ទីក្រុងវ៉ាស៊ីនតោន៖ ប្ដីប្រពន្ធ២នាក់នៅអាមេរិកប្រឈមនឹងការចោទប្រកាន់ពីបទមនុស្សឃាត និងបៀតបៀនកូនខ្លួនឯងបន្ទាប់ពីពួកគេខិតខំថែបំប៉នបញ្ចុកចំណីកូនឱ្យឆាប់ធំធាត់រហូតដល់គ្នាស្លាប់ទាំងវ័យក្មេង។ កូនប្រុសរបស់ពួកគេទើបតែមានអាយុ៧ឆ្នាំប៉ុណ្ណោះ ប៉ុន្តែកុំមើលទម្ងន់របស់គេរហូតដល់ជាង១រយគីឡូក្រាម។ ប៉ាម៉ាក់របស់គេច្រើនបំពោរបំប៉នកូនរបស់ខ្លួនដោយដំឡូងចៀន និងអាហារសម្រន់ដទៃទៀត។ នៅទីបំផុត កូនក៏ធំធាត់ជ្រុលពេករហូតដល់កើតជំងឺធ្វើទុក្ខបេះដូង និងក្ស័យសង្ខារបាត់ទៅ។
បុរសជាឪពុកឈ្មោះដេមៀន អូប្រៀន (Damien O’Brien) វ័យ៤០ឆ្នាំ និងស្ត្រីជាម្ដាយឈ្មោះចេស៊ីកា អូប្រៀន (Jessica O’Brien) វ័យ៤១ឆ្នាំ រស់នៅរដ្ឋមីស៊ីហ្គែន។ អ្នកទាំង២ត្រូវបានរដ្ឋអាជ្ញាចោទប្រកាន់ពីបទមនុស្សឃាតថ្នាក់ទី២ ធ្វើទារុណកម្ម និងបៀតបៀនកូនកម្រិតទី២។ បទចោទនេះពាក់ព័ន្ធនឹងការស្លាប់កូនរបស់ពួកគេឈ្មោះកាស់ស្ពៀ (Caspia) កាលពីឆ្នាំមុន។ យោងតាមការចុះផ្សាយរបស់ទស្សនាវដ្ដីភីផល (People) រដ្ឋអាជ្ញាអះអាងថាចេស៊ីកាបានហៅទូរស័ព្ទទៅលេខ៩១១កាលពីថ្ងៃទី៤ ខែវិច្ឆិកា ឆ្នាំ២០២៥ដើម្បីប្រាប់សមត្ថកិច្ចថាកូនប្រុសរបស់ខ្លួនដកដង្ហើមស្ទើរស្លាប់ស្ទើររស់។
ភ្នាក់ងារសង្គ្រោះបន្ទាន់ក៏ធ្វើដំណើរទៅដល់ផ្ទះជួលដែលពួកគេស្នាក់នៅ។ ទៅដល់ឃើញកុមារនោះ ស្ថិតនៅក្នុងស្ថានភាពធ្ងន់ធ្ងរណាស់ទៅហើយ។ ជាមួយនឹងទម្ងន់រហូតដល់១១៥គីឡូក្រាមនៅក្នុងវ័យ៧ឆ្នាំពិតជាមិនធម្មតាទេ។ កូននោះមិនអាចកម្រើកខ្លួនបានទាល់តែសោះ។ គេបានបញ្ជូនគាត់ទៅមន្ទីរពេទ្យជាបន្ទាន់។ ប៉ុន្តែគួរឱ្យស្ដាយ គាត់ក៏បានលាចាកលោកនេះទៅនៅក្នុងរយៈពេលត្រឹមតែប៉ុន្មានម៉ោងប៉ុណ្ណោះបន្ទាប់ពីនោះ។ លទ្ធផលនៃការធ្វើកោសល្យវិច័យបង្ហាញថាក្មេងប្រុសឈ្មោះកាស់ស្ពៀស្លាប់ដោយសារជំងឺបេះដូងរីក។ បញ្ហាធាត់ខ្លាំងជាកត្តាសំខាន់ដែលធ្វើឱ្យគាត់ស្លាប់។
អាជ្ញាធរអះអាងថាកុមារវ័យ៧ឆ្នាំរូបនេះត្រូវដេកជាប់ជាប្រចាំនៅលើគ្រែ និងមិនដែលទៅសាលារៀនសូម្បីតែម្ដង។ អាហារដែលគាត់ញ៉ាំភាគច្រើនបំផុតគឺដំឡូងចៀន និងអាហារសម្រន់។ ទូរទស្សន៍ស៊ីប៊ីអែស (CBS) ផ្សាយថាប្ដីប្រពន្ធទាំង២នាក់នេះត្រូវតុលាការចោទប្រកាន់ពីបទមិនរវីរវល់ទាល់តែសោះចំពោះជនរងគ្រោះ។ ពួកគេមិនខ្វាយខ្វល់នឹងការផ្ដល់ចំណីអាហារមានអាហារូបត្ថម្ភសមរម្យ, ពួកគេហាមឃាត់មិនឱ្យកូនហាត់ប្រាណ និងមិនបានរៀបចំទីកន្លែងស្នាក់នៅមានសុវត្ថិភាព និងមានអនាម័យទេ។
រដ្ឋអាជ្ញាកត់សម្គាល់ថា២នាក់ប្ដីប្រពន្ធនេះមិនបានស្វះស្វែងរកជំនួយពីគ្រូពេទ្យទេទោះបីពួកគេមានប័ណ្ណធានារ៉ាប់រងសុខភាពយ៉ាងណាក្ដី។ ពេញមួយជីវិតជីវិតរបស់ជនរងគ្រោះ គាត់ត្រូវបានដឹកទៅជួបគ្រូពេទ្យតែម្ដងគត់។ រដ្ឋអាជ្ញាថ្លែងថានៅក្នុងអាជីពរបស់គាត់២២ឆ្នាំកន្លងទៅនេះទើបតែឃើញសំណុំរឿងនេះមួយគត់ដែលមានលក្ខណៈចម្លែកមិនអាចជឿបានទាល់តែសោះថាវាអាចកើតមានទៅរួច។ ប្រសិនបើពីរនាក់ប្ដីប្រពន្ធនេះត្រូវតុលាការរកឃើញថាមានកំហុសដូចការចោទប្រកាន់មែន ពួកគេអាចនឹងជាប់ពន្ធនាគារមួយជីវិត។ នេះបើយោងតាមច្បាប់របស់រដ្ឋមីស៊ីហ្គែន៕ ប្រភព៖ Vietnam Express
ចែករំលែកព័តមាននេះ