ខេត្តកំពង់ចាម ៖ ក្នុងរដូវបិទនេសាទនៅតាមបឹងបួរក្នុងអតីតឡូត៏នេសាទមួយចំនួន ជាប់តាមដងទន្លេមេគង្គបានកើតមានបទល្មើសនេសាទ ដោយក្រុមជនខិលខូចប្រើប្រាស់ឧបករណ៏នេសាទខុសច្បាប់ចាប់យកត្រី ដែលច្បាប់បានហាមឃាត់ ។ លោកឧត្តមសេនីយ៏ទោ ឯម កុសល…
ខេត្តកំពង់ចាម ៖ ក្នុងរដូវបិទនេសាទនៅតាមបឹងបួរក្នុងអតីតឡូត៏នេសាទមួយចំនួន ជាប់តាមដងទន្លេមេគង្គបានកើតមានបទល្មើសនេសាទ ដោយក្រុមជនខិលខូចប្រើប្រាស់ឧបករណ៏នេសាទខុសច្បាប់ចាប់យកត្រី ដែលច្បាប់បានហាមឃាត់ ។
លោកឧត្តមសេនីយ៏ទោ ឯម កុសល ស្នងការនគរបាលខេត្តបានឲ្យដឹងថា ដោយមានការណែនាំពីអភិបាលខេត្តក៏ដូចជាអគ្គស្នងការនគរបាលជាតិ បានឲ្យសមត្ថកិច្ចត្រូវយកចិត្តទុកដាក់បង្ក្រាបបទល្មើសនេសាទក្នុងរដូវបិទនេសាទ ជាក់ស្តែងនៅព្រឹកថ្ងៃទី២៧ សីហា រូបលោកបានបញ្ជារឲ្យកម្លាំងការិយាល័យប្រឆាំងបទល្មើសសេដ្ឋកិច្ចខេត្ត សហការជាមួយកម្លាំងនគរបាលស្រុកកងមាសរួមនឹងរដ្ឋបាលជលផលខេត្ត ចុះបង្ក្រាបបទល្មើសនេសាទត្រង់ចំណុនបឹងបេ៦ ឃុំស្តៅ ស្រុកកងមាស ដោយរឹបអូសបានមាន លូស្បៃមុងចំនួន៣១មាត់ របាំងស្បៃមុងប្រវែង១.៥៥០ម៉ែត្រ បង្គោលចំនួន៤៦៥ដើម និងបានចាក់លែងកូនត្រីចូលទៅក្នុងបឹងធម្មជាតិចំនួន៧៨គីឡូក្រាម វត្ថុតាងត្រូវបានដុតបំផ្លាញចោលហើយឧបករណនេសាទទាំងនេះ ក៏មិនមាននរណាម្នាក់ចេញមុខមកទទួលខុសត្រូវដែរ ។
លោកឧត្តមសេនីយ៏ទោ ឯម កុសល ស្នងការនគរបាលខេត្តបានរំលឹកថា កន្លងទៅថ្មីៗរូបលោកបានបញ្ជារឲ្យនាយការិយាល័យប្រឆាំងបទល្មើសសេដ្ឋកិច្ចខេត្ត ចុះសហការជាមួយនគរបាលស្រុកព្រៃឈរអាជ្ញាធរមូលដ្ឋាននិងប្រជាការពារ បង្ក្រាបបទល្មើសនេសាទត្រង់ចំនុចអាងទឹកអណ្តូង ក្នុងភូមិគោកស្រឡៅ ឃុំបារាយណ៏ ដោយរឹបអូសលូស្បៃមុងចំនួន១៥មាត់ សាច់របាំងរត់ចំនួន១.២០០ម៉ែត្រ ចម្រឹងបង្គោលឫស្សីចំនួន៣៥០ដើម វត្ថុតាងត្រូវបានសមត្ថកិច្ចបំផ្លាញចោលក្នុងទឹកនិងដុតបំផ្លាញចោលហើយក៏បានផ្សពផ្សាយតាមរយៈអាជ្ញាធរមូលដ្ឋាន សូមឲ្យប្រជាជនមួយចំនួនដែលប្រើប្រាស់នូវឧបករណ៏នេសាទខុសច្បាប់ ត្រូវបញ្ឈប់សកម្មភាពហើយងាកមកប្រើប្រាស់ឧបករណ៏នេសាទស្របច្បាប់វិញ ហើយត្រីកាន់តែសំបូរសម្រាប់មនុស្សទទួលទាន ៕
កែសម្រួលដោយ ៖ សំណាង
ចែករំលែកព័តមាននេះ