រាជធានីភ្នំពេញ ៖ ក្រសួងសាធារណការ និងដឹកជញ្ជូននឹងដាក់លក់លេខពិសេសផ្ទាល់ខ្លួននៅរយៈពេល៣ខែខាងមុខនេះ ។ យោងតាមសេចក្តីជូនដំណឹងរបស់ក្រសួងសាធារណៈការ និងដឹកជញ្ជូនបានចេញផ្សាយ នៅថ្ងៃទី០២ កញ្ញានេះ បានលើកឡើងពីការលក់ ការលក់លេខចុះបញ្ជីពិសេសផ្ទាល់ខ្លួនយ៉ាងដូច្នេះថា សូមជម្រាបជូនដំណឹងដល់សាធារណជនទាំងអស់ឱ្យ បានជ្រាបថា យោងអនុក្រឹត្យលេខ៧៣ អនក្រ.បក ចុះថ្ងៃទី០៣ ខែមិថុនា ឆ្នាំ២០១៩ ស្តីពីការចុះបញ្ជីផ្តល់បណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ រាជរដ្ឋាភិបាលកម្ពុជាបានអនុញ្ញាតឱ្យមានលេខចុះបញ្ជីពិសេសផ្ទាល់ខ្លួន ដែលមានលេខឬ/និងអក្សរឡាតាំងមិនលើសពី៨ (ប្រាំបី)ខ្ទង់ ដើម្បីបំពេញតម្រូវការរបស់ម្ចាស់យានជំនិះឱ្យកាន់តែទូលំទូលាយបន្ថែមទៀត ។
ក្រសួងបន្តថាដើម្បីត្រៀមខ្លួនជាស្រេច សម្រាប់ការដាក់លក់លេខចុះបញ្ជីពិសេសផ្ទាល់ខ្លួននេះ គណៈកម្មការអន្តរក្រសួង ដើម្បីគ្រប់គ្រងការលក់លេខចុះបញ្ជីរថយន្តគ្រសារ និងរថយន្តធុនស្រាលបានសិក្សា និងដកស្រង់បទពិសោធន៍អំពីការងារគ្រប់គ្រងការលក់លេខចុះបញ្ជីយានយន្តតាមប្រព័ន្ធបច្ចេកវិទ្យា និងទទួលយកបទពិសោធន៍ពីបណ្តាប្រទេសនានានៅក្នុងតំបន់រួមមានព្រះរាជាណាចក្រថៃ ទីក្រុងហុងកុងប្រទេសចិន និងប្រទេសសិង្ហបុរី ។
ប្រភពបញ្ជាក់ថា«បន្ទាប់ពីទទួលបានបទពិសោធន៍ទាំងនេះ ក្រសួងមានជំនឿចិត្តយ៉ាងមុតមាំថា ការអនុវត្តការងារលក់លេខចុះបញ្ជីពិសេសផ្ទាល់ខ្លួននាពេលខាងមុខនេះនឹងទទួលបាននូវប្រសិទ្ធភាព និងតម្លាភាពជូនប្រជាពលរដ្ឋ» ។ ក្រសួងនឹងដាក់ឱ្យដំណើរការនូវប្រព័ន្ធលក់លេខចុះបញ្ជីពិសេសផ្ទាល់ខ្លួននៅអំឡុងពេល៣ខែខាងមុខនេះដោយនឹងធ្វើការជូនដំណឹងជាមុនយ៉ាងតិច១ខែ ដើម្បីធ្វើការផ្សព្វផ្សាយឱ្យបានទូលំទូលាយនៅទូទាំងប្រទេស ៕ កែសម្រួលដោយ ៖ សុឃាក់
ចែករំលែកព័តមាននេះ