ប្រទេសចិន-ហុងកុង ៖ ២ខែហើយដែលជាង១ភាគ៤នៃប្រជាជនក្រុងហុងកុង នាំគ្នាដើរហែក្បួនបាតុកម្មរៀងរាល់សប្ដាហ៍ ដើម្បីសម្ដែងពីការមិនជឿទុកចិត្តរបស់ពួកគេចំពោះអាជ្ញាធរក្រុងប៉េកាំង។ ទោះបីយ៉ាងនេះក្ដីក៏កងទ័ពចិនចៀសវាងមិនធ្វើអន្តរាគមន៍ដែរ។
ក្នុងឆ្នាំ១៩៩៧ពេលដែលអង់គ្លេសប្រគល់ក្រុងហុងកុងទៅឲ្យចិនវិញ ដែនដីនោះរហូតដល់ឆ្នាំ២០៤៧ មានលក្ខន្តិកៈពិសេសដែលជានិមិត្តរូបនៃប្រទេសមួយប្រព័ន្ធ២។ បន្ទាប់ពីនេះហុងកុងនឹងលែងជាតំបន់រដ្ឋបាលពិសេសទៀតហើយ រួចស្ថិតក្រោមការគ្រប់គ្រងពេញលេញរបស់ចិន។ បច្ចុប្បន្នពិតណាស់ក្រុងប៉េកាំងអាចសម្រេចបញ្ច្ច្ប់ដោយយោធា បាតុកម្មដែលពុះកញ្ជ្រោលអូសបន្លាយនៅហុងកុង។
ចាប់តាំងពី២០ឆ្នាំមកហើយកងទាហានចិន៦០០០នាក់មានវត្តមាននៅហុងកុង ប៉ុន្តែស្ថិតនៅតែក្នុងបន្ទាយ។ម្យ៉ាងវិញទៀតកងកម្លាំងប៉ូលិសប្រដាប់អាវុធចិន ប្រមូលផ្ដុំនៅទីក្រុងSHENSZEN មិនឆ្ងាយប៉ុន្មានពីព្រំដែនហុងកុង តែពុំមានធ្វើអ្វីឡើយក៏ទោះបីបណ្ដាសារព័ត៌មានចិនប្រកាសថា កងកម្លាំងនោះចំណាយពេលមិនដល់មួយម៉ោងផងលើកចូលពេញក្រុងហុងកុងក្ដី។
ពួកអ្នករៀបចំបាតុកម្មស្និទ្ធលទ្ធិប្រជាធិបតេយ្យអះអាងនាថ្ងៃទី២៩សីហាថា ប៉ូលិសបានហាមឃាត់មិនឲ្យមានបាតុកម្មធំនាថ្ងៃទី៣១សីហា ដោយលើកហេតុផលពីបញ្ហាសន្តិសុខ ខណៈបាតុកម្មកាលពីថ្ងៃសៅរ៍សប្ដាហ៍មុន កើតមានអំពើហិង្សាធ្ងន់ធ្ងរនានា៕ (កែសម្រួលដោយ ៖ បុប្ផា)
ចែករំលែកព័តមាននេះ