ខេត្តរតនគិរី ៖ បុរសវ័យចំណាស់២នាក់ដែលនាំគ្នាទៅឆក់ត្រីដូចនាំគ្នាទៅស្លាប់ ទាំង២នាក់ ហើយត្រូវបានក្រុមក្រួសាររកឃើញនៅថ្ងៃទី៧ មីនា វេលាម៉ោង៦ល្ងាច ។
តាមប្រភពព័ត៌មានពីក្រុមគ្រួសារសពដែលកំពុងរៀបចំធ្វើបុណ្យប្រាប់ឱ្យដឹងថា ជនរងគ្រោះទាំងពីរនាក់នេះម្នាក់ឈ្មោះគួ ឃិត អាយុ៥០ឆ្នាំ ជាកសិករ និងម្នាក់ទៀតឈ្មោះខៀម អាយុ៤៨ឆ្នាំ ជាកសិករដូចគ្នា និងជាជនជាតិឡាវ រស់នៅភូមិហ្វាំង ឃុំប៉ុង ស្រុកវើនសៃ ។
នៅមុនពេលកើតហេតុ នាថ្ងៃទី៦ មីនា វេលាម៉ោង១រសៀល បុរសឈ្មោះគួ ឃិត បានបបួលឈ្មោះខៀម ទៅឆក់ត្រីរួចក៏នាំគ្នាស្ពាយដងឆក់និងអាគុយចេញទៅបាត់មិនដឹងថា ទៅឆក់ត្រីនៅម្តុំណាទេ ។ ពេលជនរងគ្រោះទាំង២នាក់បាត់ដំណឹង១យប់មិនឃើញត្រឡប់មកផ្ទះវិញ ទើបក្រុមគ្រួសារអ្នកទាំង២ខាងលើនាំគ្នា ដើររកនៅថ្ងៃទី៧ មីនា គឺស្វែងរុករកតាំងពីព្រឹករហូតដល់ម៉ោង៦ល្ងាច ទើបឃើញជនរងគ្រោះស្លាប់ទល់មុខគ្នា ដោយដៃកាន់ដងឆក់ទាំង២នាក់ ។
កន្លែងជនរងគ្រោះស្លាប់នោះ ស្ថិតនៅចំណុចអូរភ្នំ ក្នុងភូមិកុក ឃុំកុក ស្រុកវើនសៃ ។ ស្ថានភាពជនរងគ្រោះដែលស្លាប់គឺអត់បានត្រីទេ បែរជាស្លាប់ទល់មុខគ្នា ទំនងជាពួកគាត់ជួយគ្នា ពេលមានអាសន្នដោយការឆក់ម្នាក់មុន ហើយម្នាក់ទៀតមកជួយទើបឆក់ស្លាប់ទាំង២នាក់ ក្នុងទឹកយ៉ាងអាណោចអាធ័ម ដោយគ្មាននរណាម្នាក់បានដឹងទេ ៕
ចែករំលែកព័តមាននេះ