ខេត្តកំពង់ចាម ៖ ស្ត្រីសង្ស័យជាមេខ្យល់ម្នាក់ឈ្មោះ កើត គឹមយាង អាយុ៥០ឆ្នាំ នៅក្នុងភូមិកងតាណឹងទី៩ ឃុំកងតាណឹង ស្រុកកងមាស ត្រូវបានសមត្ថកិច្ចឃាត់ខ្លួនតាមដីកាបង្គាប់ឱ្យចូលខ្លួនលេខ១៩២ ព.ស របស់លោករៀល សុភិន ព្រះរាជអាជ្ញារងអមសាលាដំបូងខេត្ត ដោយជាប់ចោទពីបទនាំមនុស្សចេញទៅកាន់ប្រទេសចិន រៀបការមិនស្របច្បាប់ ហើយនៅព្រឹកថ្ងៃទី៦ មីនា ត្រូវបានបញ្ជូនទៅសាលាដំបូងខេត្ត ដើម្បីចាត់ការតាមនីតិវិធី។
លោកវរសេនីយ៍ត្រី ថុល ម៉េង នាយរងការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្ត បានរំលឹកថា ស្ត្រីឈ្មោះ ទ្បូញ សុខទ្បាយ អាយុ៣៣ឆ្នាំ នៅភូមិអន្លង់គគីរ ឃុំព្រែកកុយ ស្រុកកងមាស ដែលត្រូវជាបងរបស់ស្ត្រីរងគ្រោះឈ្មោះ សុខទៀង អាយុ២៦ឆ្នាំ និយាយថា កាលពីអំទ្បុងខែកក្កដា ឆ្នាំ២០១៣ ជនសង្ស័យជាមេខ្យល់ឈ្មោះ កើត គឹមយាង បានមកដល់ផ្ទះគាត់ប្រើវិធីលួងលោមអូសទាញប្អូនស្រី ឱ្យទៅយកប្តីជាជនជាតិចិនដីគោក ថែមទាំងអះអាងថា បុរសជាប្តីនោះមានជីវភាពធូរធាទៀតផង ។ លោកវរសេនីយ៍ទោ ថុល ម៉េង បន្តថា ក្រោយពីមានការបញ្ចុះបញ្ចូលនោះ ធ្វើឱ្យប្អូនស្រីឈ្មោះ សុខទៀង មានជំនឿលើស្ត្រីជាមេខ្យល់ទាំងស្រុងតែម្តង ។ ជាមួយនោះដែរអ្នករងគ្រោះបានលើកទ្បើងថា «ខ្ញុំយកប្តីម្តេចកើតទៅបើមានជំងឺនោះ» ។ ក្នុងពេលនោះ ស្ត្រីជាមេខ្យល់បាននិយាយតបមកវិញថា មិនអីទេពេលណាទៅដល់ប្រទេសចិន មើលព្យាបាលជំងឺឱ្យជាសះស្បើយនឹងយកប្តីតាមក្រោយ ។
មេខ្យល់ធានាថា រាល់ការធ្វើឯកសារលិខិតឆ្លងដែន ទិដ្ឋាការទេសចរណ៍ សំបុត្រយន្តហោះ គឺគាត់មេខ្យល់ ជាអ្នកចំណាយទាំងអស់ ថែមទាំងឱ្យថ្លៃទឹកដោះចំនួន៤៥០ដុល្លារថែមទៀត ។ លុះមកដល់ថ្ងៃទី៧ សីហា ឆ្នាំ២០១៣ មេខ្យល់បាននាំស្ត្រីរងគ្រោះទៅរាជធានីភ្នំពេញ ប្រគល់ឱ្យមេខ្យល់ម្នាក់ទៀតមិនស្គាល់ឈ្មោះ រួចបានបញ្ជូនតាមរថយន្តឈ្នួលទៅកាន់ច្រកទ្វារអន្តរជាតិបាវិត ក្នុងខេត្តស្វាយរៀង ទៅកាន់ប្រទេសវៀតណាម រួចបង្ហួសទៅប្រទេសចិនតែម្តង ។ នៅថ្ងៃទី២៦ កញ្ញា ឆ្នាំ២០១៣ ស្ត្រីរងគ្រោះឈ្មោះ សុខ ទៀង បានទូរស័ព្ទមកប្រាប់បងស្រីថា ប្តីចិននោះបានបង្ខំរួមភេទទាំងមានជំងឺ ព្រមទាំងបិទសេរីភាពមិនឱ្យចេញទៅណាទៀតផង ។
លោកវរសេនីយ៍ត្រី ថុល ម៉េង បញ្ជាក់ថា នៅព្រឹកថ្ងៃទី៥ មីនា ឆ្នាំ២០១៤ ពេលទទួលដំណឹងថា មេខ្យល់ឈ្មោះ កើត គឹមយាង វិលត្រទ្បប់មកពីប្រទេសចិន ដល់ផ្ទះវិញនោះ សមត្ថកិច្ចបានទៅកោះហៅមកសួរនាំនៅប៉ុស្តិ៍រដ្ឋបាលឃុំកងតាណឹង ក៏ឆ្លើយសារភាពទើបចាប់ខ្លួនតែម្តង ដោយធ្វើទ្បើងក្រោមកិច្ចសហការជាមួយនឹងនាយកដ្ឋានប្រឆាំងការជួញដូរមនុស្ស និងការពារអនីតិជនផងដែរ ៕
ចែករំលែកព័តមាននេះ