមត្ថកិច្ចនគរបាលយើងខ្ញុំបានទទួលពាក្យបណ្តឹង ចំនួន៤ ពីប្រជាពលរដ្ឋ នៅទីតាំងកើតហេតុផងដែរ ។
បច្ចុប្បន្នជនសង្ស័យទាំង០២នាក់ខាងលើ ត្រូវបានផ្នែកជំនាញ នៃអធិការដ្ឋាននគរបាលក្រុងកំពង់សោម កសាងសំណុំរឿង បញ្ជូនទៅការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តព្រះសីហនុ បន្តតាមនីតិវិធី ៕
ចែករំលែកព័តមាននេះ