ខេត្តបាត់ដំបង ៖ ក្មេងស្រីអាយុ១៣ឆ្នាំម្នាក់បានលង់ខ្លួនប្រាណជាមួយយុវជនម្នាក់ គ្រាដែលនាងកំពុងសិក្សារហូតមានផ្ទៃពោះ៧ខែក៏សម្រាលបានកូនប្រុសមួយយ៉ាងលំបាកបំផុត ខណៈភាគីខាងប្រុសមិនទទួលខុសត្រូវ ហើយព្យាយាមគេចខ្លួនបាត់រហូតមកដល់ពេលនេះ។
ខេត្តបាត់ដំបង ៖ ក្មេងស្រីអាយុ១៣ឆ្នាំម្នាក់បានលង់ខ្លួនប្រាណជាមួយយុវជនម្នាក់ គ្រាដែលនាងកំពុងសិក្សារហូតមានផ្ទៃពោះ៧ខែក៏សម្រាលបានកូនប្រុសមួយយ៉ាងលំបាកបំផុត ខណៈភាគីខាងប្រុសមិនទទួលខុសត្រូវ ហើយព្យាយាមគេចខ្លួនបាត់រហូតមកដល់ពេលនេះ។
សាច់ញាតិក្មេងស្រីរងគ្រោះបានឱ្យដឹងថា ក្មេងស្រីរងគ្រោះរស់នៅភូមិតាហែន ឃុំរកា ស្រុកសង្កែ។ នាងមានផ្ទៃពោះជាមួយយុវជនម្នាក់ឈ្មោះបាក់ សេន អាយុ២៣ឆ្នាំ រស់នៅក្នុងមូលដ្ឋានជាមួយគ្នា ប៉ុន្តែជននេះបានគេចខ្លួនតាំងពីដឹងថា នាងមានផ្ទៃពោះរហូតដល់សម្រាលកូនហើយ។
ប្រភពដដែលបន្តថា ក្មេងស្រីរងគ្រោះទើបសម្រាលកូនបានមួយខែប៉ុណ្ណោះ តែនាងនិងកូនមានសុខភាពទន់ខ្សោយយ៉ាងខ្លាំង ដែលជាបន្ទុកដ៏ធ្ងន់មួយសម្រាប់អាណាព្យាបាលរបស់នាង។
ស្ថិតក្នុងទឹកមុខស្លេកស្លាំង អង្គុយបីកូនតូចនៅលើអង្រឹងក្មេងស្រីរងគ្រោះបានរៀបរាប់ថា យុវជនឈ្មោះបាក់ សេន បានចាប់ផ្តើមទំនាក់ទំនងស្នេហាជាមួយនាង គ្រាដែលនាងកំពុងរៀនថ្នាក់ទី៨នៃវិទ្យាល័យតាហែន ក្នុងស្រុកសង្កែ។ នាងនិយាយថា ដោយសារតែការលួងលោមរបស់យុវជនបាក់ សេន នាងក៏បានជ្រុលខ្លួនប្រាណជាមួយយុវជននោះចំនួន២លើកនៅក្នុងចំការខាងក្រោយភូមិ។ តាំងពីពេលនោះមក នាងចាប់ផ្តើមមានផ្ទៃពោះ រីឯឈ្មោះសេន ក៏ព្យាយាមគេចខ្លួនដែរក្រោយពីដឹងថា នាងមានផ្ទៃពោះ។
នាងបានបញ្ជាក់ថា ពេលនេះនាងឆ្លងទន្លេបានកូនប្រុសមានអាយុជិត១ខែប៉ុណ្ណោះ។ កូនរបស់នាងកើតមកមានទម្ងន់១,៩គីឡូក្រាម មានសុខភាពខ្សោយដែលតម្រូវឱ្យគ្រូពេទ្យយកទៅថែទាំក្នុងកែវ។ ប៉ុន្តែមកដល់ពេលនេះកូនតូចនេះមានសុខភាពល្អបន្តិចហើយ តែនាងកំពុងប្រឈមមុខយ៉ាងខ្លាំងក្នុងការថែទាំដោយសារនាង និងក្រុមគ្រួសារខ្វះខាតគ្រប់បែបយ៉ាង។
ជាមួយនឹងរឿងរ៉ាវរបស់កូនស្រី លោកឆាត វែង ជាឪពុកបានឱ្យដឹងថា រឿងដល់ដំណាក់កាលនេះទៅហើយលោកគ្មានអ្វីត្រូវនិយាយទេ។ លោកថា ក្នុងរឿងនេះលោកបានព្យាយាមទៅសួរនាំអាណាព្យាបាលខាងប្រុសដែរ តែគេហាក់ព្រងើយកន្តើយមិនរវីរវល់ឡើយ ដោយនិយាយតបមកលោកវិញថា ស្រេចលើកូនប្រុសចុះ។ លោកឆាត វែង បានបញ្ជាក់ថា ដោយសារតែភាគីខាងប្រុសបដិសេធមិនទទួលខុសត្រូវ និងសាមីខ្លួនបានគេចខ្លួនបាត់ផងនោះ លោកបានសម្រេចទៅដាក់ពាក្យបណ្តឹងនៅការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋានខេត្តរួចហើយ តែមិនទាន់ឃើញសមត្ថកិច្ចមានចំណាត់ការនៅឡើយទេ។
តាមរយៈកោះសន្តិភាពលោកឆាត វែង បានសំណូមពរទៅគ្រប់អង្គការសង្គមស៊ីវិល និងគ្រប់ស្ថាប័នមានសមត្ថកិច្ចនានាមេត្តាជួយអន្តរាគមន៍ក្នុងរឿងនេះដើម្បីឱ្យភាគីខាងប្រុសទទួលខុសត្រូវតាមច្បាប់ និងបង់ជាសំណងដើម្បីជួយចិញ្ចឹមកូនតូចដែលស្ថិតក្នុងស្ថានភាពទន់ខ្សោយបំផុតទាំងម្តាយ ទាំងកូន។
តាមប្រភពព័ត៌មានបានបង្ហើបឱ្យដឹងថា បច្ចុប្បន្នយុវជនបាក់ សេន បានរត់ចោលស្រុកទៅសម្ងំលាក់ខ្លួនស៊ីឈ្នួលធ្វើចំការឱ្យគេនៅភូមិអូររអិល ឃុំស្ទឹងកាច់ ស្រុកសាលាក្រៅខេត្តប៉ៃលិន ៕
ចែករំលែកព័តមាននេះ