ខេត្តក្រចេះ ៖ ថ្លែងក្នុងពិធីបិទសន្និបាតបូកសរុបលទ្ធផលការងាររបស់រដ្ឋបាលខេត្តក្រចេះ កាលពីព្រឹកថ្ងៃទី៦ មីនា នៅសាលមហោស្រព ខេត្ត លោកងី ច័ន្ទ្រផល រដ្ឋលេខាធិការក្រសួងមហាផ្ទៃ បានជំរុញឱ្យអាជ្ញាធរខេត្តត្រូវចាត់វិធានការឱ្យបានម៉ឺងម៉ាត់ទៅលើសកម្មភាពដាក់ប៉ុស្តិ៍ត្រួតពិនិត្យអនាធិបតេយ្យគ្រប់រូបភាព ដែលកំពុងកើតមានក្នុងដែនសមត្ថកិច្ចរបស់ខ្លួន។ ប៉ុស្តិ៍អនាធិបតេយ្យឬហៅជាសាមញ្ញថា កុងត្រូលជជុះនេះ មិនមែនជារឿងថ្មីទេ នៅក្នុងខេត្តនេះ តែប្រសិទ្ធភាពនៃការលុបបំបាត់មានកម្រិត ឬអាចនិយាយបានថា ពេលមានការបង្ក្រាបក៏ស្ងាត់ ហើយក្រោយមកក៏កើតឡើងវិញ ។
លោករដ្ឋលេខាធិការបានដាក់បទបញ្ជាយ៉ាងម៉ឺងម៉ាត់ ដល់បណ្តាមន្ទីរអង្គភាពជំនាញក្នុងខេត្តទាំងអស់ ត្រូវបន្តសហការនិងបង្កើនការយកចិត្តទុកដាក់ ចាត់វិធានការទប់ស្កាត់ និងបង្ក្រាបរាល់បទល្មើសផ្សេងៗ ដូចជាបទល្មើសនេសាទ បទល្មើសព្រៃឈើ ការទន្ទ្រានកាន់កាប់ដីដោយខុសច្បាប់ ពិសេសគឺការដាក់ប៉ុស្តិ៍ត្រួតពិនិត្យអនាធិបតេយ្យ (កុងត្រូលជជុះ) ដែលកំពុងកើតមានគ្រប់រូបភាព នៅតាមបណ្តាផ្លូវនានាក្នុងខេត្តឱ្យបានទាន់ពេលវេលាជាប់ជាប្រចាំ ដោយប្រើប្រាស់វិធានការដែលមានស្រាប់កន្លងមក និងពង្រឹងអនុវត្តតួនាទីភារកិច្ចឱ្យបានត្រឹមត្រូវទៅតាមគោលការណ៍ច្បាប់ ។
បើតាមសេចក្តីរាយការណ៍នានាឱ្យដឹងថា សព្វថ្ងៃនេះ ទន្ទឹមនឹងបទល្មើសដឹកជញ្ជូនឈើខុសច្បាប់ដែលកំពុងកក្រើកឡើងវិញនារយៈពេលប៉ុន្មានខែចុងក្រោយនេះ គឺគេសង្កេតឃើញថា ការដាក់ប៉ុស្តិ៍ត្រួតពិនិត្យអនាធិបតេយ្យ ឬក្រុងត្រូលជជុះ កំពុងកើតមានយ៉ាងស្អេកស្កះនៅតាមបណ្តាផ្លូវនានាក្នុងខេត្ត ។ ប៉ុស្តិ៍ត្រួតពិនិត្យអនាធិបតេយ្យ ឬកុងត្រូលជជុះទាំងនេះ គេឃើញមានសមាសភាពសុទ្ធសឹងជាមន្ត្រីកងកម្លាំង និងក្រុមអ្នកកាន់កាតកាសែត ដែលតែងតែធ្វើសកម្មភាពដាក់រថយន្តតាមផ្លូវជាតិ និងផ្លូវនានាក្នុងខេត្តសម្រាប់ដេញស្ទាក់ឃាត់រថយន្ត ឬរទេះគោ ក្របី របស់ពលរដ្ឋដែលធ្វើជំនួញឈើ។
សេចក្តីរាយការណ៍មួយចំនួនបានបញ្ជាក់ទៀតថា សកម្មភាពដាក់ប៉ុស្តិ៍ត្រួតពិនិត្យអនាធិបតេយ្យ ឬកុងត្រូលជជុះរបស់ក្រុមសមត្ថកិច្ច និងក្រុមអ្នកកាន់កាតកាសែតទាំងនេះ ត្រូវប្រជាពលរដ្ឋធ្វើការរិះគន់យ៉ាងពេញទំហឹង ដោយពួកគាត់តែងតែទទូចឱ្យអាជ្ញាធរមានសមត្ថកិច្ចចាត់វិធានការលុបបំបាត់ជាបន្ទាន់ តែចំណាត់ការហាក់ដូចជាមិនទាន់មាន ។ កន្លងមកគេសង្កេតឃើញថា រាល់ការប្រារព្ធវេទិកាសាធារណៈនៅតាមមូលដ្ឋាន ប្រជាពលរដ្ឋតែងលើកឡើងស្ទើរគ្រប់វេទិកាសាធារណៈ ប៉ុន្តែគេនៅតែសង្កេតឃើញសកម្មភាពកុងត្រូលជជុះទាំងនេះ នៅតែបន្តដាក់ពង្រាយ តាមដងផ្លូវ ភាគច្រើនតាមដងផ្លូវជាតិលេខ៧ ចាប់ពីព្រំប្រទល់ក្រចេះ-ស្ទឹងត្រែង ដល់ព្រំប្រទល់ក្រចេះ កំពង់ចាម ។
លោកងី ច័ន្ទ្រផល ថ្លែងថា កន្លងមកក្រសួងមហាផ្ទៃបានដាក់ចេញនូវគោលនយោបាយភូមិ ឃុំមានសុវត្ថិភាព ដោយរៀបចំឱ្យមានជាវេទិកាសាធារណៈ នៅគ្រប់មូលដ្ឋាន ងាយស្រួលចង់ដឹងពីកង្វល់និងបញ្ហាផ្សេងៗ ដែលកើតមានក្នុងមូលដ្ឋាននោះ ដើម្បីដោះស្រាយ ប៉ុន្តែប្រសិទ្ធភាពនៃការដោះស្រាយរបស់អាជ្ញាធរថ្នាក់ក្រោមជាតិកន្លងមកមិនទាន់ឆ្លើយតបទៅនឹងតម្រូវការជាក់ស្តែងរបស់ពលរដ្ឋនៅឡើយទេ ។ដោយពិនិត្យឃើញនូវភាពអសកម្មមួយចំនួនទើបបច្ចុប្បន្នរាជរដ្ឋាភិបាលបានបង្កើតឱ្យមាននូវវេទិកាសាធារណៈមួយថ្មី ដោយមានសមាសភាពក្រុមការងារចម្រុះពីថ្នាក់ជាតិទៅជួយដោះស្រាយជូនប្រជាពលរដ្ឋដោយផ្ទាល់តែម្តង ដើម្បីឱ្យកាន់តែមានប្រសិទ្ធភាពជាងមុន ៕
ចែករំលែកព័តមាននេះ