ទីក្រុងវ៉ាស៊ីនតោន៖ លោកវីលបឺរ៉ូសដែលធ្លាប់ធ្វើការជារដ្ឋមន្ត្រីក្រសួងពាណិជ្ជកម្មកាលពីជំនាន់លោកដូណាល់ត្រាំកាន់តំណែងអាណត្តិទីមួយថ្លែងថាគាត់គ្មានការសង្ស័យឡើយថាប្រសិនគណបក្សប្រជាធិបតេយ្យទទួលជ័យជម្នះនៅក្នុងការបោះឆ្នោតសភានាខែវិច្ឆិកាខាងមុខនេះ ពួកគេនឹងចាត់ការបោះឆ្នោតដកតំណែងលោកត្រាំ។ ប្រសិនបើក្រុមប្រជាធិបតេយ្យឈ្នះឆ្នោតនៅព្រឹទ្ធសភា ពេលនោះដំណើរការដកតំណែងនឹងទទួលបានជោគជ័យ។ វីលបឺរ៉ូសថ្លែងបន្តទៀតថាសម្រាប់លោកត្រាំ ការប្រថុយប្រថានរបស់លោកមានកម្រិតខ្ពស់។
ប្រសិនបើក្រុមប្រជាធិបតេយ្យទទួលបានសំឡេងច្រើនគ្រប់គ្រាន់នៅរដ្ឋសភា ពួកគេនឹងរៀបចំបោះឆ្នោតដកតំណែងលោកត្រាំ ហើយប្រសិនបើពួកគេមានសំឡេងភាគច្រើននៅព្រឹទ្ធសភាថែមទៀត ពួកគេនឹងនាំលោកត្រាំទៅកាត់ទោសតែម្ដង។ គេមិនត្រូវភ្លេចថាកាលពីអាណត្តិទី១ លោកត្រាំត្រូវក្រុមប្រជាធិបតេយ្យកោះប្រជុំសភាដើម្បីបោះឆ្នោតដកតំណែងចំនួន២ដង។ ករណីទី១កើតឡើងនៅឆ្នាំ២០១៩ ពួកគេចោទប្រកាន់ថាលោកបានរំលោភអំណាច និងរារាំងការអនុវត្តនីតិវិធីរបស់សភាខង់ហ្ក្រែស (រដ្ឋសភា និងព្រឹទ្ធសភា)។ ពួកគេធ្វើដូច្នេះបន្ទាប់ពីលោកត្រាំជំរុញឱ្យអ៊ុយក្រែនស៊ើបអង្កេតលោកចូបៃដឹន និងកូនប្រុសរបស់គាត់ (ហាន់ថឺ បៃដឹន -Hunter Biden)។
ករណីទី២កើតឡើងនៅឆ្នាំ២០២១ពាក់ព័ន្ធនឹងករណីដែលលោកត្រាំនិយាយញុះញង់ឱ្យក្រុមអ្នកគាំទ្រលោកប្រព្រឹត្តអំពើហិង្សាប្រឆាំងនឹងរដ្ឋាភិបាលអាមេរិកមុនអំពើបះបោរនៅវិមានរដ្ឋសភាកាលពីថ្ងៃទី៦ ខែមករា ឆ្នាំ២០២១។ ការប៉ុនប៉ងដកតំណែងលោកត្រាំសុទ្ធតែធ្វើបានជោគជ័យនៅរដ្ឋសភាព្រោះគណបក្សប្រជាធិបតេយ្យមានសំឡេងភាគច្រើននៅរដ្ឋសភា។ លុះសំណុំរឿងនេះឡើងទៅដល់ព្រឹទ្ធសភា ពួកគេមិនទទួលជោគជ័យទេព្រោះគណបក្សសាធារណរដ្ឋមានសំឡេងភាគច្រើននៅព្រឹទ្ធសភា។
សមាជិកគណបក្សសាធារណរដ្ឋជាន់ខ្ពស់មួយចំនួនឱ្យតម្រុយថាក្រុមប្រជាធិបតេយ្យមុខជាប្រើស្នៀតនេះជាបន្តទៀតក្រោយការបោះឆ្នោតសភា។ ប្រធានរដ្ឋសភាអាមេរិក លោកម៉ាយចនសុន (មកពីគណបក្សសាធារណរដ្ឋ) ទទួលស្គាល់ថាវាជាហានិភ័យមួយប្រសិនបើគណបក្សសាធារណរដ្ឋចាញ់ឆ្នោតនៅរដ្ឋសភា។ លោកថាមិនត្រឹមតែលោកត្រាំទេ ក្រុមប្រជាធិបតេយ្យនឹងឆ្លៀតឱកាសដែលពួកគេមានប្រៀបនៅរដ្ឋសភា (ប្រសិនបើឈ្នះឆ្នោតនាពេលខាងមុខ) ដើម្បីចាត់ការអ្នកដទៃទៀតដូចជាសមាជិកគ្រួសាររបស់ត្រាំ រួមទាំងសហការីរបស់គាត់ និងសមាជិកគណៈរដ្ឋមន្ត្រី ៕ ប្រភព៖ Newsweek
ចែករំលែកព័តមាននេះ