ខេត្តកំពត ៖ ករណីបាញ់រះមួយបានបង្កឱ្យមានការភ្ញាក់ផ្អើល កាលពីវេលាម៉ោង១២និង២០នាទីរំលងអធ្រាត្រឈានចូលថ្ងៃទី៩ មីនា នៅមុខមន្ទីរពេទ្យអង្គរជ័យ បណ្ដាលឱ្យយុវជនជានិស្សិតម្នាក់រងរបួសមួយគ្រាប់ត្រង់ជើង ហើយត្រូវបានមិត្ដភក្ដិបញ្ជូនមកមន្ទីរពេទ្យខេត្ដ។
ខេត្តកំពត ៖ ករណីបាញ់រះមួយបានបង្កឱ្យមានការភ្ញាក់ផ្អើល កាលពីវេលាម៉ោង១២និង២០នាទីរំលងអធ្រាត្រឈានចូលថ្ងៃទី៩ មីនា នៅមុខមន្ទីរពេទ្យអង្គរជ័យ បណ្ដាលឱ្យយុវជនជានិស្សិតម្នាក់រងរបួសមួយគ្រាប់ត្រង់ជើង ហើយត្រូវបានមិត្ដភក្ដិបញ្ជូនមកមន្ទីរពេទ្យខេត្ដ។ ប្រភពព័ត៌មានពីកន្លែងកើតហេតុឱ្យដឹងថា មានរថយន្ដឡិចស៊ីស១គ្រឿងមិនចាំស្លាកលេខ មកពីរាជធានីភ្នំពេញ ដោយមានមនុស្សជិះក្នុងរថយន្ដ៣នាក់ ក្នុងនោះមានស្រ្ដីម្នាក់ ជាក្រុមនិស្សិត ហើយមានម៉ូតូ១គ្រឿងជិះតាមរថយន្ដនោះពីក្រោយជានិស្សិតដូចគ្នា ។
លុះមកដល់ចំណុចខាងលើ នៅពេលរថយន្ដនិងអ្នកជិះម៉ូតូឈប់ដើម្បីពិភាក្សាគ្នា រកផ្ទះសំណាក់ជួលដេក ស្រាប់តែមានរថយន្ដឡិចស៊ីសមួយគ្រឿងទៀត ដែលគេបានដឹងត្រឹមជាស្លាកលេខ«ខ.ម» ពេលមកដល់ក៏ឈប់ពីក្រោយ រួចបាញ់រះចេញពីក្នុងរថយន្តចំនួន១២គ្រាប់ បណ្ដាលឱ្យត្រូវរងរបួសជើងនិស្សិតម្នាក់ ហើយបុ៉ន្មាននាក់ទៀតដែលនៅជាមួយគ្នាក្នុងរថយន្ត បានរត់ចូលទៅស្នាក់ការពិនិត្យ និងថ្លឹងរថយន្ត គេចផុតពីគ្រោះថ្នាក់ ។ បន្ទាប់មក អ្នកដែលបាញ់នោះក៏បត់រថយន្តចេញទៅតាមផ្លូវលេខ៣១ សំដៅទៅផ្សារស្រុកបន្ទាយមាសបាត់ស្រមោលទៅ ។ មានប្រភពព័ត៌មានខ្លះបានខ្សឹបប្រាប់ឱ្យដឹងថា ករណីបាញ់ឱ្យមនុស្សរងរបួសនេះកើតឡើងពីរឿងស្នេហាត្រីកោណ ដោយសារស្ត្រីម្នាក់ជិះទូកពីរ ។ តាមការខ្សឹបប្រាប់ឱ្យដឹងថា ស្ត្រីម្នាក់នោះធ្លាប់មានការប្រតិព័ទ្ធជាមួយលោកផ្កាយ២ ដ៏មានឥទ្ធិពលម្នាក់ រួចហើយទៅមានប្រតិព័ទ្ធជាមួយនិស្សិតម្នាក់ទៀត ទើបគូស្នេហ៍ចាស់ខឹងតាមប្រមាញ់តាំងពីភ្នំពេញ រហូតមកផ្ទុះអាវុធនៅស្រុកអង្គរជ័យ ខេត្តកំពត ។
ចំណែកប្រភពព័ត៌មានពីជនរងគ្រោះដែលរងរបួសជើងបានប្រាប់នគរបាលការិយាល័យព្រហ្មទណ្ឌកម្រិតធ្ងន់ខេត្តថា រូបគេឈ្មោះ វ៉េត សុវណ្ណនាថ អាយុ២០ឆ្នាំ និងមិត្តស្រីម្នាក់សុំមិនបញ្ចេញឈ្មោះ ព្រមទាំងមិត្តប្រុស៤នាក់ទៀតជានិស្សិតរៀននៅភ្នំពេញដូចគ្នា ។ រូបគេបានធ្វើបុណ្យកតញ្ញូ ហើយអញ្ជើញមិត្តភក្តិទាំង៤នាក់ ព្រមទាំងមិត្តស្រីផងដែរ ទៅចូលរួមបុណ្យរបស់ខ្លួន ហើយនៅថ្ងៃទី៨ មីនា មិត្តស្រីនិងមិត្តភក្តិជានិស្សិតដូចគ្នាទាំង៥នាក់ក៏មកលេងបុណ្យនៅស្រុកអង្គរជ័យ តែមិនទាន់បានទៅដល់កន្លែងបុណ្យផង ក៏ជួបហេតុការណ៍នេះតែម្ដង ។ លោក ធុន ប៊ុនសីុដេត អធិការនគរបាលស្រុកអង្គរជ័យ ឱ្យដឹងថា ករណីបាញ់បោះខាងលើ លោកពុំទាន់កំណត់មុខសញ្ញាថា មកពីករណីអ្វីនោះទេ ។
ពេលនោះ លោកកំពុងស្រាវជ្រាវរកមូលហេតុនៃការបាញ់នោះថា តើដោយគំនុំ ឬមួយដោយបញ្ហាអ្វីផ្សេងទៀត ពីព្រោះទាំងជនល្មើសទាំងជនរងគ្រោះ ពុំទាន់មានប្រភពច្បាស់ការណ៍ណាមួយហា៊នអះអាងពីករណីខាងលើឱ្យពិតប្រាកដនៅឡើយទេ ៕
ចែករំលែកព័តមាននេះ