សមាជិក៣នាក់នៃសាខាប្រដាប់អាវុធរបស់ចលនារ៉ាឌីកាល់ប៉ាឡេស្ទីន គឺក្រុមជីហាដអ៊ិស្លាម បានត្រូវស្លាប់ កាលពីថ្ងៃទី១១ មីនា ក្នុងការវាយឆ្មក់តាមអាកាសមួយរបស់អុីស្រាអែលនៅភាគខាងត្បូងជ្រោយហ្គាហ្សា ។អ្នកនាំពាក្យម្នាក់របស់ទីភ្នាក់ងារសង្គ្រោះហ្គាហ្សានិយាយថា ការវាយប្រហារមួយរបស់អុីស្រាអែលសម្លាប់យុទ្ធជនក្រុមជីហាដអ៊ិស្លាម៣នាក់នៅភាគខាងកើតក្រុងខាន់យូណេស ជិតព្រំដែនជាមួយអុីស្រាអែល ។
ចំណែកសាខាប្រដាប់អាវុធរបស់ក្រុមជីហាដអ៊ិស្លាមគឺកងពល AL-QODS អះអាងក្នុងសេចក្តីប្រកាសមួយថា យុទ្ធជនរបស់ខ្លួន៣នាក់ត្រូវស្លាប់ក្នុងការទម្លាក់គ្រាប់បែកមួយរបស់អុីស្រាអែល នៅភាគខាងកើតក្រុងខាន់យូណេស។ សេចក្តីប្រកាសបញ្ជាក់ថា ពួកគេបានបាញ់គ្រាប់កាំភ្លើងត្បាល់ដាក់កងទ័ពអុីស្រាអែល ។ចំណែកសាក្សីទាំងឡាយរៀបរាប់ពីការលុកលុយមានកម្រិតមួយរបស់បណ្តារថក្រោះ និងប៊ុលដូហ្ស័រ អុីស្រាអែល នៅភាគខាងកើត ខាន់យូណេសនោះ ។
កងទ័ពអុីស្រាអែលអះអាងពីការវាយឆ្មក់តាមអាកាសមួយ ប៉ុន្តែពុំនិយាយពីការលុកលុយទេ ដោយបញ្ជាក់ក្នុងសេចក្តីប្រកាសមួយថា ពួកភេរវករក្រុមជីហាដអ៊ិស្លាមនៅភាគខាងត្បូងជ្រោយហ្គាហ្សា បានបាញ់គ្រាប់កាំភ្លើងត្បាល់ដាក់កងទ័ពអុីស្រាអែល ។ យន្តហោះយោធា១គ្រឿងបានតបតវិញភ្លាមៗ ដើម្បីរារាំងការបាញ់ផ្លោងថ្មីៗទៀតប្រឆាំងជនស៊ីវិលអុីស្រាអែល ៕
ចែករំលែកព័តមាននេះ