ខេត្តកំពត ៖ បើតាមនគរបាលចរាចរស្រុកទឹកឈូបានរាយការឲ្យដឹងថា មានករណីគ្រោះថ្នាក់មួយបានកើតឡើងកាលពីវេលាម៉ោង០៨និង២២នាទីយប់ ថ្ងៃទី២៦ ខែសីហា ឆ្នាំ២០១៩ លើកំណាត់ផ្លូវជាតិលេខ៣៣កំពតកំពង់ត្រាច ត្រង់ចំណុចគីឡូម៉ែត្រលេខ៤-៥ ស្ថិតនៅភូមិជុំគ្រៀល…
ខេត្តកំពត ៖ បើតាមនគរបាលចរាចរស្រុកទឹកឈូបានរាយការឲ្យដឹងថា មានករណីគ្រោះថ្នាក់មួយបានកើតឡើងកាលពីវេលាម៉ោង០៨និង២២នាទីយប់ ថ្ងៃទី២៦ ខែសីហា ឆ្នាំ២០១៩ លើកំណាត់ផ្លូវជាតិលេខ៣៣កំពតកំពង់ត្រាច ត្រង់ចំណុចគីឡូម៉ែត្រលេខ៤-៥ ស្ថិតនៅភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត រវាងរថយន្ត និងម៉ូតូ ដែលមានទិសដៅផ្ទុយគ្នា ។
ក្នុងហេតុការនេះបណ្តាលឲ្យមានមនុស្ស៤នាក់រងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពត ។ រថយន្តបង្កម៉ាក ឆ្លាមពណ៌ស្ករ ផ្លាកលេខ 2A-6227 មានទិសដៅពីកើតទៅលិច បើកបរដោយឈ្មោះ គៀត សារ៉េត ភេទប្រុស អាយុ២៦ឆ្នាំ មុខរបរបុគ្គលិកធនាគារ មានទីលំនៅភូមិ-ឃុំកើតហេតុ បានរត់គេចខ្លួន ។
ម៉ូតូរងគ្រោះម៉ាកវ៉េវ ពណ៌ខ្មៅ ពាក់ផ្លាកលេខ កំពត 1B-4627 ជិះគ្នាបួននាក់មានទិសដៅពីលិចទៅកើត បើកបរដោយឈ្មោះ ញ៉ែត រដ្ឋា ភេទប្រុស អាយុ៣៥ឆ្នាំ មុខរបរបុគ្គលិកធនាគារ រស់នៅភូមិកំពង់ត្នោត ឃុំកូនសត្វ ស្រុកទឹកឈូ ខេត្តកំពត រងរបួសធ្ងន់ ។ អ្នករួមដំណើរបីនាក់ ៖ ១/- ឈ្មោះ យ៉ែម ប៉ាន់ ត្រូវជាប្រពន្ធ អ្នកបើកបរ អាយុ២៧ឆ្នាំ មុខរបរកសិករ, ២/-ឈ្មោះ កានរតនា ភេទស្រី អាយុ៧ឆ្នាំ អង្គុយនៅខាងមុខអ្នកបើកបរ ត្រូវជាកូន រងរបួសធ្ងន់, ៣/-ឈ្មោះ កាន វិច្ឆិកា ភេទស្រី អាយុ5ឆ្នាំ អង្គុយនៅកណ្ដាល រងរបួសធ្ងន់ ទាំង៤នាក់នេះនៅភូមិ-ឃុំជាមួយគ្នា និងបញ្ជូនទៅមន្ទីរពេទ្យបង្អែកខេត្តកំពតទាំងអស់។
ប្រភពចុងក្រោយពីសមត្ថកិច្ចបានឲ្យដឹងថា ក្នុងហេតុការគ្រោះថ្នាក់ខាងលើទាំងរថយន្តបង្ក និងអ្នកបើកម៉ូតូសុទ្ធតែជាបុគ្គលិកធនាគារតែមួយដូចគ្នា ដូច្នេះប្រធានគ្រប់គ្រងធនាគារបានអះអាងប្រាប់ឲ្យសមត្ថកិច្ចដឹងថា លោកធានាជួយដោះស្រាយដល់ជនរងគ្រោះទាំងព្យាបាលរបួស និងជួសជុលម៉ូតូជូនជនរងគ្រោះវិញផងដែរ ។ ប៉ុន្តែពេលនេះសមត្ថកិច្ចត្រូវនាំយកវត្ថុតាងទៅរក្សាទុកនៅអធិការដ្ឋាននគរបាលស្រុកទឹកឈូ ដើម្បីឲ្យអ្នកគ្រប់គ្រង និងភាគីទាំងពីរចូលដោះស្រាយគ្នាតាមនីតិវិធី៕
កែសម្រួលដោយ ៖ សំណាង
ចែករំលែកព័តមាននេះ