ទីក្រុងអង់ការ៉ា៖ អង្គការណាតូកំពុងកែសម្រួលរបៀបធ្វើការរបស់ខ្លួនដើម្បីសម្របសម្រួលទៅតាមស្ថានការណ៍ប្រែប្រួលជាក់ស្ដែងនៃវិស័យសន្តិសុខជាតិ។ អាមេរិកនឹងមិនចាកចេញពីណាតូទេ។ ខាងលើនេះជាការអះអាងរបស់រដ្ឋមន្ត្រីការពារជាតិតួកគី លោកយ៉ាសា ហ្គូឡឺ (Yasar Guler) ដែលផ្ដល់បទសម្ភាសផ្ដាច់មុខឱ្យទីភ្នាក់ងារព័ត៌មានរ៉យទ័រមុនពេលមានកិច្ចប្រជុំកំពូលអង្គការណាតូនៅទីក្រុងអង់ការ៉ា ប្រទេសតួកគី នាសប្ដាហ៍ក្រោយចាប់ពីថ្ងៃទី៧-៨ ខែកក្កដា។
ប្រទេសតួកគីនឹងធ្វើជាម្ចាស់ផ្ទះទទួលមេដឹកនាំនៃរដ្ឋជាសមាជិកអង្គការណាតូទាំង៣២ប្រទេស រួមទាំងការអញ្ជើញចូលរួមពីមន្ត្រីរដ្ឋាភិបាលនៃបណ្ដាប្រទេសនៅតំបន់ឈូងសមុទ្រពែក្ស និងអាស៊ី-ប៉ាស៊ីហ្វិចថែមទៀត។ កិច្ចប្រជុំកំពូលនេះរៀបចំឡើងចំពេលដែលមានភាពតានតឹងនៅក្នុងចំណោមអង្គការណាតូខ្លួនឯងពាក់ព័ន្ធនឹងការចូលរួមវិភាគទានដើម្បីទ្រទ្រង់ស្ថាប័ននេះ, ការចំណាយលើវិស័យការពារជាតិ និងការដែលអាមេរិកមិនពេញចិត្តនឹងក្រុមសម្ព័ន្ធមិត្តដែលមិនបានចូលរួមចំណែកជាមួយខ្លួនដើម្បីបើកច្រកសមុទ្រហ័រម៉ូស។
តបទៅនឹងសំណួរជាលាយលក្ខណ៍អក្សររបស់អ្នកសារព័ត៌មាន លោកហ្គូឡឺថ្លែងថាគម្រោងរៀបចំកិច្ចប្រជុំកំពូលណាតូលើកនេះនឹងផ្ដោតសំខាន់ទៅលើការធ្វើយ៉ាងណាឱ្យណាតូមានឯកភាពផ្ទៃក្នុង, ការវាយតម្លៃទៅលើការបង្កើនខ្ទង់ចំណាយរបស់សម្ព័ន្ធមិត្ត, ការពង្រឹងកិច្ចសហប្រតិបត្តិការផលិតគ្រឿងបរិក្ខារយោធា និងការបង្កើនជំនួយសម្រាប់អ៊ុយក្រែន។ លោកថ្លែងបន្ថែមទៀតថារដ្ឋាភិបាលតួកគីនឹងចូលរួមនៅក្នុងគំនិតផ្ដួចផ្ដើមរបស់អឺរ៉ុបពាក់ព័ន្ធនឹងកិច្ចការពារជាតិ។
លោកថាអង្គការណាតូនៅតែជាតួអង្គសំខាន់គ្មានគូប្រៀប និងជាបាតគ្រឹះសម្រាប់វិស័យសន្តិសុខ និងការពារជាតិរបស់អឺរ៉ុប និងតំបន់ជាប់មហាសមុទ្រអាត្លង់ទិច។ យើងវាយតម្លៃថាដំណាក់កាលដែលយើងឆ្លងកាត់នោះមិនមែនជាវិបត្តិទេ ប៉ុន្តែជាការកែសម្រួលដើម្បីបត់បែនទៅតាមស្ថានការណ៍ផ្លាស់ប្ដូរនៃសន្តិសុខ។ លោកថាអាមេរិកគ្មានការតាំងចិត្តថានឹងដកខ្លួនចេញពីអង្គការណាតូទេ។ គ្រាន់តែថាអាមេរិកចង់ឱ្យបណ្ដាប្រទេសសម្ព័ន្ធមិត្តនៅទ្វីបអឺរ៉ុប និងកាណាដាមានចំណែកទទួលខុសត្រូវកាន់តែខ្ពស់ជាងមុនក្នុងការការពារសន្តិសុខនៅទ្វីបអឺរ៉ុប៕ ប្រភព៖ Reuters
ចែករំលែកព័តមាននេះ