លោកយាយមីសាអូ អូការ៉ា បានប្រារព្ធពិធីខួបកំណើតគំរប់១១៦ឆ្នាំ កាលពីថ្ងៃទី៥ ខែមីនា ឆ្នាំ២០១៤ ដោយទទួលទាននំខេករសជាតិស្ត្រប៊ើរី ។ គាត់បញ្ជាក់ថា របបអាហារត្រឹមត្រូវ រួមទាំងសម្រាកលំហែកាយច្រើនជាមូលហេតុធ្វើឱ្យគាត់មានអាយុវែង ។ ប្រភពព័ត៌មានបរទេសផ្សាយថា លោកយាយមីសាអូ អូការ៉ា កើតនៅថ្ងៃទី៥ ខែមីនា ឆ្នាំ១៨៩៨ ។ មនុស្សជាច្រើនបានចូលរួមអបអរសាទរនៅក្នុងថ្ងៃកំណើតរបស់លោកយាយ មីសាអូ អូកាវ៉ា ដោយជូនបាច់ផ្កា និងជូនពរគាត់ក្នុងពិធីដែលប្រារព្ធទ្បើង នៅមជ្ឈមណ្ឌលមនុស្សចាស់ជរា ក្នុងទីក្រុងអូសាកា ភាគខាងលិចប្រទេសជប៉ុន ។
លោកយាយមីសាអូ អូកាវ៉ា ជាកូនរបស់អាជីវករលក់សម្លៀកបំពាក់ ក្នុងទីក្រុងអូសាកា ។ គាត់មានកូនចំនួន៣នាក់ និង២នាក់ នៅរស់រានមានជីវិតក្នុងពេលបច្ចុប្បន្នក្នុងវ័យ៩០ឆ្នាំ ។ លោកយាយមីសាអូ អូកាវ៉ា ទទួលទានអាហារគ្រប់ប្រភេទ និងមានអាហារមួយប្រភេទ ដែលពេញចិត្តបំផុត គឺត្រីឆៅ ដោយក្នុងអំទ្បុងពេល៦ខែកន្លងមក គាត់ទទួលទានត្រីឆៅអស់ប្រហែល៤គីទ្បូក្រាម ។
លោកយាយមីសាអូ អូកាវ៉ា គឺជាបុគ្គលមានអាយុច្រើនជាងគេនៅលើពិភពលោក តាំងពីខែមិថុនាឆ្នាំមុនមក ក្រោយពីមរណភាពរបស់លោកតាជីរ៉ូម៉ុង គីមូរ៉ា ជនជាតិជប៉ុន អាយុ១១៦ឆ្នាំ ។
លោកយាយមីសាអូ អូកាវ៉ា គឺជាមនុស្សទី១០ ដែលបានទទួលការធានាថា មានអាយុលើស១១៦ឆ្នាំ និងមានអាយុវែងបំផុត ជាមនុស្សទី៣ នៅក្នុងប្រទេសជប៉ុន ។ ជប៉ុន គឺជាប្រទេសមួយដែលប្រជាពលរដ្ឋមានអាយុវែងបំផុត នៅលើពិភពលោក ។ បើគិតត្រឹមខែកញ្ញា ឆ្នាំ២០១៣ កន្លងទៅ មានមនុស្សអាយុលើសពី១០០ឆ្នាំ ចំនួន៥៤.៤០០នាក់ តាមរបាយការណ៍របស់ក្រសួងសុខាភិបាលជប៉ុន ៕
ចែករំលែកព័តមាននេះ