ទីក្រុងការ៉ាកាស់៖ មនុស្សមានកំហឹងកាន់តែខ្លាំងឡើងៗនៅប្រទេសវេណេហ៊្សូអេឡាព្រោះរដ្ឋាភិបាលមិនបានផ្ដល់ការជួយជ្រោមជ្រែងឱ្យបានគ្រប់គ្រាន់នៅលើទីតាំងដែលរងការវាយប្រហារដោយគ្រោះរញ្ជួយដីផ្ទួនៗគ្នាកម្រិត៧,២ និង៧,៥រ៉ិចទ័រកាលពីសប្ដាហ៍មុន។ គេរកឃើញសាកសពជនរងគ្រោះជាបន្តបន្ទាប់។ ដូចនេះ មនុស្សស្លាប់សរុបកើនឡើងដល់ជាង១៧០០នាក់។ នៅក្នុងចំណោមអ្នកស្លាប់ទាំងនោះ គេជឿជាក់ថាមនុស្ស១៤០នាក់ជាអ្នកដែលត្រូវបានបណ្ដេញចេញពីទឹកដីអាមេរិក។ ក្នុងនោះក៏មានកុមារមួយចំនួនដែលស្នាក់នៅក្នុងសណ្ឋាគារមួយកន្លែងដែលត្រូវបាក់រលំកាលពីថ្ងៃពុធ។
នៅថ្ងៃទី៥នៃការខិតខំជួយសង្គ្រោះមនុស្សបាត់ខ្លួននោះ របាយការណ៍របស់រដ្ឋាភិបាលបង្ហាញថាអគារជិតពីររយខ្នងបានបាក់រលំរាបដលដី ចំណែកអគាររាប់រយខ្នងទៀតរងការខូចខាត។ អត្រាស្លាប់រហូតដល់រាប់ពាន់នាក់ រួមទាំងមនុស្សរបួស៥ពាន់នាក់ទៀតនោះអាចបណ្ដាលមកពីកត្តាគួបផ្សំដទៃទៀតដូចជាការមិនយកចិត្តទុកដាក់ពីរដ្ឋាភិបាលរយៈពេលរាប់ទសវត្សរ៍មកហើយ, សំណង់អគារមិនរឹងមាំ និងភាពចុះខ្សោយនៃការពង្រឹងគុណភាពសំណង់ក្រោមការដឹកនាំរបស់លោកអ៊ូហ្គោ ឆាវេស (Hugo Chavez) និងនីកូឡាស់ ម៉ាឌូរ៉ូ (Nicolas Maduro)។ នេះបើយោងតាមការវិភាគរបស់អ្នកជំនាញ។
តំបន់អែលជូនគីតូ (El Junquito) ជាតំបន់ភ្នំស្ថិតនៅចម្ងាយ៣៣គីឡូម៉ែត្រពីទីក្រុងការ៉ាកាស់ និងជាតំបន់លម្ហែកម្សាន្តដ៏ពេញនិយមរបស់ជនជាតិវេណេហ៊្សូអេឡានៅថ្ងៃចុងសប្ដាហ៍។ ប្រជាជននៅទីនោះថ្លែងថាពួកគេឃើញមន្ត្រីរដ្ឋាភិបាលត្រឹមតែបន្តិចបន្តួចប៉ុណ្ណោះដែលចុះទៅទីនោះ។ មានតែកសិករ និងអ្នករស់នៅម្ដុំនោះទេដែលផ្ដល់ការផ្គត់ផ្គង់តម្រូវការជាមូលដ្ឋានសម្រាប់សហគមន៍។ អ្នកស្រីខេលី អ៊ីបារ៉ា (Keily Ibarra) វ័យ៣៣ឆ្នាំជាអ្នកពាំនាំទុក្ខលំបាករបស់ប្រជាជនប្រាប់ទៅអាជ្ញាធរ។ អ្នកស្រីបានអំពាវនាវឱ្យរដ្ឋាភិបាលធ្វើនូវអ្វីដែលគួរធ្វើ។
សហគមន៍អន្តរជាតិបានចុះទៅប្រទេសវេណេហ្ស៊ូអេឡាជាហូរហែដើម្បីជួយដោះស្រាយទុក្ខលំបាកដោយសារការរញ្ជួយដីលើកនេះ។ ជំនួយភាគច្រើនច្រើនហូរចូលរដ្ឋឡាក្វាអ៊ីរ៉ា (La Guaira) ដែលរងគ្រោះខ្លាំងជាងគេ។ អាជ្ញាធរថ្លែងថារហូតមកដល់ពេលនេះ ប្រទេសចំនួន៣០បានផ្ដល់ការជួយជ្រោមជ្រែង។ ក្នុងនោះមានជំនួយ១០០០តោន, ភ្នាក់ងារសង្គ្រោះ៣៦០០នាក់ និងសត្វសុនខ១១៨ក្បាល។ គេមិនទាន់ដឹងច្បាស់ថាតើមនុស្សប៉ុន្មាននាក់ដែលបន្តកប់នៅក្នុងគំនរបាក់បែកនោះទេ។ គេហទំព័រដែលប្រមូលចងក្រងចំនួនអ្នកបាត់ខ្លួនតាមរយៈការតំណាលប្រាប់ពីសាច់ញាតិពួកគេរកឃើញថាអ្នកបាត់ខ្លួនមានចំនួន៤៥០០០នាក់។ ប្រធានរដ្ឋសភាវេណេហ្ស៊ូអេឡាថ្លែងថាចំនួនអ្នកស្លាប់កើនឡើងដល់១៧១៩នាក់, របួសកើនឡើងដល់៥០៣៤នាក់ និងអ្នកបាត់បង់ទីជម្រកកើនឡើងដល់១៥៨៦៦នាក់៕ ប្រភព៖ Reuters
ចែករំលែកព័តមាននេះ