ទីក្រុងវ៉ាស៊ីនតោន៖ អាមេរិកថ្លែងថាគម្រោងជួបគ្នាកម្រិតខ្ពស់ដើម្បីដោះស្រាយបញ្ហាអ៊ីរ៉ង់នឹងរៀបចំនៅទីក្រុងដូហា (Doha) ប្រទេសកាតា នាថ្ងៃអង្គារនេះហើយ។ បេសកជនពិសេសរបស់លោកត្រាំគឺលោកស្ទីវវីតខូស និងកូនប្រសារបស់លោកត្រាំនឹងចូលរួមនៅក្នុងកិច្ចប្រជុំនោះ។ ការជួបគ្នាកម្រិតបច្ចេកទេសក៏នឹងកើតមានឡើងនៅក្នុងឱកាសនោះផងដែរ។ លោកដូណាល់ត្រាំបង្ហោះសារនៅលើបណ្ដាញសង្គមថាអ៊ីរ៉ង់ជាអ្នកស្នើសុំជួបគ្នា។ លោកថាការជួបគ្នានឹងរៀបចំឡើងនៅរដ្ឋធានីរបស់ប្រទេសកាតា។ លោកសរសេរដោយសង្ខេបតែត្រឹមនេះដោយមិនបានផ្ដល់សេចក្ដីលម្អិតនោះទេ។
មួយសន្ទុះក្រោយមក មន្ត្រីទទួលបន្ទុកខាងទំនាក់ទំនងព័ត៌មាន និងជាអ្នកនាំពាក្យសេតវិមាន លោកស្រីខារ៉ូឡាញ ឡេវីត (Karoline Leavitt) បញ្ជាក់ប្រាប់ទូរទស្សន៍ហ្វក់ថា (Fox) លោកវីតខូស និងកូនប្រសាលោកត្រាំនឹងចូលរួមនៅក្នុងកិច្ចប្រជុំនេះ។ លោកទាំង២នឹងជិះយន្តហោះទៅរដ្ឋធានីដូហាដើម្បីចូលរួមកិច្ចប្រជុំកម្រិតខ្ពស់នៅសប្ដាហ៍នេះដើម្បីបន្តការពិភាក្សាគ្នាអំពីអនុស្សារណៈយោគយល់គ្នា។ លោកស្រីថ្លែងបន្តទៀតថាការពិភាក្សាកម្រិតខ្ពស់ និងកម្រិតបច្ចេកទេសក៏នឹងរៀបចំផងដែរ។
តាមដែលយើងដឹង យើងប្រកាន់ខ្ជាប់នូវការបិទបញ្ចប់បទឈប់បាញ់ ហើយយើងប្រកាន់ខ្ជាប់ថាអំពើហិង្សាត្រូវតែទទួលរងការតបតដោយអំពើហិង្សាត្រឡប់ទៅវិញ។ សូមរំលឹកថាកាលពីថ្ងៃទី១៧ ខែមិថុនា អាមេរិក និងអ៊ីរ៉ង់បានចុះហត្ថលេខាលើអនុស្សារណៈយោគយល់គ្នា១៤ចំណុចដែលមានគោលដៅបិទបញ្ចប់សង្គ្រាមអ៊ីរ៉ង់ជាស្ថាពរ។ ក្នុងនោះ ក៏មានលក្ខខណ្ឌនិយាយអំពីការបិទបញ្ចប់អរិភាពនឹងគ្នា និងការបើកច្រកសមុទ្រហ័រម៉ូសឡើងវិញផងដែរ។
ប៉ុន្តែការវាយសងសឹកគ្នាទៅវិញទៅមកកាលពីសប្ដាហ៍មុននោះធ្វើឱ្យគេព្រួយបារម្ភថាអនុស្សារណៈនោះអាចនឹងបរាជ័យ។ ប្រទេសទាំង២យល់ព្រមវិលចូលតុចរចាវិញបន្ទាប់ពីវាយបកគ្នាទៅវិញទៅមក។ មុនដំបូង អ៊ីរ៉ង់វាយប្រហារកប៉ាល់ដឹកទំនិញមួយគ្រឿងក្រោមហេតុផលថាកប៉ាល់នោះមិនស្ដាប់តាមការណែនាំរបស់អ៊ីរ៉ង់។ ក្រោយមក អាមេរិកក៏ចាត់ការវាយប្រហារអ៊ីរ៉ង់វិញ។ ភាគីទាំង២ចោទគ្នាទៅវិញទៅមកថាជាអ្នករំលោភបទឈប់បាញ់។ លោកស្រីឡេវីតថ្លែងប្រាប់ទូរទស្សន៍ហ្វក់ថាកប៉ាល់ពាណិជ្ជកម្មបានរងការវាយប្រហារ។ ហេតុនេះលោកដូណាល់ត្រាំបានចេញបញ្ជាផ្ទាល់ថាត្រូវតែឆ្លើយតបនឹងទង្វើនេះ។ ការឆ្លើយតបបែបនេះនឹងកើតមានជាបន្តទៀត។ ប៉ុន្តែយើងមិនចង់ឃើញរឿងនេះកើតឡើងទេ។ លោកត្រាំចង់ឃើញសន្តិភាពកើតមានឆាប់ៗនេះ៕ ប្រភព៖ Channel News Asia
ចែករំលែកព័តមាននេះ