រាជធានីភ្នំពេញ ៖ កិច្ចប្រជុំអន្តរសភាអាស៊ាន (AIPA)លើកទី៤០ ដែលប្រទេសថៃធ្វើជាម្ចាស់ផ្ទះមិនបានចុះសម្រុងគ្នាលើរបៀបវារៈស្តីពីនយោបាយ និងសន្តិសុខនោះទេ ដោយសម្រេចលុបចោល ។ នេះបើតាមមន្ត្រីជាន់ខ្ពស់សភាកម្ពុជាដែលចូលរួមប្រជុំ ។…
រាជធានីភ្នំពេញ ៖ កិច្ចប្រជុំអន្តរសភាអាស៊ាន (AIPA)លើកទី៤០ ដែលប្រទេសថៃធ្វើជាម្ចាស់ផ្ទះមិនបានចុះសម្រុងគ្នាលើរបៀបវារៈស្តីពីនយោបាយ និងសន្តិសុខនោះទេ ដោយសម្រេចលុបចោល ។ នេះបើតាមមន្ត្រីជាន់ខ្ពស់សភាកម្ពុជាដែលចូលរួមប្រជុំ ។
លោក ឈាងវុន ប្រធានគណៈកម្មការសហប្រតិបត្តិការអន្តរជាតិឃោសនាការ និងព័ត៌មាននៃរដ្ឋសភាកម្ពុជាបានឲ្យដឹងនៅក្នុងសន្និសិតសារព័ត៌មាន ព្រឹកថ្ងៃទី៣០ សីហា នៅព្រលានយន្តហោះអន្តរជាតិភ្នំពេញថា នៅក្នុងកិច្ចប្រជុំគណៈប្រតិបត្តិ AIPA បានជជែកគ្នាយ៉ាងខ្លាំង ដើម្បីរៀបចំរបៀបវារៈ ដើម្បីដាក់ចូលក្នុងកិច្ចប្រជុំអន្តរសភាអាស៊ានដែលហៅកាត់ថា AIPA ។ លោកបន្តថា ក្នុងរបៀបវារៈមួយក្នុងកិច្ចប្រជុំមានការតឹងតែង គឺគណៈកម្មការអចិន្ត្រៃយ៍នយោបាយ និងសន្តិសុខរបស់អាស៊ានមានការលំបាក ហើយសមាជិកទាំង១០ប្រទេសរបស់ AIPA បានជជែកគ្នាមិនត្រូវគ្នា ដែលប្រទេសឥណ្ឌូនេស៊ីលើមកដាក់ក្នុងរបៀបវារៈ ហើយត្រូវជំ ទាស់ដោយប្រទេសមីយ៉ាន់ម៉ា គឺពាក់ព័ន្ធនឹងជនភៀសខ្លួន ពាក់ព័ន្ធការងារសង្គមរបស់ជនជាតិ ដែលត្រូវបានគេចខ្លួនដោយការភ័យខ្លាចរបស់ជនជាតិរ៉ុយហ្គាជាង១លាននាក់ ។
លោកបានបញ្ជាក់ថា ចំណុចនេះគណៈកម្មការអចិន្ត្រៃយ៍ AIPA បានសម្រេចមិនយករឿងនេះមិនជជែកគ្នានោះទេ ព្រោះនាំឲ្យមានការបែកបាក់ផ្ទៃក្នុងរបស់ AIPA ។ លោកឈាង វុនបញ្ជាក់ថា ៖«អីញ្ចឹងទេគណៈកម្មការអចិន្ត្រៃយ៍នយោបាយរបស់ AIPA ត្រូវបានលុយចោលតែម្តងកុំឲ្យមានការបែកបាក់គ្នា ។ នេះជារឿងធំមួយរបស់ AIPA ។
ខ្ញុំសូមបញ្ជាក់ថា ការងារនេះមានរយៈពេល២ឆ្នាំមកហើយ ។ យើងមានការពិបាកមែន ព្រោះឥណ្ឌូនេស៊ីមានប្រជាពលរដ្ឋឥស្លាមជាង២០០លាននាក់ អីញ្ចឹងគាត់ចង់ ឬមិនចង់គាត់មានចំណែកធំមួយរបស់អាស៊ានយើងដែលដើរតួនាទីចម្បង ហើយជនជាតិរ៉ុយហ្គា កាន់សាសនាឥស្លាម» ។ លោកបានឲ្យដឹងទៀតថា ក្នុងកិច្ចប្រជុំមានការប្រឈមគ្នាខ្លាំងមានទែនដោយប្រធានគណៈប្រតិភូសភាមីយ៉ាន់ម៉ាមិនទទួលយកសំណើរពាក់ព័ន្ធរឿងនេះបានទេ ។ចំណែកភាគីឥណ្ឌូនេស៊ីបានលើកឡើងថា ប្រសិនបើសមាជិកគណៈកម្មការប្រតិបត្តិរឿងនឹងមកនិយាយទេគាត់នឹងត្រឡប់ទៅប្រទេសវិញ ។
លោកឈាង វុន ឲ្យដឹងទៀតថា រឿងនយោបាយ និងសន្តិសុខ គឺជារឿងមួយដែលតានតឹងដូចនឹងរឿងឈូងសមុទ្រចិនខាងត្បូងអីញ្ចឹង ។ រឿងឈូងសមុទ្រចិនខាងត្បូងនេះមិនត្រូវបានលើកក្នុងកិច្ចប្រជុំ AIPA នោះទេ ប៉ុន្តែគណៈប្រតិភូវៀតណាមលើកទៅនិយាយនៅក្នុងកិច្ចប្រជុំAIPA ចិន ឬអាយប៉ាចិនធ្វើឲ្យភាគីចិនមិនសប្បាយចិត្តផងដែរ ។ ប្រទេសដែលចូលរួមកិច្ចប្រជុំមាន១៥ប្រទេស ក្នុងនោះប្រទេសជាសមាជិកAIPA ចំនួន១០ប្រទេស និងប្រទេសជាអ្នកសង្កេតការណ៍ចំនួន៥ ។
សូមជម្រាបថាសមាជិក ១០ប្រទេសក្នុងសហគមន៍ប្រជាជាតិអាស៊ីអាគ្នេយ៍ មានប្រទេសប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា សឹង្ហបុរី ថៃ វៀតណាម និងហ្វីលីពីន បានជួបប្រជុំប្រចាំឆ្នាំក្នុងប្រទេសថៃ រយៈពេល៥ថ្ងៃ ចាប់ពីថ្ងៃទី២៥ ដល់ថ្ងៃទី២៩ ខែសីហា ឆ្នាំ២០១៩ ដើម្បីពង្រឹងភាពជាដៃគូរវាង AIPA និងអាស៊ាន ។ ភាពជាដៃគូរវាង AIPA ជាមួយប្រទេសនិងអង្គការជាដៃគូ ដើម្បីដោះស្រាយបញ្ហាប្រឈមក្នុងតំបន់ និងអន្តរជាតិដូចជា បញ្ហាស្ត្រី កុមារ ពាណិជ្ជកម្ម សន្តិសុខ បរិស្ថាន និងគ្រឿងញៀនជាដើម៕កែសម្រួលដោយ ៖ សុឃាក់
ចែករំលែកព័តមាននេះ