ខេត្តពោធិ៍សាត់ ៖ ស្ពានដែកបេឡេត៍មួយកន្លែងស្ថិតនៅភូមិឆាយលូក ឃុំអូរសោម ស្រុកវាលវែង បានបាក់ផុងផ្ដាច់ការធ្វើចរាចរណ៍ ដោយសារតែរថយន្ដដឹកថ្មសំណង់របស់ក្រុមហ៊ុនចិនបើកឆ្លងកាត់ កាលពីល្ងាចថ្ងៃទី២៥ សីហា ។…
ខេត្តពោធិ៍សាត់ ៖ ស្ពានដែកបេឡេត៍មួយកន្លែងស្ថិតនៅភូមិឆាយលូក ឃុំអូរសោម ស្រុកវាលវែង បានបាក់ផុងផ្ដាច់ការធ្វើចរាចរណ៍ ដោយសារតែរថយន្ដដឹកថ្មសំណង់របស់ក្រុមហ៊ុនចិនបើកឆ្លងកាត់ កាលពីល្ងាចថ្ងៃទី២៥ សីហា ។
ស្ពាននេះ ជាស្ពានដែកបេឡេត៍ក្រាលឈើមានប្រវែង៤៥ម៉ែត្រ ឆ្លងកាត់ស្ទឹងមួយកន្លែងដែលបានសាងសង់ឡើងក្រោមគំនិតផ្ដួចផ្ដើមរបស់លោក ស៊ុយ សែម រដ្ឋមន្ត្រីក្រសួងរ៉ែ និងថាមពល និងសាងសង់ដោយមន្ទីរសាធារណការនិងដឹកជញ្ជូន ព្រមទាំងបានដាក់សម្ពោធឲ្យប្រើប្រាស់ជាផ្លូវការ កាលពីប្រមាណ១០ឆ្នាំមុននេះ គឺទន្ទឹមគ្នានឹងការចាប់ផ្ដើមសាងសង់ទំនប់វារីអគ្គិសនីស្ទឹងអាតៃ ។
ស្ពានដែកបេឡេត៍នេះត្រូវបានសាងសង់ឆ្លងស្ទឹងឆាយលូកឆ្ពោះទៅកាន់ទំនប់វារីអគ្គិសនីស្ទឹងអាតៃនិងខេត្តកោះកុង មានសរសេរផ្លាកសញ្ញាផ្ទុកទម្ងន់បានតែ១៥តោន ប៉ុន្តែមកដល់ពេលនេះស្ពានមានសភាពចាស់ទ្រុឌទ្រោម និងដោយសារតែការដឹកជញ្ជូនផ្ទុកទម្ងន់លើសចំណុះទើបបណ្ដាលឲ្យបាក់ផុងកម្រាលឈើធ្លាក់គូទរថយន្ដផុងចុះក្រោម ក្បាលងើបផុតពីតួស្ពានឡើងលើជាប់នៅលើស្ពាននោះតែម្ដង មើលទៅគួរឱ្យញាក់សាច់ ប៉ុន្តែមិនមានគ្រោះថ្នាក់ដល់មនុស្សទេ សូម្បីអ្នកបើកបរស្ទើរបាត់ព្រលឹងដែរ ។
អាជ្ញាធរនិងសមត្ថកិច្ចកំពុងខ្នះខ្នែងក្នុងការស្ទួចរថយន្ដចេញពីលើស្ពាន ដើម្បីសម្រួលចរាចរណ៍ និងតម្រូវឲ្យខាងក្រុមហ៊ុនចិនធ្វើស្ពាននេះឡើងវិញ ដែលសង្ស័យថា បានផ្ទុកលើសចំណុះ ៕ (សម្រួលដោយ៖ ស្រីណា)
ចែករំលែកព័តមាននេះ