ខេត្តបាត់ដំបង ៖ សេចក្តីរាយការណ៍ឱ្យដឹងថា ស្ត្រីចំណាស់ម្នាក់បានសម្រេចធ្វើអត្តឃាតដោយប្រើវិធីផឹកថ្នាំពុល កាលពីល្ងាចថ្ងៃទី២៧ សីហា នៅនឹងផ្ទះរបស់ខ្លួន ស្ថិតក្នុងភូមិបូរ ឃុំបួរ ស្រុកភ្នំព្រឹក ដែលគអះអាងថា ដោយសារតែគាត់តូចចិត្តនិងក្រុមគ្រួសារ ដែលរស់នៅមិនចុះសម្រុងនឹងគ្នា ។ សមត្ថកិច្ចថា ស្ត្រីរងគ្រោះរូបនេះឈ្មោះ ម៉ង ហ៊ាង អាយុ៧០ឆ្នាំ រស់នៅក្នុងភូមិ ឃុំកើតហេតុខាងលើ ។ គាត់បានផឹកថ្នាំពុល ដែលជាប្រភេទថ្នាំសម្រាប់កសិករបាញ់សម្លាប់ស្មៅ បណ្ដាលឲ្យពុលក្អួតចង្អោរ ហើយត្រូវបានក្រុមគ្រួសារ និង អាជ្ញាធរជួយបញ្ជូនទៅកាន់មណ្ទលសុខភាពភ្លាមៗ តែមិនអាចជួយសង្គ្រោះបានឡើយ ដោយមានសភាពធ្ងន់ធ្ងរពេក ហើយក៏បានស្លាប់តែម្ដង ។
ពាក់ព័ន្ធនឹងការធ្វើអត្តឃាតរបស់ស្ត្រីវ័យ៧០ឆ្នាំនេះ បើតាមការបំភ្លឺខ្លះៗពីក្រុមគ្រួសារ ដែលសមត្ថកិច្ចបានស្រង់សំដីបានឱ្យងថា ក្រុមគ្រួសារនេះតែមានវិវាទនៅក្នុងគ្រួសារញឹកញាប់ ដោយសារមិនចុះសម្រុងគ្នានៅក្នុងក្រុមគ្រួសារ ។ ប្រភពដដែលបានប្រាប់សមត្ថកិច្ចថា មួយរយៈកន្លងទៅនេះ ក៏មានជម្លោះបានកើតឡើងជាបន្តបន្ទាប់ដែរ ។ ជាពិសេស ជម្លោះរវាងប្ដីប្រពន្ធវ័យចំណាស់នេះតែម្ដង រហូតធ្វើឲ្យស្ត្រីជាប្រពន្ធតូចចិត្តគ្រប់បែបយ៉ាង ក៏សម្រេចបញ្ចប់ជីវិតខ្លួនឯងបែបនេះ ដើម្បីបញ្ចប់រាល់បញ្ហាទាំងអស់នៅក្នុងគ្រួសារតែម្ដង ។
ទោះយ៉ាងណាបន្ទាប់ពីស្ត្រីរងគ្រោះបានស្លាប់ពេលបញ្ជូនដល់មណ្ឌលសុខភាព ក្រុមគ្រួពេទ្យនិងអាជ្ញាធរ ក៏បានជួយដឹកសពស្ត្រីរងគ្រោះតាមរថយន្តសង្គ្រោះ ត្រឡប់មកកាន់លំនៅឋាន ដើម្បីប្រគល់ឲ្យក្រុមគ្រួសារធ្វើបុណ្យតាមប្រពៃណីហើយ៕ (សម្រួលដោយ៖ ស្រីណា)
ចែករំលែកព័តមាននេះ