រាជធានីភ្នំពេញ ៖ គិតមកដល់ពេលនេះ មានរយៈពេលប្រមាណ២ខែមកហើយ ដែលសាលាដំបូងរាជធានីភ្នំពេញ នៅមិនទាន់រកថ្ងៃប្រកាសសាលក្រមផ្តន្ទាទោសលើជនត្រូវចោទក្នុងសំណុំរឿងសម្លកំពឹសរបស់អតីតឧកញ៉ា លី សាម៉េត ហៅគ្រូមា និងបក្សពួកជិត១០នាក់…
រាជធានីភ្នំពេញ ៖ គិតមកដល់ពេលនេះ មានរយៈពេលប្រមាណ២ខែមកហើយ ដែលសាលាដំបូងរាជធានីភ្នំពេញ នៅមិនទាន់រកថ្ងៃប្រកាសសាលក្រមផ្តន្ទាទោសលើជនត្រូវចោទក្នុងសំណុំរឿងសម្លកំពឹសរបស់អតីតឧកញ៉ា លី សាម៉េត ហៅគ្រូមា និងបក្សពួកជិត១០នាក់ ពាក់ព័ន្ធនឹងបទល្មើសព្រហ្មទណ្ឌឆបោក និងប៉ុនប៉ងសូកប៉ាន់ ផ្តើមចេញពីអំពើពុករលួយនោះនៅឡើយទេ ។ ចំណែកមហាជនបាននិងកំពុងទន្ទឹងរង់ចាំមើលទោសរបស់ពួកគេ តើត្រូវបានច្បាប់កំណត់បែបណានោះ ។
សំណុំរឿងគ្រូមា លី សាម៉េត និងបក្ខពួក ត្រូវបានតុលាការលើកយកមកបើកសវនាការសាកសួរដេញដោលរួចរាល់ហើយ កាលពីថ្ងៃទី១៣ និងទី១៤ ខែសីហា ឆ្នាំ២០២៥ ក្នុងនោះគឺមាន៤សំណុំរឿង ៖
១-សូកប៉ាន់លុយកាក់រាប់សិបម៉ឺនដុល្លារអាមេរិក យកងារជាអភិបាលខេត្តពោធិ៍សាត់ ។
២-ទទួលសំណូករាប់សិបម៉ឺនដុល្លារ ដើម្បីរត់ការយកតំណែងជាអភិបាលក្រុងអរិយក្សត្រ ខេត្តកណ្តាល ។
៣-ឆបោក យកប្រាក់រត់ការចូលមន្ត្រីគយ ។
៤-ពុករលួយឃុបឃិតដោះដូរ(លក់)ទីតាំងពន្ធនាគារខេត្តកំពង់ឆ្នាំង ។
សំណុំរឿងទាំង៤ខាងលើនេះ មានជនត្រូវចោទចំនួន៨នាក់ កំពុងជាប់ឃុំ និងម្នាក់កំពុងគេចខ្លួន ៖
១-អតីតឧកញ៉ា លី សាម៉េត ហៅ គ្រូមា
២-ឈ្មោះ ដួង តារា អតីតទីប្រឹក្សា
៣-អតីតឧកញ៉ា អ៊ុត ធី ពាណិជ្ជករ
៤-ឈ្មោះ មួង ឃីម អតីតផ្កាយ២ ជាមន្ត្រីជាន់ខ្ពស់នគរបាលជាតិ
៥-ឈ្មោះ ឡាយ វិសិដ្ឋ អតីតអភិបាលរងខេត្តពោធិ៍សាត់
៦-ឈ្មោះ កន សុខកាយ អតីតអភិបាលរងក្រុងអរិយក្សត្រ ខេត្តកណ្តាល
៧-ឈ្មោះ ឆាយ សុវណ្ណារី ហៅ ចែមួយ
៨-ឈ្មោះ ហើង ទិត្យរាត្រីលក្ខណ៍ ហៅ ស្រីមុំ ។
សូមជម្រាបថា សំណុំរឿងឆបោក ផ្តើមចេញពីអំពើពុករលួយដូចសម្លកំពឹសរបស់អតីតឧកញ៉ា លី សាម៉េត ហៅគ្រូមា និងបក្ខពួក ត្រូវបានសមត្តកិច្ចបើកការស៊ើបអង្កេតនៅដើមខែវិច្ឆិកា ឆ្នាំ២០២៤ ដោយមានការចាប់ខ្លួនជាបន្តបន្ទាប់ ក្នុងនោះមានខ្លះមានអតីតជាឧកញ៉ា ខ្លះឯកឧត្តម និងខ្លះជាអាជីវកររកស៊ីធម្មតា ប្រមាណជិត ១០នាក់ ដាក់ពន្ធនាគារជាបណ្តោះអាសន្ន ។
ទាក់ទិននឹងព័ត៌មានស្តីពីការបង្ក្រាបនិងចាប់ខ្លួនជនសង្ស័យក្រុមអតីតឧកញ៉ា លី សាម៉េត ហៅគ្រូមា កោះសន្តិភាពធ្លាប់បានផ្សព្វផ្សាយលម្អិតតាំងពីដំបូងរួចមកហើយដែរ ប៉ុន្តែអ្វីដែលមហាជនទន្ទឹងរង់ចាំមើលនោះ គឺសាលក្រមរបស់សាលាដំបូងរាជធានីភ្នំពេញ នឹងផ្តន្ទាទោសក្រុមអតីតឯកឧត្តម ឧកញ៉ាទាំងអស់នោះ ដាក់ពន្ធនាគារម្នាក់ៗប៉ុន្មានឆ្នាំ ?
ចែករំលែកព័តមាននេះ