ពួកលោកខាងលិច និងរុស្ស៊ី នឹងបន្តការចរចាគ្នាស្តីពីវិបត្តិនយោបាយនៅអ៊ុយក្រែន ដើម្បីបុ៉នប៉ងស្វែងរកផែនការចាកចេញពីវិបត្តិ ខណៈបេសកជនពិសេសអ.ស.ប នៅអ៊ុយក្រែន ត្រូវគំរាមកំហែងដោយពួកជនប្រដាប់អាវុធ ហើយត្រូវបង្ខំចិត្តបញ្ចប់បេសកកម្មរបស់លោកនៅគ្រីមេ ។
ពួកលោកខាងលិច និងរុស្ស៊ី នឹងបន្តការចរចាគ្នាស្តីពីវិបត្តិនយោបាយនៅអ៊ុយក្រែន ដើម្បីបុ៉នប៉ងស្វែងរកផែនការចាកចេញពីវិបត្តិ ខណៈបេសកជនពិសេសអ.ស.ប នៅអ៊ុយក្រែន ត្រូវគំរាមកំហែងដោយពួកជនប្រដាប់អាវុធ ហើយត្រូវបង្ខំចិត្តបញ្ចប់បេសកកម្មរបស់លោកនៅគ្រីមេ ។
ក្រោយការជួបចរចាគ្នាលើកដំបូងនៅក្រុងប៉ារីស រដ្ឋមន្ត្រីការបរទេសរុស្ស៊ី និងអាមេរិកបានព្រមព្រៀងគ្នាបន្តការចរចានាបុ៉ន្មានថ្ងៃខាងមុខនេះទៀត ។ រដ្ឋមន្ត្រីការបរទេសរុស្ស៊ី លោកស័រហ្គេយឡាវរ៉ូវ លើកឡើងពីភាពចាំបាច់ថា តើត្រូវជួយធ្វើឱ្យមានស្ថេរភាពឡើងវិញនៃសភាពការណ៍បែបណា និងតើត្រូវជម្នះវិបត្តិបែបណា ។ ចំណែកលោកចនគ័ររីវិញ គ្រោងឱ្យមានការចរចាគ្នាម៉ាត់ប្រាយក្នុងប៉ុន្មានថ្ងៃខាងមុខទៀត ។
រីឯប្រធានាធិបតីអាមេរិកលោកបារ៉ាក់ អូបាម៉ា និងនាយករដ្ឋមន្ត្រីអង់គ្លេសលោកដាវីដ កាមីរ៉ូន វាយតម្លៃថា សភាពការណ៍នៅអ៊ុយក្រែនពុំអាចទទួលយកបានហើយអះអាងថា រុស្ស៊ីរងការបង់តម្លៃរួចហើយ ដោយសារអន្តរាគមន៍របស់ខ្លួន ។ បណ្តារដ្ឋមន្ត្រីការបរទេសសហភាពអឺរ៉ុប ត្រូវជួបប្រជុំគ្នានាថ្ងៃទី៦ មីនា នៅក្រុងព្រុចសែលសម្រាប់កិច្ចប្រជុំកំពូលវិសាមញ្ញមួយផ្តោតលើវិបត្តិអ៊ុយក្រែន ។
កិច្ចប្រជុំនេះធ្វើមុនការជួបគ្នាមួយរវាងមេដឹកនាំនៃបណ្តាប្រទេសអឺរុ៉បស្ថិតក្នុងក្រុម G-8 (បារាំង អាល្លឺម៉ង់ អង់គ្លេស អុីតាលី) ។ យោងតាមក្រុងប៉ារីសថា ការជួបគ្នាកំពូលវិសាមញ្ញនោះនឹងមិនប្រកាសពីទណ្ឌកម្មនានាឡើយ តែធ្វើការព្រមានម៉ឺងម៉ាត់មួយដល់រុស្ស៊ី។ម្យ៉ាងវិញទៀត ប្រធានាធិបតីរុស្ស៊ីលោកវ៉្លាឌីមៀរពូទីន និងអធិការបតីអាល្លឺម៉ង់ លោកស្រីអេនហ្សឺឡាម័រកែល បានពិភាក្សាគ្នាតាមទូរស័ព្ទកាលពីថ្ងៃទី៥ មីនា ពីសេណារីយ៉ូទាំងឡាយដែលអាចធ្វើឱ្យសភាពការណ៍នៅអ៊ុយក្រែនវិលមកមានប្រក្រតីភាពឡើងវិញ។
នៅតំបន់គ្រីមេ កងទាហានអ៊ុយក្រែន និងបណ្តាសមាជិកកងកម្លាំងរុស្ស៊ីបានប្រឈមមុខដាក់គ្នានៅឯមូលដ្ឋានយោធាទាំងឡាយ និងព្រលានយន្តហោះនៃឧបទ្វីបគ្រីមេ ចាប់តាំងពីការដាក់ពង្រាយពីថ្ងៃទី២៨ កុម្ភៈ មកនូវជនប្រដាប់អាវុធស្លៀកពាក់ឯកសណ្ឋានដែលគេសន្មត់ថា ជាកងទាហានរុស្ស៊ីជាច្រើនពាន់នាក់ ។ នៅគ្រីមេ កងទ័ពរុស្ស៊ីកាលពីថ្ងៃទី៥ មីនា បានលុកចូលកាន់កាប់មូលដ្ឋានបាញ់មីស៊ីលនៅ FIOLENT ជាទីតាំងយុទ្ធសាស្ត្រមួយនៅគ្រីមេ ដែលកាន់តែធ្វើឱ្យមានភាពតានតឹងថែមទៀត ។
ក្រោយការប្រឈមមុខដាក់គ្នាដោយស្ងៀមស្ងាត់ គឺកងទ័ពរុស្ស៊ីជាទូទៅឡោមព័ទ្ធបន្ទាយ និងមូលដ្ឋានយោធានានារបស់កងទ័ពអ៊ុយក្រែន ការលុកចូលទីតាំងយុទ្ធសាស្ត្រខាងលើនេះជាដំណាក់កាលថ្មីមួយទៀតនៃភាពតានតឹងនៅគ្រីមេ ។ក្រៅពីតំបន់គ្រីមេ ភាពតានតឹងត្រូវបានកត់សម្គាល់ឃើញនៅ DONETSK ភាគខាងកើតអ៊ុយក្រែន ។ ពួកបាតុករស្និទ្ធរុស្ស៊ីបានលុកចូលក្នុងអគាររដ្ឋបាលតំបន់។
ទាហានរុស្ស៊ីប្រមាណជា១៦.០០០នាក់ ក្នុងនោះយ៉ាងតិច៥.០០០នាក់ទើបមកដល់រយៈពេលបុ៉ន្មានថ្ងៃចុងក្រោយនេះ បានកាន់កាប់តំបន់គ្រីមេ ហើយបានឡោមព័ទ្ធទីតាំងយុទ្ធសាស្ត្រភាគច្រើនដូចជា បណ្តានាវាចម្បាំង បន្ទាយទាហាន ព្រមទាំងបណ្តាអគាររដ្ឋបាល៕
ចែករំលែកព័តមាននេះ