រាជធានីភ្នំពេញ ៖ យោងតាមរបាយការណ៍របស់មន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ ឱ្យដឹងថា នៅរាជធានីភ្នំពេញ ក្នុងឆ្នាំ២០១៣កន្លងទៅនេះ មន្ទីរប្រមូល និងសង្គ្រោះជនអនាថា បានចំនួន៦៧៨នាក់ ក្នុងនោះអ្នកស្ម័គ្រចិត្តចំនួន១៦៥នាក់ (ស្រី៤៤នាក់) និងមិនស្ម័គ្រចិត្តចំនួន៥១៣នាក់ (ស្រី២៣៤នាក់) និងស្ត្រីរកសុីផ្លូវភេទចំនួន២៧៩នាក់ ដើម្បីអប់រំ បណ្តុះបណ្តាលមុខជំនាញវិជ្ជាជីវៈ និងខ្លះអប់រំរួចបញ្ជូនទៅស្រុកកំណើតវិញ ។
របាយការណ៍ដដែលនោះឱ្យដឹងទៀតថា ក្នុងចំណោមស្ត្រីរកសុីផ្លូវភេទចំនួន២៧៩នាក់នោះ អាជ្ញាធរប្រមូលបានចំនួន១៧៨នាក់ ថយចុះ៤៨% និងទទួលនារីរងគ្រោះចំនួន១០១នាក់ កើន៥៥% ក្នុងនោះចាញ់បោកគេ៨ករណី រំលោភ៣ករណី ជួញដូរ១ករណី អំពើហិង្សា៥ករណី ។ ក្នុងចំណោមស្ត្រីទាំងនោះ មន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ បានអប់រំណែនាំ ពិគ្រោះយោបល់ ហើយបញ្ជូនទៅអង្គភាពនានាជួយបន្តអប់រំ បណ្តុះបណ្តាលមុខជំនាញវិជ្ជាជីវៈ និង៣៥នាក់ ត្រូវធ្វើសមាហរណកម្មទៅស្រុកកំណើតវិញ ។ មន្ទីរសង្គមកិច្ចរាជធានីភ្នំពេញ មួយឆ្នាំកន្លងទៅនេះ បានទទួលកុមារីរងគ្រោះចំនួន៥៤នាក់ ក្នុងនោះរំលោភ១៥ករណី រងការជួញដូរ៥ករណី អំពើហិង្សា២ករណី អាណាព្យាបាលបោះបង់ចោល២ករណី និងស្វែងរកសេវាគាំទ្រ១ករណី ។
ទាក់ទងទៅនឹងបញ្ហាជនអនាថានេះ លោកសន សុផល ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ បានឱ្យដឹងតាមរយៈទូរស័ព្ទនៅរសៀលថ្ងៃទី៩ មីនា ថា អនុវត្តតាមផែនការរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា និងការណែនាំរបស់សាលារាជធានីភ្នំពេញ មន្ទីររបស់លោកបានខិតខំប្រមូល និងសង្គ្រោះជនអនាថាគ្មានទីពឹង ដើេរ ដេកតាមសំយាបផ្ទះតាមផ្លូវថ្នល់ និងទីសាធារណៈនានា ដែលពួកគាត់ងាយរងគ្រោះថ្នាក់បំផុត ។ ជនអនាថាដែលយើងបានជួយសង្គ្រោះមានចំនួន៦៧៨នាក់ ក្នុងនោះអ្នកស្ម័គ្រចិត្តចំនួន១៦៥នាក់ (ស្រី៤៤នាក់) និងមិនស្ម័គ្រចិត្តចំនួន៥១៣នាក់ (ស្រី២៣៤នាក់) អ្នកទាំងនោះត្រូវបានមន្ទីរធ្វើការអប់រំ ណែនាំ និងបណ្តុះបណ្តាលមុខជំនាញវិជ្ជាជីវៈ និងខ្លះអប់រំរួចបញ្ជូនទៅស្រុកកំណើតវិញ ។ លោកសន សុផល បានបញ្ជាក់ថា តាមរយៈការធ្វើអង្កេត និងស្រង់ទិន្នន័យនោះ បច្ចុប្បន្ននេះជនអនាថាដែលមិនទាន់ប្រមូលអស់នៅរាជធានីភ្នំពេញមានចំនួន៥៩៨នាក់ ស្មើនឹង២០៣គ្រួសារ ក្នុងនោះកុមារ១៧៤នាក់ និងស្រ្ដី៦៨នាក់ទៀតដែលកំពុងស្នាក់នៅរាជធានីភ្នំពេញ ។ ក្នុងនោះ ជនអនាថាមកពីខេត្ដព្រៃវែងចំនួន៧១គ្រួសារ ខេត្តតាកែវ២៥គ្រួសារ ខេត្តកំពង់ស្ពឺ២៣គ្រួសារ និងខេត្ដផ្សេងៗទៀត ចំនួន៨៤គ្រួសារ ។ មូលហេតុចំណាកស្រុកនោះ គឺមកពីគ្មានផ្ទះ គ្មានដីធ្វើស្រែចម្ការនៅភូមិកំណើត ជំពាក់បំណុលគេ គ្រួសារក្រីក្រ គ្មានមុខរបរទទួលទាន មករកការងារធ្វើនៅរាជធានីភ្នំពេញ ចាញ់បោកគេ បាត់ការចងចាំជាដើម ។
ការមករស់នៅរាជធានីភ្នំពេញ គឺដើរសុំទាន រើសអេតចាយ លក់កម្លាំងពលកម្ម ប្រើគ្រឿងញៀន ។ល។ ជនអនាថាទាំងនោះរស់នៅតាមចិញ្ចើមថ្នល់យូរយារណាស់មកហើយ តកូនតចៅតែម្ដង ៕
ចែករំលែកព័តមាននេះ