ខេត្តកំពង់ធំ ៖ ​ល្បែងជល់​មាន់ និងបាញ់អាប៉ោង​​ដុះស្លែ​ប្រព្រឹត្តទៅ​ដោយរលូន​បាននៅ​លើទឹក​ដីនៃស្រុកបា​រាយ​ណ៏ ​ ជារៀង​រាល់ថ្ងៃ រាល់ខែ​រាប់ឆ្នាំ​មក​ហើយ​នោះ ​ក៏ដោយសារ​តែសមត្ថកិច្ចជាមួយនឹងអាជ្ញាធរបើកភ្លើង​ខៀវឲ្យ ទើបដំណើរ​ការ​បានល្អមកទល់បច្ចុប្បន្ននេះ។​កំពូល​មេញៀន​ល្បែងស៊ី​សង​បាញ់​មេអាប៉ោងឲ្យគេចាក់ និងជាម្ចាស់សង្វៀន​ជល់មាន់ដ៏ល្បីរន្ទឺនៅលើទឹកដីនៃស្រុកបារាយណ៏ ត្រូវបានប្រជាពលរដ្ឋនៅក្នុងស្រុកស្គាល់ឈ្មោះថា ជ័យ ផល្លា ភេទប្រុស អាយុ​៤៥ឆ្នាំ មានទីលំនៅភូមិនាងល្អ ឃុំទ្រៀល ស្រុក​បារាយណ៏​ ខេត្តកំពង់ធំ មានមុខរបររកស៊ីធំ គឺបើកសង្វៀន​ជល់មាន់ និងបាញ់មេអាប៉ោង​។កន្លង​មក​សមត្ថកិច្ច​នគរ​បាល កងរាជអាវុធហត្ថធ្លាប់ចុះធ្វើការ​បង្ក្រាប ព្រម​ទាំង​ធ្វើកិច្ចសន្យា​ជាច្រើនលើក​ច្រើនសារមកហើយ នៅតែ​មិនឈប់ យូរ ៗទៅបានស្គាល់ចិត្តថ្លើមគ្នាជាមួយ​សមត្ថកិច្ច និងអាជ្ញាធរ ភូមិ ឃុំ ស្រុក យល់ព្រមទទួលសំណែន​ពីបន​ល្បែង​ខាង​លើ ទើបអាចប្រព្រឹត្តទៅបាន។

នៅក្នុងឆ្នាំ២០១៣លោកសឿន មុនីរ័ត្ន ​ ព្រះរាជអាជ្ញារងអមសាលា​ដំបូងខេត្តកំពង់ធំបានដឹកនាំកំលាំងចុះទៅបង្ក្រាបម្តង​ដែរ តែលោក ជ័យ ផល្លា នៅតែមិនរៀងចាលដដែល ​នៅលួចប្រព្រឹតអំពើដែលសង្គមស្អប់ខ្ពើមនេះបានទៀត ក៏​ដោយសារតែខ្មោចក្នុងបើកដៃឲ្យដែរ ធ្វើឲ្យមាន​ផលប៉ះ​ពាល់ និង​ជះ​ឥទ្ធិ​ពលអាក្រក់យ៉ាងខ្លាំងដល់គោលនយោបាយ ភូមិ-ឃុំមានសុវត្ថិភាពទាំង៩ចំណុច ដែលក្រសួងមហាផ្ទៃលោកដាក់ឲ្យ​! ម្យ៉ាងវិញ​ទៀត​នៅរាល់​កម្ម​វិធី​អង្គ​ប្រជុំ​នៅ​សាល​ប្រជុំគណៈស្នងការដ្ឋាននគរបាលខេត្តកំពង់ធំ ​ឯកឧត្តម ឧត្តមសេនីយ៍ត្រី ផាន់ សុផេង លោកតែងតែមាន​ប្រសាសន៍​ផ្តាំផ្ញើ និងសូមសំណូមពរ​យ៉ាងទទូចម្តងហើយម្តងទៀតដល់លោកអធិការនគរបាលទាំងអស់គ្រប់ក្រុង-ស្រុកទូរទាំងខេត្ត នាំគ្នាអនុវត្តឲ្យ​បានល្អនូវ​គោល​នយោ​បាយ​ភូមិ-ឃុំមាន​សុវត្ថិភាពទាំង៩ចំណុចរបស់ក្រសួងមហាផ្ទៃ ជាពិសេស​គឺល្បែ​ង​ស៊ីសង​គ្រប់ប្រភេទរួមមាន ជល់មាន់ បៀរ អាប៉ោង ជាដើម ។ល។គួរ​រំលឹក​ផងដែរថា កន្លងមក​នៅក្នុងទឹកដីខេត្តកំពង់ធំស​ម្តេចកិត្តិព្រឹទ្ធ​បណ្ឌិត​ប៊ុន រ៉ានី ហ៊ុន សែន ធ្លាប់បានអញ្ជើញមក និង​មាន​ប្រសាសន៍ថា ទឹកដីស្រុក​បារាយណ៏នេះ សំបូ​រទៅ​ដោយសង្វៀន​​ជល់មាន់ ជាប់លេខទូទាំងប្រទេស​ ក៏ប៉ុន្តែសមត្ថកិច្ច និងអាជ្ញាធរក្នុងស្រុកបារាយណ៍វិញនោះ​មុខ​ក្រាស់​មិនចេះឈឺក្បាល​ហាលថ្ងៃទៅនឹងអនុសាសន៍នោះឡើយ ធ្វើឲ្យមានសង្វៀនជល់មាន់ និងល្បែងអាប៉ោងជាច្រើន​កន្លែងកើត​មាននៅក្នុងទឹក​ដីដែន​សមត្ថ​កិច្ច​របស់ខ្លួន។ ជាក់ស្តែងកាលពីរសៀលថ្ងៃទី១០ ខែមីនា ឆ្នាំ២០១៤ អ្នកយកព័ត៌មានយើង​បានទៅដល់​ និងថតរូបយក​សកម្មភាព​ជល់មាន់ និងបាញ់​អាប៉ោង ស្ថិតនៅក្នុងភូមិទួលពភ្លារ ឃុំស្រោឡៅ ស្រុកបារាយណ៍ តែត្រូវម្ចាស់បានសង្វៀន​ជល់មាន់ឈ្មោះ ជ័យ ផលា ប្រមាថ និង​ស្រវ៉ាទាញ​យក​កាមេរ៉ា​បំណង​កម្ទេច​​ចោលទៀតផង ហើយអ្នកយកព័ត៌មានយើងក៏បានជំរាបរឿងទាំងអស់នេះដល់លោកអភិបាលស្រុក និងលោកអធិការ បាន​ចាត់ឲ្យ​លោក​អធិ​ការ​រងម្នាក់ដឹកនាំកម្លាំងចុះទៅកន្លែងកើតហេតុ បានត្រឹមតែដុតកម្ទេចចោលសង្វៀន គ្រាន់តែ​ឲ្យ​ល្អភ្នែក​មើល​តែប៉ុណ្ណោះ សូមជំរាបផងដែរថា សង្វៀន​ជល់​មាន់ជាច្រើនកន្លែងនៅក្នុងទឹកដីស្រុកបារាយណ៍​នេះតែង​តែផ្លាស់ប្តូរកន្លែង​ជល់ជានិច្ច បើចង់ចុះទៅថត​ផ្តិតយក​នូវរូប​ភាពនោះ ទាល់​តែទៅ​ដោយស្ងាត់ៗ និងលាក់ការបំផុតកុំឲ្យ​សមត្ថកិច្ច និងអាជ្ញាធរបានដឹង បើដឹងច្បាស់ជាបែកការណ៍រត់បាតជើងសរព្រាតអស់ជាមិនខានឡើយ។

ប្រជាពលរដ្ឋនាំគ្នារិះគន់ថា ល្បែងស៊ីសងគ្រប់ប្រភេទប្រព្រឹត្តិទៅបានក៏ដោយសារតែសមត្ថកិច្ចគ្រប់ប្រភេទ និងអាជ្ញាធរ​ស្រុកបារាយណ៍ អសមត្ថ​ភាព​តែម្តង ទើបបានជាបណ្តែតបណ្តោយឲ្យមានសង្វៀន​ជល់មាន់ និងល្បែង​ស៊ីសងអាប៉ោង​នៅតែមានក្នុងទឹកដី​របស់ខ្លួន ថ្កឺនទៅនឹង​អនុសាសន៍​ដ៏ថ្លៃថ្លា​របស់សម្តេចកិត្តិ​ព្រឹទ្ធ​បណ្ឌិត​បានយ៉ាងដូច្នេះ ។