ខេត្តបន្ទាយមានជ័យ ៖ គ្រាប់យុទ្ធភ័ណ្ឌមិនទាន់ផ្ទុះចម្រុះប្រមាណជិត១តោនត្រូវបានប្រជាពលរដ្ឋប្រទះឃើញកប់នៅក្នុងរណ្តៅដីមួយកន្លែង នៃតំបន់អតីតសមរភូមិសង្គ្រាម ស្ថិតនៅក្នុងភូមិបន្ទាយទី១ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ខណៈដែលប្រជាពលរដ្ឋកាប់ឆ្ការព្រៃធ្វើចម្ការ ។…
ខេត្តបន្ទាយមានជ័យ ៖ គ្រាប់យុទ្ធភ័ណ្ឌមិនទាន់ផ្ទុះចម្រុះប្រមាណជិត១តោនត្រូវបានប្រជាពលរដ្ឋប្រទះឃើញកប់នៅក្នុងរណ្តៅដីមួយកន្លែង នៃតំបន់អតីតសមរភូមិសង្គ្រាម ស្ថិតនៅក្នុងភូមិបន្ទាយទី១ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ខណៈដែលប្រជាពលរដ្ឋកាប់ឆ្ការព្រៃធ្វើចម្ការ ។ គ្រាប់យុទ្ធភ័ណ្ឌទាំងនោះ រួមមានប្រភេទគ្រាប់ធុនបេ ៤០កន្លះ ,គ្រាប់មីនតោន, គ្រាប់អាកា,គ្រាប់កាំភ្លើងត្បាល់៨០មម ,គ្រាប់កាំភ្លើងត្បាល់ ៦០មម និងគ្រាប់ដេកា៨២ ។
ការប្រទះឃើញដ៏សន្ធឹកសន្ធាប់នេះ នៅព្រឹកថ្ងៃទី២៨ ខែសីហានេះ ត្រូវបានសមត្ថកិច្ច និងមន្ត្រីជំនាញអង្គភាពស៊ីម៉ាកចុះទៅត្រួតពនិត្យ និងបន្តរាវរកប្រមូលយកទៅរក្សាទុក ដើម្បីបញ្ចៀសគ្រោះថ្នាក់ដល់អាយុជីវិតប្រជាពលរដ្ឋជាយថាហេតុអាក្រក់ណាមួយកើតឡើង ។ ខេត្តបន្ទាយមានជ័យ ក្នុងរយៈពេលប្រមាណ២ខែចុងក្រោយនេះគេមើលឃើញថា គ្រាប់យុទ្ធភ័ណ្ឌមិនទាន់ផ្ទុះជាច្រើនគ្រាប់កប់នៅរាយប៉ាយក្នុង និងលើដីតំបន់អតីតសមរភូមិសង្គ្រាមត្រូវបានប្រជាពលរដ្ឋប្រទះឃើញជាបន្តបន្ទាប់ ហើយគ្រាប់យុទ្ធភ័ណ្ឌមិនទាន់ផ្ទុះទាំងនោះក៏ត្រូវបានមន្ត្រីជំនាញអង្គភាពសីម៉ាក់ប្រមូលយកទៅរក្សាទុកកន្លែងសុវត្ថិភាព ដើម្បីរង់ចាំបំផ្លាញចោល ។
របាយការណ៍បានបង្ហាញឱ្យដឹងថា កម្ពុជាក្នុងរយៈពេល៦ខែដើមឆ្នាំ២០១៩ ជនរងគ្រោះដោយសារគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះបន្សល់ពីសង្គ្រាមមានចំនួន៦១នាក់ ដែលចំនួននោះមានការកើនឡើង៣០នាក់ បើប្រៀបធៀបនឹងរយៈពេលដូចគ្នាក្នុងឆ្នាំ២០១៨ដែលមានជនរងគ្រោះចំនួនតែ៣១នាក់ប៉ុណ្ណោះ ។
សូមបញ្ជាក់ថា កម្ពុជាទោះបីបញ្ចប់សង្គ្រាមទាំងស្រុងនោះក៏ពិតមែន ប៉ុន្តែគ្រាប់មីន និងកាកសំណល់ពីសង្គ្រាមនៅតែមានកប់រាយប៉ាយនៅក្នុង និងលើដីក្នុងតំបន់ដែលមិនទាន់ធ្វើការបោសសំអាតរួចរាល់ដែលជាបញ្ហាប្រឈមបង្កគ្រោះថ្នាក់ដល់អាយុជីវិតប្រជាពលរដ្ឋ ។ ជុំវិញបញ្ហានេះកម្ពុជានៅមានផ្ទៃដីរងនូវការគម្រាមពីមីន និងគ្រាប់មិនទាន់ផ្ទុះប្រមាណ២ពាន់១៤៨គីឡូម៉ែត្រក្រឡា ។ រាជរដ្ឋាភិបាលបានកំណត់យកឆ្នាំ២០២៥ ជាឆ្នាំដែលធ្វើអោយកម្ពុជាអស់ការគម្រាមកំហែងដោយសារមីន និងគ្រាប់យុទ្ធភ័ណ្ឌមិនទាន់ផ្ទុះទាំងនោះ ៕ កែសម្រួលដោយ ៖សុឃាក់
ចែករំលែកព័តមាននេះ