ខេត្តបាត់ដំបង ៖ ក្មេងស្រីអាយុ១៣ឆ្នាំម្នាក់ ដែលបានលង់ខ្លួនប្រាណជាមួយយុវជនម្នាក់ ដោយសារតែពាក្យពេចន៍ចរចាស្នេហ៍ផ្អែមល្ហែមលើសពីទឹកឃ្មុំនោះ ទីបំផុតបានក្លាយជាការបោកប្រាស់ ។ បន្ទាប់ពីនាងមានផ្ទៃពោះបាន៧ខែ ក៏សម្រាលបានកូនប្រុសមួយយ៉ាងវេទនាបំផុត ខណៈភាគីខាងប្រុសមិនទទួលខុសត្រូវ ហើយព្យាយាមគេចខ្លួនបាត់រហូតមកដល់ពេលនេះ ។
ខេត្តបាត់ដំបង ៖ ក្មេងស្រីអាយុ១៣ឆ្នាំម្នាក់ ដែលបានលង់ខ្លួនប្រាណជាមួយយុវជនម្នាក់ ដោយសារតែពាក្យពេចន៍ចរចាស្នេហ៍ផ្អែមល្ហែមលើសពីទឹកឃ្មុំនោះ ទីបំផុតបានក្លាយជាការបោកប្រាស់ ។ បន្ទាប់ពីនាងមានផ្ទៃពោះបាន៧ខែ ក៏សម្រាលបានកូនប្រុសមួយយ៉ាងវេទនាបំផុត ខណៈភាគីខាងប្រុសមិនទទួលខុសត្រូវ ហើយព្យាយាមគេចខ្លួនបាត់រហូតមកដល់ពេលនេះ ។
សាច់ញាតិក្មេងស្រីប្រាប់ថា ក្មេងស្រីអភ័ព្វនេះឈ្មោះ វែង សារ៉ាន់ រស់នៅក្នុងភូមិតាហែន ឃុំរកា ស្រុកសង្កែ ។ នាងមានផ្ទៃពោះជាមួយយុវជនម្នាក់ឈ្មោះ បាក់ សេន អាយុ ២៣ឆ្នាំ រស់នៅក្នុងភូមិជាមួយគ្នា ប៉ុន្ដែជននេះបានគេចខ្លួនតាំងពីដឹងថា នាងមានផ្ទៃពោះរហូតដល់នាងសម្រាលកូន ក៏យុវជន បាក់ សេន និងអាណាព្យាបាលរបស់គេមិនទទួលខុសត្រូវដែរ ។ ប្រភពដដែលបានបន្ដថា នាងវែង សារ៉ាន់ ទើបសម្រាលកូនបានជិត១ខែប៉ុណ្ណោះ តែនាងនិងកូនមានសុខភាពទន់ខ្សោយណាស់នាពេលនេះ ដែលជាបន្ទុកដ៏ធ្ងន់លើអាណាព្យាបាលរបស់នាង ។ ស្ថិតក្នុងទឹកមុខស្លេកស្លាំង អង្គុយបីកូនតូចក្រហមរងាលនៅលើអង្រឹង នាងវែង សារ៉ាន់ បានរៀបរាប់ថា ឈ្មោះ បាក់ សេន បានចាប់ផ្ដើមទាក់ទងស្នហាជាមួយនាងគ្រាដែលនាងកំពុងរៀននៅថ្នាក់ទី៨ នៃវិទ្យាល័យតាហែន ក្នុងស្រុកសង្កែ ។ ដោយសារតែការលួងលោមរបស់គេ ហើយនាងនៅក្មេងសេចក្ដីមិនបានគិតវែងឆ្ងាយ ក៏បានជ្រុលប្រគល់ខ្លួនប្រាណឱ្យយុវជនរូបនោះចំនួន២លើក នៅក្នុងចម្ការខាងក្រោយភូមិ។ តាំងពីពេលនោះមក នាងដឹងថាចាប់ផ្ដើមមានផ្ទៃពោះ រីឯឈ្មោះ សេន ក៏ព្យាយាមគេចខ្លួនដែរ ក្រោយពីដឹងថា នាងមានផ្ទៃពោះ ។
នាងសារ៉ាន់ បញ្ជាក់ថា ពេលនេះនាងសម្រាលបានកូនប្រុសមួយ ពេលនេះមានអាយុជិត១ខែហើយ គ្រាដែលនាងពពោះបានត្រឹម៧ខែ ។ កូនរបស់នាងកើតមកភ្លាមមានទម្ងន់១,៩គីឡូក្រាម សុខភាពខ្សោយ ដែលតម្រូវឱ្យគ្រូពេទ្យយកទៅថែទាំក្នុងកែវ ។ លុះមកដល់ពេលនេះកូនតូចមានសុខភាពល្អបន្ដិចហើយ តែនាងកំពុងប្រឈមមុខយ៉ាងខ្លាំងក្នុងការថែទាំ ដោយសារនាង និងក្រុមគ្រួសារនាងខ្វះខាតគ្រប់បែបយ៉ាង ។ ជាមួយនឹងរឿងរ៉ាវកូនស្រីនេះ លោក ឆាត វែង និយាយថា រឿងរ៉ាវដល់ដំណាក់កាលនេះទៅហើយ គាត់គ្មានអ្វីត្រូវនិយាយទេ ។ ក្នុងរឿងនេះគាត់បានព្យាយាមទៅសួរនាំអាណាព្យាបាលខាងប្រុសដែរ តែភាគីខាងប្រុសនេះហាក់ព្រងើយកន្ដើយមិនរវល់ឡើយ ដោយនិយាយតបមកគាត់វិញថា «ស្រេចនៅលើកូនប្រុសចុះ»។ លោក ឆាត វែង បញ្ជាក់ថា ដោយសារតែភាគីខាងប្រុសបដិសេធមិនទទួលខុសត្រូវ និងសាមីខ្លួនបានគេចខ្លួនផងនោះ គាត់ក៏សម្រេចចិត្ដទៅដាក់ពាក្យបណ្ដឹងនៅការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្ដរួចហើយ តែមិនទាន់ឃើញសមត្ថកិច្ចមានចំណាត់ការនៅឡើយទេ ។
តាមរយៈកោះសន្ដិភាព លោក ឆាត វែង ឪពុកក្មេងស្រីរងគ្រោះបានសំណូមពរទៅគ្រប់អង្គការសង្គមស៊ីវិល និងគ្រប់ស្ថាប័នមានសមត្ថកិច្ចនានា មេត្ដាជួយអន្ដរាគមន៍ក្នុងរឿងនេះផងដើម្បីឱ្យភាគីខាងប្រុសទទួលខុសត្រូវតាមច្បាប់ និងបង់ជាសំណងដើម្បីជួយចិញ្ចឹមកូនតូច ដែលស្ថិតក្នុងស្ថានភាពទន់ខ្សោយបំផុត ទាំងម្ដាយទាំងកូន ។
តាមព័ត៌មានឱ្យដឹងថា បច្ចុប្បន្នយុវជន បាក់ សេន បានរត់ចោលស្រុកទៅសម្ងំលាក់ខ្លួនស៊ីឈ្នួលធ្វើចម្ការឱ្យគេនៅភូមិអូររអិល ឃុំស្ទឹងកាច់ ស្រុកសាលាក្រៅ ខេត្ដប៉ៃលិន ។ សមត្ថកិច្ចគួរតែមានចំណាត់ការលើករណីនេះឱ្យបានឆាប់ ព្រោះក្មេងស្រីស្ថិតក្នុងវ័យអនីតិជន ហើយប្រឈមនឹងការទទួលថែទាំទារកដែលកើតមកទាំងលំបាកនេះទៀត ព្រោះគេមិនមានកំហុសនោះទេ ៕
ចែករំលែកព័តមាននេះ