ខេត្តបន្ទាយមានជ័យ ៖ យុវជនម្នាក់ត្រូវជនមិនស្គាល់មុខធ្វើសកម្មភាពវាយ និងកាប់បណ្តាលឱ្យស្លាប់ក្នុងថ្លុកឈាម ហើយយកម៉ូតូជិះគេចខ្លួនបាត់រយៈពេល២ថ្ងៃហើយ មកទល់នឹងថ្ងៃទី៧ មីនា ២០១៤នេះ សមត្ថកិច្ចជំនាញការិយាល័យបច្ចេកទេសវិទ្យាសាស្ត្រ ជំនាញនគរបាលព្រហ្មទណ្ឌកម្រិតធ្ងន់ខេត្ត និងកម្លាំងជំនាញការិយាល័យនគរបាលស្រុកអូរជ្រៅកំពុងតែធ្វើការស៊ើបអង្កេតយ៉ាងសកម្ម និងយកចិត្តទុកដាក់បំផុតដើម្បីឈានដល់ការឃាត់ខ្លួនជនសង្ស័យ។
តាមការឱ្យដឹងពីលោកវរសេនីយ៍ត្រី ឆេង អ៊ីសុខា អធិការនគរបាលស្រុកអូរជ្រៅបានឱ្យដឹងថា អំពើឃាតកម្មនេះបានកើតឡើងកាលពីវេលាម៉ោង៥ និង៤៦នាទីល្ងាច ថ្ងៃទី៥ មីនា ២០១៤ ចម្តាយពីភូមិអញ្ចាញ៦០០ម៉ែត្រស្ថិតក្នុងឃុំសំរោង ស្រុកអូរជ្រៅ ។ ជនរងគ្រោះដែលស្លាប់ឈ្មោះតែម ចាន់ថន ភេទប្រុស អាយុ១៦ឆ្នាំ ជាអ្នកស៊ីឈ្នួលគេ រស់នៅភូមិ១ សង្កាត់ព្រះពន្លា ក្រុងសិរីសោភ័ណ។
លោកអធិការនគរបាលស្រុកបានបន្តថា ជនរងគ្រោះត្រូវជនដៃដល់ធ្វើសកម្មភាពស្ទាក់វាយ និងកាប់ចំនួន៣កាំបិត ខណៈពេលដែលជនរងគ្រោះកំពុងជិះម៉ូតូម្នាក់ឯងបណ្តាលឱ្យស្លាប់ រួចអូសទម្លាក់ចូលក្នុងរណ្តៅប្រឡាយដែលគ្មានទឹក បន្ទាប់មកជនល្មើសបានយកម៉ូតូជនរងគ្រោះម៉ាកហុងដាវ៉េវ ពណ៌ក្រហម ស៊េរី២០០៣ ពាក់ស្លាកលេខ១C០៥៦៥ ជិះគេចខ្លួន។ នៅកន្លែងកើតហេតុ សមត្ថកិច្ចបានរកឃើញវត្ថុតាងមានដំបងឈើ១កំណាត់ប្រវែង៨០សង្ទីម៉ែត្រ និងកាំបិតខ្វែវដងប្ញស្សី១។
លោកវរសេនីយ៍ឯក សិទ្ធ ឡោះ ស្នងការរង និងជាប្រធានការិយាល័យកណ្តាលនគរបាលព្រហ្មទណ្ឌបានបញ្ជាក់ថា តាមការសន្និដ្ឋានករណីនេះគឺជាករណីប្លន់សម្លាប់ ហើយមកទល់ពេលនេះសមត្ថកិច្ចបានកំណត់មុខសញ្ញាបានហើយ៕
ចែករំលែកព័តមាននេះ